ಆಸ್ಟ್ರೇಲಿಯಾದ 50 ಡಾಲರ್‌ ನೋಟಲ್ಲಿ ಮುದ್ರಣ ದೋಷ!

ಮೆಲ್ಬೋರ್ನ್‌: ಇತ್ತೀಚೆಗೆ ಆಸ್ಪ್ರೇಲಿಯಾದಲ್ಲಿ ಚಲಾವಣೆಗೆ ಬಂದ ಹಳದಿ ಬಣ್ಣದ ಹೊಸ 50 ಡಾಲರ್‌ ನೋಟಿನಲ್ಲಿ 'ರೆಸ್ಪಾನ್ಸಿಬಿಲಿಟಿ' ಎಂಬ ಪದ ತಪ್ಪಾಗಿ ಮುದ್ರಣಗೊಂಡಿರುವುದು ಬಹಿರಂಗವಾಗಿದೆ. ನೋಟು ಬಳಕೆ ಆರಂಭಗೊಂಡ ಆರು ತಿಂಗಳ ಬಳಿಕ ಮುದ್ರಣ ದೋಷ ಪತ್ತೆ ಹಚ್ಚಲಾಗಿದೆ.

ಈ ಕುರಿತು ಜಾಲತಾಣಿಗರು ಆಸ್ಪ್ರೇಲಿಯಾದ ರಿಸರ್ವ್‌ ಬ್ಯಾಂಕ್‌ನ್ನು (ಆರ್‌ಬಿಎ) ತರಾಟೆಗೆ ತೆಗೆದುಕೊಂಡು ಅಸಮಾಧಾನ ಹೊರಹಾಕಿದ್ದಾರೆ. ಸುಮಾರು 4.6 ಕೋಟಿ ನೋಟುಗಳು ಈಗಾಗಲೇ ದೇಶದಲ್ಲಿ ಚಲಾವಣೆಯಲ್ಲಿದೆ. ಇಂಥ ಮುದ್ರಣ ತಪ್ಪಿನಿಂದಾಗಿ ನಮ್ಮ ನೋಟುಗಳು ಮೌಲ್ಯ ಕಳೆದುಕೊಂಡರೆ ಏನು ಮಾಡಬೇಕು ಎಂದು ಜನಸಾಮಾನ್ಯರು ಪ್ರಶ್ನಿಸಿದ್ದಾರೆ.

ಆಸ್ಪ್ರೇಲಿಯಾ ಸಂಸತ್ತಿಗೆ ಆಯ್ಕೆಯಾದ ಮೊದಲ ಮಹಿಳೆ ಎಡಿಥ್‌ ಕೊವನ್‌ ಚಿತ್ರವನ್ನು 50 ಡಾಲರ್‌ನ ಹೊಸ ನೋಟಿನ ಮೇಲೆ ಮುದ್ರಿಸಲಾಗಿದೆ. ಆಕೆ ಸಂಸತ್ತಿನಲ್ಲಿ ಮಾಡಿದ ಮೊದಲ ಭಾಷಣವನ್ನು ನೋಟಿನ ಒಂದು ಬದಿಯಲ್ಲಿ ಮುದ್ರಿಸಲಾಗಿದೆ. ಅದರಲ್ಲಿ ಟೈಪಿಂಗ್‌ ದೋಷ ಪತ್ತೆಯಾಗಿದೆ.

''ನೋಟು ಮೌಲ್ಯ ಕಳೆದುಕೊಳ್ಳುವುದಿಲ್ಲ. ಇನ್ಮುಂದೆ ಮುದ್ರಣಗೊಳ್ಳುವ ನೋಟುಗಳಲ್ಲಿ ದೋಷ ಸರಿಪಡಿಸಲಾಗುವುದು,'' ಎಂದು ಆರ್‌ಬಿಎ ಸ್ಪಷ್ಟನೆ ನೀಡಿದೆ.