ಭಾರತದ ನೆರವಿನಿಂದ ನಿರ್ಮಿತ ಮೊದಲ ಮಾದರಿ ಗ್ರಾಮ ಲಂಕಾದಲ್ಲಿ ಉದ್ಘಾಟನೆ

ಕೊಲೊಂಬೊ: ಯುದ್ಧ ಸಂತ್ರಸ್ತರು ಹಾಗೂ ಎಸ್ಟೇಟ್‌ಗಳಲ್ಲಿನ ಕಾರ್ಮಿಕರಿಗೆ ಸ್ವಂತ ಸೂರು ಕಲ್ಪಿಸುವ ಉದ್ದೇಶದಿಂದ ಭಾರತ ಧನಸಹಾಯ ಮಾಡಿದ್ದ ವಸತಿ ಯೋಜನೆ ಅಡಿಯಲ್ಲಿ ನಿರ್ಮಿತ ಮೊಟ್ಟಮೊದಲ ಮಾದರಿ ಗ್ರಾಮವನ್ನು ಶ್ರೀಲಂಕಾದಲ್ಲಿ ಉದ್ಘಾಟಿಸಲಾಯಿತು.
ವಸತಿ ಸಚಿವ ಪ್ರೇಮದಾಸ, ಮಾಜಿ ಅಧ್ಯಕ್ಷ ಚಂದ್ರಿಕಾ ಬಂದರನಾಯ್ಕೆ ಕುಮಾರತುಂಗಾ ಹಾಗೂ ಲಂಕಾದಲ್ಲಿನ ಭಾರತದ ಮಧ್ಯಂತರ ಆಯುಕ್ತ ಶಿಲ್ಪಕ್‌ ಅಂಬುಲೆ ಜಂಟಿಯಾಗಿ ಗಂಪಾಹ ಜಿಲ್ಲೆಯ ರಾಣಿದುಗಮಾದಲ್ಲಿ ಗ್ರಾಮವನ್ನು ಉದ್ಘಾಟಿಸಿದರು.
60 ಸಾವಿರ ಮಂದಿಗೆ 2400 ಮನೆಗಳನ್ನು ನಿರ್ಮಿಸಲಾಗಿದ್ದು, ಸಮಾರಂಭದಲ್ಲಿ ಫಲಾನುಭವಿಗಳಿಗೆ ಕೀ ಹಸ್ತಾಂತರಿಸಲಾಯಿತು. ಶ್ರೀಲಂಕಾದ ವಸತಿ ಹಾಗೂ ನಿರ್ಮಾಣ ಮತ್ತು ಸಾಂಸ್ಕೃತಿಕ ವ್ಯವಹಾರಗಳ ಸಚಿವಾಲಯದೊಂದಿಗೆ ಒಪ್ಪಂದ ಮಾಡಿಕೊಂಡಿರುವ ಭಾರತ, ಸುಮಾರು 100 ಮಾದರಿ ಗ್ರಾಮಗಳನ್ನು ನಿರ್ಮಿಸಲು ಒಟ್ಟು 120 ಕೋಟಿ ರೂ. ಆರ್ಥಿಕ ನೆರವು ನೀಡಲಿದೆ.
ಆರೋಗ್ಯ, ಶಿಕ್ಷಣ, ಕೌಶಲ ಅಭಿವೃದ್ಧಿ, ಮೂಲಭೂತ ಸೌಕರ್ಯ ಮತ್ತು ವೃತ್ತಿಪರ ತರಬೇತಿ ಕ್ಷೇತ್ರಗಳಲ್ಲಿ 70ಕ್ಕೂ ಹೆಚ್ಚು ಜನಪರ ಯೋಜನೆಗಳಿಗೆ ಶ್ರೀಲಂಕಾದಲ್ಲಿ ಭಾರತ ಆರ್ಥಿಕ ನೆರವು ನೀಡುತ್ತಿದೆ.