ಟ್ರಂಪ್‌ ವಿರುದ್ಧ ತಿರುಗಿಬಿದ್ದ ನೂರಕ್ಕೂ ಅಧಿಕ ಕಂಪನಿಗಳು

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಇತ್ತೀಚೆಗೆ ಮುಸ್ಲಿಂ ರಾಷ್ಟ್ರಗಳ ವಿರುದ್ಧ ಹೊರಡಿಸಿರುವ ವಲಸೆ ನಿರ್ಬಂಧಿಸಿ ಹೊರಡಿಸಿದ ನೀತಿಯನ್ನು ವಿರೋಧಿಸಿ ನೂರಕ್ಕೂ ಅಧಿಕ ಕಂಪನಿಗಳು ಟ್ರಂಪ್‌ ವಿರುದ್ಧ ತಿರುಗಿಬಿದ್ದಿವೆ.

ಟ್ರಂಪ್ ಅವರ ವಲಸೆ ನಿಷೇಧ ನೀತಿಯು ಅಮೆರಿಕಾದ ವ್ಯವಹಾರ, ಸಂಶೋಧನೆ ಹಾಗೂ ಅಭಿವೃದ್ಧಿಯ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತದೆ ಎಂದು ಆರೋಪಿಸಿ ಆ್ಯಪಲ್, ಗೂಗಲ್, ಫೇಸ್'ಬುಕ್, ಮೈಕ್ರೋಸಾಫ್ಟ್, ಇಬೇ, ಊಬರ್, ಲೆವಿ ಸ್ಟ್ರಾಸ್ ಸೇರಿದಂತೆ 100ಕ್ಕೂ ಹೆಚ್ಚು ಸಂಸ್ಥೆಗಳು ಅಮೆರಿಕ ಅಧ್ಯಕ್ಷರ ನೀತಿಯನ್ನು ವಿರೋಧಿಸಿವೆ.

ವಲಸೆ ನೀತಿಯು ದೇಶಕ್ಕೆ ಮಾರಕವಾಗಲಿದೆ. ಹಲವಾರು ಮಂದಿ ವಲಸಿಗರು ಅಮೆರಿಕಗೆ ಬಂದು ಹೊಸ ಕಂಪನಿಗಳನ್ನು ಹುಟ್ಟು ಹಾಕಿದ್ದಾರೆ. ಹಲವಾರು ಮಂದಿಗೆ ಉದ್ಯೋಗವಕಾಶ ಕಲ್ಪಿಸಿದ್ದಾರೆ ಎಂದು ಅವು ತಮ್ಮ ದೂರಿನಲ್ಲಿ ದಾಖಲಿಸಿವೆ. ಅಲ್ಲದೇ ಈ ವಿವಾದಾತ್ಮಕ ನೀತಿಯನ್ನು ಸಂಪೂರ್ಣವಾಗಿ ತಡೆ ಹಾಕಬೇಕೆಂದು ಮನವಿ ಮಾಡಿವೆ.