ಶಾಲೆಗೆ ಹೊರಟ ಚೀನಿ ಪುಟಾಣಿಗಳು: ವಿಶೇಷ ಶಿರಸ್ತ್ರಾಣ ಕಂಡು ಬೆರಗಾದ ನೆಟ್ಟಿಗರು!

ಬಿಜಿಂಗ್: ಕೊರೊನಾ ವೈರಸ್ ತನ್ನ ಜನ್ಮಸ್ಥಳ ಚೀನಾದಿಂದ ಬಹುತೇಕವಾಗಿ ಕಾಲ್ಕಿತ್ತಿದೆ. ಮಾರಕ ವೈರಾಣುವನ್ನು ಪರಿಣಾಮಕಾರಿಯಾಗಿ ಹತ್ತಿಕ್ಕಿರುವ ಚೀನಾದ ಜನಜೀವನ ಇದೀಗ ಸಾಮಾನ್ಯ ಸ್ಥಿತಿಯತ್ತ ಮರಳುತ್ತಿದೆ.

ಹಂತ ಹಂತವಾಗಿ ಜನಜೀವನವನ್ನು ಸಾಮಾನ್ಯ ಸ್ಥಿತಿಗೆ ತರುತ್ತಿರುವ ಚೀನಾ, ಒಂದೊಂದೇ ವಲಯಗಳನ್ನು ಮರುಸ್ಥಾಪಿಸುತ್ತಾ ದೈನಂದಿನ ಚಟುವಟಿಕೆಗಳನ್ನು ಆರಂಭಿಸಿದೆ. ಕೈಗಾರಿಕಾ ವಲಯ, ಉತ್ಪಾದನಾ ವಲಯದ ಬಳಿಕ ಇದೀಗ ಶಿಕ್ಷಣ ವಲಯಕ್ಕೆ ಚುರುಕು ಮುಟ್ಟಿಸಲಾಗಿದೆ.

ಅದರಂತೆ ಚೀನಾದಲ್ಲಿ ಶಾಲೆಗಳು ಮತ್ತೆ ಆರಂಭವಾಗಿದ್ದು, ದೀರ್ಘ ರಜೆಯ ಬಳಿಕ ಮಕ್ಕಳು ಶಾಲೆಯತ್ತ ಹೆಜ್ಜೆ ಹಾಕಿದ್ದಾರೆ. ಚೀನಾದ ಹಾಂಗ್ಜೋವು ಪ್ರಾಂತ್ಯದಲ್ಲಿ ಶಾಲೆಗಳನ್ನು ಪುನರ್ ಆರಂಭಿಸಲಾಗಿದ್ದು, ಮಕ್ಕಳು ತರಗತಿಗಳಿಗೆ ಹಾಜರಾಗುತ್ತಿದ್ದಾರೆ.

76 ದಿನಗಳ ಬಳಿಕ ವುಹಾನ್ ನಗರದ ಬಾಗಿಲು ತೆರೆದ ಚೀನಾ

ಆದರೆ ಶಾಲೆಗಳಲ್ಲಿ ಸಾಮಾಜಿಕ ಅಂತರವನ್ನು ಅತ್ಯಂತ ಕಟ್ಟುನಿಟ್ಟಾಗಿ ಪಾಲಿಸಲಾಗುತ್ತಿದೆ. ಮಕ್ಕಳು ಮಾಸ್ಕ್ ಧರಿಸುವುದನ್ನು ಕಡ್ಡಾಯಗೊಳಿಸಲಾಗಿದ್ದು, ಮಕ್ಕಳು ಕುಳಿತುಕೊಳ್ಳುವ ವಿಧಾನವನ್ನು ಸಂಪೂರ್ಣವಾಗಿ ಬದಲಾಯಿಸಲಾಗಿದೆ.

ಈ ಮೊದಲು ಒಬ್ಬರ ಪಕ್ಕ ಒಬ್ಬರು ಕೂರುತ್ತಿದ್ದ ಮಕ್ಕಳು, ಇದೀಗ ಒಬ್ಬರ ಹಿಂದೆ ಒಬ್ಬರು ಕೂರಬೇಕಾಗಿದ್ದು, ಸ್ಯಾನಿಟೈಸರ್ ಬಳಕೆಯನ್ನು ಶಿಕ್ಷಕರು ಹಾಗೂ ಮಕ್ಕಳಿಗೆ ಕಡ್ಡಾಯಗೊಳಿಸಲಾಗಿದೆ.


ಇಷ್ಟೇ ಅಲ್ಲದೇ ಪ್ರತಿಯೊಂದು ಮಕ್ಕಳ ತಲೆ ಮೇಲೆ ವಿಶೇಷ ಟೋಪಿ ಹಾಕಲಾಗಿದ್ದು, ಈ ಟೋಪಿಯ ಎರಡೂ ಬದಿಯಲ್ಲಿ ಉದ್ದದ ಹಾಗೂ ಸಮತಲವಾದ ಫ್ಲುಮ್ಸ್‌ಗಳನ್ನು ಜೋಡಿಸಲಾಗಿದೆ.

ಮಕ್ಕಳು ತಮ್ಮ ತಲೆಯನ್ನು ತಿರುಗಿಸುವ ಕಡೆ ಈ ಫ್ಲುಮ್ಸ್ ಕೂಡ ತಿರುಗುವುದರಿಂದ ಒಂದು ಮಗುವಿನಿಂದ ಮತ್ತೊಂದು ಮಗುವಿಗೆ ನಿರ್ದಿಷ್ಟ ಅಂತರವನ್ನು ಕಾಪಾಡಿಕೊಳ್ಳಬಹುದಾಗಿದೆ.

3 ತಿಂಗಳ ಬಳಿಕ ಮನೆಯಿಂದ ಹೊರಬಂದ ಜನ: ವುಹಾನ್ ನಗರದಾದ್ಯಂತ ಬಡಿದಾಟ!

ಸಾಂಗ್ ರಾಜವಂಶದ ಆಡಳಿತವಧಿಯಲ್ಲಿ ಈ ತರಹದ ವಿಶೇಷ ಶಿರಸ್ತ್ರಾಣಗಳನ್ನು, ಒಬ್ಬರಿಂದ ಒಬ್ಬರಿಗೆ ಅಂತರ ಕಾಯ್ದುಕೊಳ್ಳುವ ನಿಟ್ಟನಲ್ಲಿ ನ್ಯಾಯಾಲಯಗಳಲ್ಲಿ ಬಳಸಲಾಗುತ್ತಿತ್ತು ಎಂದು ಹೇಳಲಾಗಿದೆ.