ಲಂಕಾ ಸರಣಿ ಸ್ಫೋಟ: ಮೂರು ಮಹಿಳೆಯರು ಸೇರಿದಂತೆ 6 ಶಂಕಿತರ ಫೋಟೋ ಬಿಡುಗಡೆ

ಕೊಲಂಬೋ: ಈಸ್ಟರ್‌ ಹಬ್ಬದ ಭಾನುವಾರದಂದು 300ಕ್ಕೂ ಅಧಿಕ ಮಂದಿಯನ್ನು ಬಲಿ ತೆಗೆದುಕೊಂಡ ಸರಣಿ ಬಾಂಬ್‌ ಸ್ಫೋಟಗಳ ಹಿಂದಿನ 6 ಮಂದಿ ಶಂಕಿತರ ಚಿತ್ರಗಳನ್ನು ಶ್ರೀಲಂಕಾ ಪೊಲೀಸರು ಬಿಡುಗಡೆ ಮಾಡಿದ್ದಾರೆ.

ಲಂಕಾ ಇತಿಹಾಸದಲ್ಲೇ ಅತಿದೊಡ್ಡ ಸರಣಿ ಸ್ಫೋಟ ಇದಾಗಿದ್ದು, 300ಕ್ಕೂ ಅಧಿಕ ಮಂದಿ ಮೃತಪಟ್ಟು, 500 ಹೆಚ್ಚು ಮಂದಿ ಗಾಯಗೊಂಡಿದ್ದರು. ಈ ವರೆಗೆ 76 ಶಂಕಿತ ಆರೋಪಿಗಳನ್ನು ವಶಕ್ಕೆ ಪಡೆದಿರುವ ಪೊಲೀಸರು, ಆರು ಮಂದಿಯ ಫೋಟೋ ಮತ್ತು ಹೆಸರುಗಳನ್ನು ಬಿಡುಗಡೆ ಮಾಡಿ ಅವರ ಬಂಧನಕ್ಕೆ ಸಾರ್ವಜನಿಕರ ನೆರವು ಕೋರಿದ್ದಾರೆ.

ಮೂರು ಚರ್ಚ್‌ಗಳು ಮತ್ತು ಮೂರು ಐಷಾರಾಮಿ ಹೋಟೆಲ್‌ಗಳಲ್ಲಿ ಏಪ್ರಿಲ್ 21ರಂದು 9 ಆತ್ಮಹತ್ಯಾ ಬಾಂಬರ್‌ಗಳು ಈ ಸ್ಫೋಟಗಳನ್ನು ನಡೆಸಿದ್ದು, ಸ್ಥಳೀಯ ಜಿಹಾದಿ ಗುಂಪು ನ್ಯಾಷನಲ್ ತೌಹೀದ್ ಜಮಾತ್‌ (ಎನ್‌ಟಿಜೆ) ಜತೆ ಸಂಪರ್ಕ ಹೊಂದಿರುವುದಾಗಿ ಶಂಕಿಸಲಾಗಿದೆ.


ದಾಳಿ ನಡೆದ ಮೂರು ದಿನಗಳ ಬಳಿಕ ಐಸಿಸ್ ಉಗ್ರ ಸಂಘಟನೆ ಈ ವಿಧ್ವಂಸಕ ಕೃತ್ಯದ ಹೊಣೆ ಹೊತ್ತುಕೊಂಡಿತ್ತು.

ಇಸ್ಲಾಮಿಕ್ ಉಗ್ರರು ವಿಧ್ವಂಸಕ ಕೃತ್ಯ ನಡೆಸಲಿದ್ದಾರೆ ಎಂದು ಗುಪ್ತಚರ ವರದಿಗಳು ಮೊದಲೇ ಎಚ್ಚರಿಸಿದ್ದರೂ ಲಂಕಾ ಅಧಿಕಾರಿಗಳು ಸಕಾಲದಲ್ಲಿ ಎಚ್ಚತ್ತುಕೊಳ್ಳದೆ ನಿರ್ಲಕ್ಷಿಸಿದರು ಎಂಬ ಟೀಕೆಗಳು ಕೇಳಿಬಂದಿವೆ.

ಕೆಲವು ಶಂಕಿತ ಆತ್ಮಹತ್ಯಾ ಬಾಂಬರ್‌ಗಳು ದೇಶದ ಗುಪ್ತಚರ ಸಂಸ್ಥೆಗಳ ಹದ್ದಿನಗಣ್ಣಿಗೆ ಬಿದ್ದಿದ್ದರು. ಹಾಗಿದ್ದರೂ 'ಸೂಕ್ತ ದಾಖಲೆಗಳಿಲ್ಲ ಎಂದು' ಅವರನ್ನು ಬಂಧಿಸಿರಲಿಲ್ಲ ಎಂದು ಲಂಕಾ ಪ್ರಧಾನಿ ರನಿಲ್ ವಿಕ್ರಮಸಿಂಘೆ ಸಿಎನ್‌ಎನ್‌ಗೆ ನೀಡಿದ ಸಂದರ್ಶನದಲ್ಲಿ ಬಹಿರಂಗಪಡಿಸಿದ್ದರು.

ಈ ನಡುವೆ, ಶ್ರೀಲಂಕಾ ರಕ್ಷಣಾ ಕಾರ್ಯದರ್ಶಿ ಗುರುವಾರ ರಾಜೀನಾಮೆ ನೀಡಿದ್ದಾರೆ.