2 ವರ್ಷದ ಮಗುವಿಗಾಗಿ ಪ್ರಾರ್ಥಿಸುತ್ತಿದೆ ಸಂಪೂರ್ಣ ರಾಷ್ಟ್ರ

ಮ್ಯಾಡ್ರಿಡ್: ಕೊಳವೆ ಬಾವಿಯಲ್ಲಿ ಪುಟ್ಟ ಮಕ್ಕಳು ಬೀಳುವುದು, ಅವರನ್ನು ರಕ್ಷಿಸಲು ಕಾರ್ಯಾಚರಣೆ ಕೈಗೊಳ್ಳುವುದು ಭಾರತದಲ್ಲಿ ಸಾಮಾನ್ಯ ದೃಶ್ಯ. ಆದರೆ ಸ್ಪೇನ್‌ನಲ್ಲಿ ನಡೆದಿರುವ ಇಂತಹ ಘಟನೆಯೊಂದು ಜಗತ್ತಿನ ಗಮನ ಸೆಳೆದಿದೆ.

ಆತ 2 ವರ್ಷದ ಪುಟ್ಟ ಬಾಲಕ. ಕಳೆದ 7 ದಿನಗಳಿಂದ 100 ಅಡಿ ಆಳದ ಕೊಳವೆ ಬಾವಿಯಲ್ಲಿ ಸಿಕ್ಕಿ ಹಾಕಿಕೊಂಡಿರುವ ಆತನಿಗಾಗಿ ಸಂಪೂರ್ಣ ರಾಷ್ಟ್ರವೇ ಕಂಬನಿ ಮಿಡಿಯುತ್ತಿದೆ. ಏನಾದರು ಪವಾಡವಾಗಲಿ, ಆತ ಜೀವಂತ ಮರಳಲಿ ಎಂದು ಎಲ್ಲರು ಕಾತರದಿಂದ ಕಾಯುತ್ತಿದ್ದಾರೆ. ಮುದ್ದು ಕಂದ ಸುರಕ್ಷಿತವಾಗಿ ಹಿಂತಿರುಗಲೆಂದು ಸ್ಪೇನ್ ವಾಸಿಗಳೆಲ್ಲ ದೇವರಲ್ಲಿ ಮೊರೆ ಇಟ್ಟಿದ್ದಾರೆ.

ದಕ್ಷಿಣ ಸ್ಪೇನ್‌ನ ಮಾಲಾಗಾ ನಗರದಲ್ಲಿ ಕಳೆದ ಶನಿವಾರ ಮಗು ಬಾವಿಯಲ್ಲಿ ಬಿದ್ದಿತ್ತು. ಆಗಲಿಂದಲೂ ರಕ್ಷಣಾ ಕಾರ್ಯಾಚರಣೆ ಜಾರಿಯಲ್ಲಿದೆ. ಪಿಕ್ನಿಕ್‌ಗೆಂದು ಹೋಗಿದ್ದ ನೇಳೆ ಬಾಲಕ ಈ ಕರಾಳ ಬಾವಿಯಲ್ಲಿ ಬೀಳುವಂತಾಯಿತು. ತಂದೆ-ತಾಯಿ ಊಟ ಮಾಡುತ್ತಿದ್ದಾಗ ಆಟವಾಡುತ್ತ ಸಾಗಿದ್ದ ಮಗು ಜೂಲಿಯನ್ ರಸೊಲೊ ಕೊಳವೆ ಬಾವಿಯಲ್ಲಿ ಬಿದ್ದು ಬಿಟ್ಟಿತ್ತು. ಅಂದಿನಿಂದಲೇ ಮಗುವಿನ ರಕ್ಷಣಾ ಕಾರ್ಯಾಚರಣೆ ಶುರುವಾಗಿದೆ. ಸುರಂಗ ಕೊರೆದು ಮಗು ಇದ್ದ ಜಾಗ ತಲುಪುವ ಪ್ರಯತ್ನ ಜಾರಿಯಲ್ಲಿದೆ.

ಜೂಲಿಯನ್ ಪೋಷಕರು ಆಘಾತದಲ್ಲಿದ್ದು ಮಗು ಜೀವಂತವಾಗಿ ಬದುಕಿ ಬರುತ್ತದೆ ಎಂಬ ನಿರೀಕ್ಷೆಯಲ್ಲಿ ಜೀವ ಹಿಡಿದಿಟ್ಟುಕೊಂಡಿದ್ದಾರೆ. 2017ರಲ್ಲಿ ಅವರ ಇನ್ನೊಂದು ಮಗು ಹೃದಯದ ಸಮಸ್ಯೆಯಿಂದ ಸಾವನ್ನಪ್ಪಿತ್ತು.