ಶಾಲೆಯಲ್ಲಿ ಚಾಕು ಇರಿತಕ್ಕೆ 7 ಶಾಲಾ ಮಕ್ಕಳು ಬಲಿ

ಬೀಜಿಂಗ್‌: ಚೀನಾದಲ್ಲಿ ಶಾನ್‌ಕ್ಸಿ ಪ್ರಾಂತ್ಯದ ಮಿಜಿ ಕೌಂಟಿಯಲ್ಲಿ ಶಾಲೆಯಿಂದ ಮನೆಗೆ ಹಿಂತಿರುಗುತ್ತಿದ್ದ ಮಾಧ್ಯಮಿಕ ಶಾಲೆಯ ಮಕ್ಕಳ ಮೇಲೆ ಚಾಕುವಿನಿಂದ ವ್ಯಕ್ತಿಯೊಬ್ಬ ದಾಳಿ ನಡೆಸಿ, ಏಳು ಜನ ಮಕ್ಕಳನ್ನು ಕೊಂದಿದ್ದಾನೆ. ದಾಳಿಯಲ್ಲಿ 12 ವಿದ್ಯಾರ್ಥಿಗಳು ಗಾಯಗೊಂಡಿದ್ದಾರೆ.

ಶುಕ್ರವಾರ ಸಂಜೆ ಸುಮಾರು 6 ಗಂಟೆ ಸುಮಾರಿಗೆ ಶಾಲೆ ಮುಗಿಸಿ ಮನೆಗೆ ಹಿಂತಿರುಗುತ್ತಿದ್ದ ವೇಳೆ ಈ ಘಟನೆ ನಡೆದಿದ್ದು, ಇರಿತಕ್ಕೆ ಒಳಗಾದ ಮಕ್ಕಳೆಲ್ಲರೂ 12ರಿಂದ 15 ವರ್ಷದ ವಯಸ್ಸಿನವರಾಗಿದ್ದಾರೆ.

ದಾಳಿ ನಡೆಸಿದ ವ್ಯಕ್ತಿಯನ್ನು ಪೊಲೀಸರು ಬಂಧಿಸಿದ್ದು, ಗಾಯಗೊಂಡ ವಿದ್ಯಾರ್ಥಿಗಳು ಸ್ಥಳೀಯ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಶಾನ್‌ಕ್ಸಿ ಪ್ರಾಂತ್ಯದ ವಾರ್ತಾ ಇಲಾಖೆ ಅಧಿಕೃತ ಮೂಲಗಳು ತಿಳಿಸಿವೆ. ಆದರೆ, ಇದು ಉಗ್ರ ಕೃತ್ಯವೇ ಎಂಬುದನ್ನು ಇಲಾಖೆ ಖಚಿತಪಡಿಸಿಲ್ಲ.

ಚೀನಾದಲ್ಲಿ ಇತ್ತೀಚಿಗೆ ಚಾಕು ದಾಳಿಗಳ ಸಂಖ್ಯೆ ಹೆಚ್ಚುತ್ತಿದ್ದು, ಕಳೆದ ಫೆಬ್ರವರಿಯಲ್ಲಿ ಜನನಿಬಿಡದ ಶಾಂಪಿಂಗ್‌ ಮಾಲ್‌ ಒಂದರಲ್ಲಿ ವ್ಯಕ್ತಿಯೊಬ್ಬ ವೈಯಕ್ತಿಕ ದ್ವೇಷದ ಹಿನ್ನೆಲೆಯಲ್ಲಿ ಮಹಿಳೆಯನ್ನು ಚಾಕುವಿನಿಂದ ಹಿರಿದು ಹತ್ಯೆ ಮಾಡಿದ್ದ. ಅವನನ್ನು ಹಿಡಿಯಲು ಹೋದವರ ಮೇಲೆ ಎರಗಿ 12 ಜನರನ್ನು ಗಾಯಗೊಳಿಸಿದ್ದ. ಈ ಘಟನೆ ಮಾಸುವ ಮುನ್ನವೇ ಅಮಾಯಕ ಮಕ್ಕಳ ಮೇಲೆ ಚಾಕು ದಾಳಿ ನಡೆದಿದೆ.

ಚೀನಾದಲ್ಲಿ ಚಾಕು ಇರಿತ ಇತಿಹಾಸ

ಜ. 2017: ಗುವಾಂಗ್‌ಕ್ಸಿ ಝವಾಂಗ್‌ ಪ್ರಾಂತ್ಯದಲ್ಲಿ 12 ಮಕ್ಕಳ ಮೇಲೆ ದಾಳಿ

ಫೆ. 2016: ಶೆನ್‌ಝಾನ್‌ನಲ್ಲಿ ಚಾಕು ದಾಳಿಗೆ 2 ಬಲಿ, 12 ಮಂದಿಗೆ ಗಾಯ

ಮಾ.2014: ಕುನ್‌ಮಿಂಗ್‌ ರೈಲು ನಿಲ್ದಾಣದಲ್ಲಿ ದಾಳಿಗೆ 35 ಬಲಿ