ಬ್ರಿಟನ್‌ನ ಗ್ಲಾಸ್ಗೊದಲ್ಲಿ ಚೂರಿ ಇರಿತಕ್ಕೆ ಮೂವರು ಬಲಿ, ಶಂಕಿತನ ಹತ್ಯೆ

ಲಂಡನ್‌: ಗ್ಲಾಸ್ಗೊ ನಗರದ ಕೇಂದ್ರದಲ್ಲಿರುವ ಹೋಟೆಲ್‌ ಒಂದರ ಮೆಟ್ಟಿಲಿನ ಮೇಲೆ ಮೂವರನ್ನು ಇರಿದು ಕೊಲ್ಲಲಾಗಿದೆ. ಇದಕ್ಕೆ ಕಾರಣನಾದ ಶಂಕಿತನನ್ನು ಪೊಲೀಸರು ಗುಂಡು ಹೊಡೆದು ಹತ್ಯೆ ಮಾಡಿದ್ದಾರೆ.

ಆಗಂತುಕನನ್ನು ವಶಕ್ಕೆ ಪಡೆಯಲು ಯತ್ನಿಸಿದಾಗ ಆತ ಸ್ಕಾಟ್ಲಾಂಡ್‌ ಪೊಲೀಸರೊಬ್ಬರಿಗೂ ಚೂರಿಯಲ್ಲಿ ಇರಿದಿದ್ದಾನೆ. ವೆಸ್ಟ್‌ ಜಾರ್ಜ್‌ ಸ್ಟ್ರೀಟ್‌ನಲ್ಲಿರುವ 'ಪಾರ್ಕ್‌ ಇನ್‌' ಹೋಟೆಲ್‌ ಮುಂಭಾಗ ಈ ಘಟನೆ ನಡೆದಿದ್ದು, ಸ್ಥಳದ ಸುತ್ತಲೂ ಶಸ್ತ್ರ ಸಜ್ಜಿತ ಪೊಲೀಸರು ಬೀಡುಬಿಟ್ಟಿದ್ದಾರೆ.

ಸದ್ಯಕ್ಕೆ ಪರಿಸ್ಥಿತಿಯನ್ನು ಹತೋಟಿಗೆ ತೆಗೆದುಕೊಳ್ಳಲಾಗಿದೆ. ಅಪಾಯ ಏನೂ ಇಲ್ಲ ಎಂದು ಸ್ಕಾಟ್‌ಲ್ಯಾಂಡ್‌ ಪೊಲೀಸರು ಮಾಹಿತಿ ನೀಡಿದ್ದಾರೆ. ಆದರೆ ಈಗ ಈ ಮಾರ್ಗದಲ್ಲಿ ಯಾರೂ ಬರಬೇಡಿ ಎಂದು ಎಚ್ಚರಿಕೆ ನೀಡಿದ್ದಾರೆ.

ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಬ್ರಿಟನ್‌ ಪ್ರಧಾನಿ ಬೋರಿಸ್‌ ಜಾನ್ಸನ್, "ಗ್ಲ್ಯಾಸ್ಗೋದಲ್ಲಿ ನಡೆದ ಭೀಕರ ಘಟನೆಯಿಂದ ತೀವ್ರವಾಗಿ ದುಃಖಿತನಾಗಿದ್ದೇನೆ. ಎಲ್ಲಾ ಸಂತ್ರಸ್ತರು ಮತ್ತು ಅವರ ಕುಟುಂಬದವರ ದುಃಖದಲ್ಲಿ ನಾನೂ ಭಾಗಿಯಾಗಿದ್ದೇನೆ. ಕೆಚ್ಚೆದೆಯಿಂದ ಆಗಂತುಕನನ್ನು ಎದುರಿಸಿದ ತುರ್ತು ಸೇವೆಗಳಿಗೆ ಧನ್ಯವಾದಗಳು," ಎಂದಿದ್ದಾರೆ.

ಸ್ಥಳಕ್ಕೆ ಶಸ್ತ್ರ ಸಜ್ಜಿತ ಪೊಲೀಸರು ತೆರಳಿ, ಶಂಕಿತ ವ್ಯಕ್ತಿಯನ್ನು ಹೊಡೆದುರುಳಿಸಲಾಗಿದೆ ಎಂದು ಸ್ಕಾಟ್‌ಲ್ಯಾಂಡ್‌ ಪೊಲೀಸರು ತಿಳಿಸಿದ್ದಾರೆ. ಘಟನೆಯಲ್ಲಿ ಗಾಯಗೊಂಡ ಪೊಲೀಸ್‌ ಅಧಿಕಾರಿ ಸೇರಿ ಆರು ಜನರಿಗೆ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.