ಅಮೆರಿಕದಲ್ಲಿ ಅಗ್ನಿ ಅವಘಡ: ತೆಲಂಗಾಣದ ಮೂವರು ಮಕ್ಕಳ ಸಾವು

ವಾಷಿಂಗ್ಟನ್‌: ಅಮೆರಿಕದಲ್ಲಿ ಕ್ರಿಸ್‌ಮಸ್‌ಗೆ ಎರಡು ದಿನ ಮೊದಲು ಸಂಭವಿಸಿದ ಅಗ್ನಿ ಅವಘಡದಲ್ಲಿ ತೆಲಂಗಾಣದ ನಲ್ಗೊಂಡ ಜಿಲ್ಲೆಯ ಮೂವರು ಒಡಹುಟ್ಟಿದವರು ಮೃತಪಟ್ಟಿದ್ದಾರೆ.

ಮೃತರನ್ನು ಶರೋನ್‌ ನಾಯಕ್‌(14), ಜೋಯ್‌ ನಾಯಕ್‌(15) ಮತ್ತು ಅರೋನ್‌ ನಾಯಕ್‌(17) ಎಂದು ಗುರುತಿಸಲಾಗಿದೆ. ಈ ಮೂವರು ಮಿಷನರಿ ವಿದ್ಯಾರ್ಥಿಗಳಾಗಿದ್ದು, ಅವರ ತಂದೆ ಪಾಸ್ಟರ್‌ ನಾಯಕ್‌ ಮೂಲತಃ ನೆರೆಡುಗುಮ್ಮ ಮಂಡಲದ ಗುರಪ್ಪ ತಾಂಡದವರು.

ಈ ಮೂವರೊಂದಿಗೆ ಟೆನ್ನೆಸ್ಸೀಯಾದ ಮೆಮಿಧಿಸ್‌ ನಿವಾಸಿ, ಅಗ್ನಿ ದುರಂತಕ್ಕೆ ತುತ್ತಾದ ಮನೆಯ ಯಜಮಾನಿ ಕರಿ ಕೌಡ್ರಿಯೆಟ್‌(46) ಸಹ ಮೃತಪಟ್ಟಿದ್ದಾರೆ. ಕ್ರಿಸ್‌ಮಸ್‌ ರಜೆಯ ಹಿನ್ನೆಲೆಯಲ್ಲಿ ಕ್ರಿಶ್ಚಿಯನ್‌ ಮಿಷನರಿ ವತಿಯಿಂದ ಅಮೆರಿಕಗೆ ಆಗಮಿಸಿದ್ದ ಈ ಸಹೋದರ-ಸಹೋದರಿಯರು ಡೇನಿಯಲ್‌ ಕೌಡ್ರಿಯೆಟ್‌- ಕರಿ ಕೌಡ್ರಿಯೆಟ್‌ ದಂಪತಿ ಮನೆಯಲ್ಲಿ ತಂಗಿದ್ದರು.


ಮನೆಗೆ ಬೆಂಕಿ ಬೀಳುತ್ತಿದ್ದಂತೆ ಡೇನಿಯಲ್‌ ಮತ್ತು ಮಗ ಕೋಲ್‌ ಮನೆಯಿಂದ ಹೊರಗೆ ಓಡಿಬಂದರು. ಆದರೆ ಕರಿ ಮತ್ತು ಮೂವರು ಮಕ್ಕಳು ಹೊರಗೆ ಬರಲಾರದೇ ಸಜೀವದಹನವಾದರು. ಘಟನೆ ಸಂಬಂಧ ಸಂಪೂರ್ಣ ಮಾಹಿತಿ ಇನ್ನೂ ಲಭ್ಯವಾಗಿಲ್ಲ ಎಂದು ಕೊಲ್ಲಿವಿಲ್ಲೆ ಬೈಬಲ್‌ ಚರ್ಚ್‌ ತಿಳಿಸಿದೆ.

ಮಕ್ಕಳ ಪೋಷಕರು ಭಾರತದಿಂದ ಅಮೆರಿಕಕ್ಕೆ ಬರುತ್ತಿದ್ದು, ಮೃತದೇಹಗಳನ್ನು ಭಾರತಕ್ಕೆ ಕಳುಹಿಸಲು ಅಗತ್ಯ ಹಣಕಾಸಿನ ನೆರವು ನೀಡುವಂತೆ ಸಾರ್ವಜನಿಕರಿಗೆ ಚರ್ಚ್‌ ಮನವಿ ಮಾಡಿದೆ.