ತಾಲಿಬಾನ್‌ - ಅಮೆರಿಕಾ ಐತಿಹಾಸಿಕ ಶಾಂತಿ ಒಪ್ಪಂದಕ್ಕೆ ಶನಿವಾರ ಸಹಿ

ದೋಹಾ: ಅಮೆರಿಕ ಪಡೆಗಳು ಮತ್ತು ತಾಲಿಬಾನ್‌ ಮುಖಂಡರ ಸಭೆ ಶನಿವಾರ ಕತಾರ್‌ನಲ್ಲಿ ನಡೆಯುವುದು ಬಹುತೇಕ ಖಾತ್ರಿಯಾಗಿದೆ. ಹೀಗಾಗಿ ಅಪಘಾನಿಸ್ತಾನದಲ್ಲಿ ಕಳೆದ ಎರಡು ದಶಕಗಳಿಂದ ನಡೆಯುತ್ತಿರುವ ಸಮರಕ್ಕೆ ಪೂರ್ಣ ವಿರಾಮ ಹಾಕುವ ಐತಿಹಾಸಿಕ ಶಾಂತಿ ಒಪ್ಪಂದಕ್ಕೆ ಕ್ಷಣಗಣನೆ ಆರಂಭವಾಗಿದೆ.

ಒಪ್ಪಂದದಂತೆ ತಾಲಿಬಾನ್‌ ಸಂಘಟನೆ ಉಗ್ರರೊಂದಿಗಿನ ಎಲ್ಲಾ ರೀತಿಯ ನಂಟು ಕಡಿದುಕೊಳ್ಳಬೇಕು. ಆಫ್ಘನ್‌ ಪ್ರದೇಶಗಳು ಉಗ್ರರ ತರಬೇತಿ ಕೇಂದ್ರಗಳಾಗದಂತೆ ಎಚ್ಚರಿಕೆ ವಹಿಸಬೇಕು. ಅಫಘಾನಿಸ್ತಾನದ ಸರಕಾರದೊಂದಿಗೆ ಸಂಧಾನ ಮಾತುಕತೆಯನ್ನು ನಡೆಸಿ ದೇಶದ ಅಭಿವೃದ್ಧಿಗೆ ಸಹಕರಿಸಬೇಕಾಗಿದೆ.

ಇದರ ಬದಲಿಗೆ ಅಮೆರಿಕ ಸರಕಾರ ಅಫ್ಘಾನಿಸ್ತಾನದಲ್ಲಿ ನಿಯೋಜನೆಗೊಂಡಿರುವ ತನ್ನ ಸೇನೆಯ ಪೈಕಿ 13 ಸಾವಿರ ಯೋಧರ ಸಂಖ್ಯೆಯನ್ನು 8,600ಕ್ಕೆ ತಗ್ಗಿಸಲಿದೆ. ಚುನಾವಣೆ ಹೊಸ್ತಿಲಲ್ಲಿರುವ ಅಮೆರಿಕದಲ್ಲಿ ಮತ್ತೊಮ್ಮೆ ಅಧ್ಯಕ್ಷ ಗಾದಿಗೆ ಏರುವ ತವಕದಲ್ಲಿರುವ ಡೊನಾಲ್ಡ್‌ ಟ್ರಂಪ್‌ ಅವರ ಚಾಣಾಕ್ಷ ರಾಜಕೀಯ ನಡೆಯಿದು ಎಂದು ಕೂಡ ವಿಶ್ಲೇಷಿಸಲಾಗುತ್ತಿದೆ.

ಶಾಂತಿ ಒಪ್ಪಂದಕ್ಕೆ ಸಹಿ ಬೀಳಲಿರುವ ಈ ಮಹತ್ವದ ಸಭೆಯಲ್ಲಿ ಭಾರತದ ಕತಾರ್‌ ರಾಯಭಾರಿ ಪಿ ಕುಮಾರನ್‌ ಕೂಡ ಉಪಸ್ಥಿತರಿರಲಿದ್ದಾರೆ. ರಷ್ಯಾ ಈ ಸಭೆಯನ್ನು ಆಯೋಜಿಸಿದ್ದು ತಾಲಿಬಾನ್‌ನ ಉನ್ನತ ನಿಯೋಗ, ಅಫ್ಘಾನಿಸ್ತಾನದ ಪ್ರತಿನಿಧಿಗಳು ಭಾಗವಹಿಸಲಿದ್ದಾರೆ. ಇದರ ಜೊತೆ ಚೀನಾ, ಅಮೆರಿಕಾ ಮತ್ತು ಪಾಕಿಸ್ತಾನದ ಪ್ರತಿನಿಧಿಗಳೂ ಇರಲಿದ್ದಾರೆ.