ವೀಸಾ ಆನ್‌ ಅರೈವಲ್‌ ಸೇವೆ ವಿಸ್ತರಿಸಿದ ಥಾಯ್ಲೆಂಡ್‌

ಬ್ಯಾಂಕಾಕ್‌: ವಿದೇಶಿ ಪ್ರವಾಸಿಗರಿಗಾಗಿ ರಿಯಾಯಿತಿ ದರದ ತ್ವರಿತ ವೀಸಾ ಆನ್‌ ಅರೈವಲ್‌ ಯೋಜನೆಯ ಅವಧಿಯನ್ನು ಏಳು ತಿಂಗಳ ಮಟ್ಟಿಗೆ ಥಾಯ್ಲೆಂಡ್‌ ಸರಕಾರ ವಿಸ್ತರಿಸಿದೆ.

ಇದರಿಂದ 2019ರ ಅಕ್ಟೋಬರ್‌ 31ರವರೆಗೆ ಭಾರತೀಯ ಪ್ರವಾಸಿಗರು ಥಾಯ್ಲೆಂಡ್‌ಗೆ ಆಗಮಿಸಿ, ಅಲ್ಲಿನ ವಿಮಾನ ನಿಲ್ದಾಣದಲ್ಲಿ ಉಚಿತವಾಗಿ ವೀಸಾ ಪಡೆಯಬಹುದಾಗಿದೆ. ಇದರಿಂದ ಪ್ರವಾಸಿಗರಿಗೆ 4,400 ರೂ. ಉಳಿತಾಯವಾಗಲಿದೆ. ಅಲ್ಲದೇ ವೀಸಾಗಾಗಿ ಗಂಟೆಗಟ್ಟಲೇ ಕ್ಯೂನಲ್ಲಿ ನಿಲ್ಲುವುದು ತಪ್ಪಲಿದೆ. ಇದಕ್ಕಾಗಿ ಪ್ರವಾಸಿಗರು ನಿರ್ಗಮನಕ್ಕೂ ಮೊದಲೇ ಆನ್‌ಲೈನ್‌ ಮೂಲಕ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು.

2018ರ ನ. 15ರಂದು ಥಾಯ್ಲೆಂಡ್‌ ಸರಕಾರ ವೀಸಾ ಆನ್‌ ಅರೈವಲ್‌ ಯೋಜನೆಯನ್ನು ಜಾರಿಗೆ ತಂದಿದ್ದು, ಈ ವರ್ಷದ ಅಕ್ಟೋಬರ್‌ ಅಂತ್ಯದವರೆಗೆ ಮುಂದುವರಿಯಲಿದೆ. ಥಾಯ್ಲೆಂಡ್‌ನ ಸುವರ್ಣಭೂಮಿ ವಿಮಾನ ನಿಲ್ದಾಣ, ಡಾನ್‌ ಮ್ಯೂಯಾಂಗ್‌, ಫುಕೆಟ್‌ ಮತ್ತು ಚಿಯಾಂಗ್‌ ಮಯ್‌ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಗಳಲ್ಲಿ ಈ ಸೇವೆ ಲಭ್ಯವಿರಲಿದೆ.