ಜಾನ್ ಎಫ್ ಕೆನಡಿ ವಿಮಾನ ನಿಲ್ದಾಣದಲ್ಲಿ ಪಕ್ಷಿ ಕಳ್ಳಸಾಗಣೆದಾರನ ಬಂಧನ: 34 ಹಕ್ಕಿಗಳು ಬಂಧಮುಕ್ತ

ನ್ಯೂಯಾರ್ಕ್‌: ನ್ಯೂಯಾರ್ಕ್‌ನ ಜಾನ್ ಎಫ್‌ ಕೆನಡಿ ವಿಮಾನ ನಿಲ್ದಾಣದಲ್ಲಿ ಪಕ್ಷಿಗಳ ಕಳ್ಳಸಾಗಣೆ ಮಾಡುತ್ತಿದ್ದ ವ್ಯಕ್ತಿಯೊಬ್ಬನನ್ನು ಬಂಧಿಸಲಾಗಿದ್ದು, 34 ಜೀವಂತ ಹಕ್ಕಿಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ಫ್ರಾನ್ಸಿನ್ ಗುರಾಹೂ ಎಂಬ ವ್ಯಕ್ತಿ ತನ್ನ ಲಗೇಜ್‌ನಲ್ಲಿ ಈ ಹಕ್ಕಿಗಳನ್ನು ಬಚ್ಚಿಟ್ಟು ಸಾಗಣೆ ನಡೆಸಲು ಯತ್ನಿಸಿದ್ದ. ಕಸ್ಟಂಸ್ ವಿಭಾಗದ ಅಧಿಕಾರಿಗಳು ತಪಾಸಣೆ ನಡೆಸಿದಾಗ ಈತ ಸಿಕ್ಕಿಬಿದ್ದಿದ್ದಾನೆ. ಜಾರ್ಜ್‌ಟೌನ್‌ನಿಂದ ಈತ ಜೆಎಫ್‌ಕೆ ವಿಮಾನ ನಿಲ್ದಾಣಕ್ಕೆ ಬಂದಿದ್ದ.

ಪಕ್ಷಿಗಳನ್ನು ಸಣ್ಣ ಗೂಡುಗಳಲ್ಲಿ ಇಡುವ ಬದಲು ಕಳ್ಳಸಾಗಣೆದಾರ ಜಾಣತನದಿಂದ ಬಣ್ಣ ಬಣ್ಣದ ಪ್ಲಾಸ್ಟಿಕ್‌ ಹೇರ್‌ ಕರ್ಲರ್‌ಗಳಲ್ಲಿ ಬಚ್ಚಿಟ್ಟಿದ್ದ.

ವನ್ಯಮೃಗಗಳ ಕಳ್ಳಸಾಗಣೆ ನಿಷೇಧ ಕಾಯ್ದೆಯಡಿ ಈತನನ್ನು ಬಂಧಿಸಲಾಗಿದ್ದು, ವ್ಯಾಪಕ ವಿಚಾರಣೆಗೆ ಗುರಿಪಡಿಸಲಾಗಿದೆ ಎಂದು ಅಸೋಸಿಯೇಟೆಡ್ ಪ್ರೆಸ್ ವರದಿ ಮಾಡಿದೆ.

ಕಳ್ಳಸಾಗಣೆದಾರ ಈ ಹಕ್ಕಿಗಳನ್ನು ಪ್ರತಿಯೊಂದಕ್ಕೆ 3,000 ಡಾಲರ್‌ಗಳಂತೆ ಮಾರಾಟ ಮಾಡಲು ಉದ್ದೇಶಿಸಿದ್ದ. ತನ್ನ ಯೋಜನೆಯಂತೆ ಆತ ಯಶಸ್ವಿಯಾಗಿದ್ದಲ್ಲಿ 1,00,000 ಡಾಲರ್‌ ಸಂಪಾದಿಸುತ್ತಿದ್ದ ಎಂದು ಮೂಲಗಳು ಹೇಳಿವೆ.

ಕಳೆದ ಡಿಸೆಂಬರ್‌ನಲ್ಲಿ ಮತ್ತೊಬ್ಬ ಕಳ್ಳಸಾಗಣೆದಾರ 70 ಜೀವಂತ ಗುಬ್ಬಚ್ಚಿಗಳನ್ನು ಕಳ್ಳಸಾಗಣೆ ಮಾಡುವಾಗ ಇದೇ ವಿಮಾನ ನಿಲ್ದಾಣದಲ್ಲಿ ಸಿಕ್ಕಿಬಿದ್ದಿದ್ದ.