ಟ್ರಂಪ್‌ಗಿಂತ ಬಿಡೆನ್‌ ಮತದಾರರ ಹಾಟ್ ಫೇವರೀಟ್? 3 ರಾಜ್ಯಗಳ ಅಮೆರಿಕ ಅಧ್ಯಕ್ಷೀಯ ಚುನಾವಣಾ ಪೂರ್ವ ಸಮೀಕ್ಷೆ ಇಲ್ಲಿದೆ!

ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ಗಿಂತ ಡೆಮಾಕ್ರಟಿಕ್ ಅಧ್ಯಕ್ಷೀಯ ಅಭ್ಯರ್ಥಿ ಜೋ ಬಿಡೆನ್ ಇದೀಗ ಅಮೆರಿಕ ಹಾಟ್‌ ಫೇವರೀಟ್‌ ಆಗಿ ಹೊರಹೊಮ್ಮಿರುವುದು ಫಾಕ್ಸ್‌ ಟಿವಿ ನಡೆಸಿದ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯ ಪೂರ್ವ ಸಮೀಕ್ಷೆಯಲ್ಲಿ ಬಯಲಾಗಿದೆ.

ಅಮೆರಿಕದ ಒಟ್ಟು ಮೂರು ರಾಜ್ಯಗಳ ಪೈಕಿ ಎರಡರಲ್ಲಿ ಜೋ ಬಿಡೆನ್‌ ಈ ರಾಜ್ಯಗಳ ಮತದಾರರ ಆಯ್ಕೆಯಾಗಿರುವುದು ಸಮೀಕ್ಷೆಯಲ್ಲಿ ತಿಳಿದುಬಂದಿದೆ. ನೆವಾಡಾ, ಓಹಿಯೋ ಮತ್ತು ಪೆನ್ಸಿಲ್ವೇನಿಯಾ ಮತ ಕಣದ ಬಗ್ಗೆ ಸಮೀಕ್ಷೆ ನಡೆಸಿದ್ದು, ಈ ಪೈಕಿ ನೆವಾಡಾ ಹಾಗೂ ಪೆನ್ಸಿಲ್ವೇನಿಯಾದಲ್ಲಿ ಬಿಡೆನ್‌ ಮತದಾರರ ಆಯ್ಕೆಯಾಗಿರುವುದು ತಿಳಿದುಬಂದಿದೆ. ಅಲ್ಲದೆ ಓಹಿಯೋದಲ್ಲಿ ಟ್ರಂಪ್‌ ಹಾಗೂ ಬಿಡೆನ್‌ ನಡುವೆ ಭಾರೀ ಪೈಪೋಟಿ ನಡೆಯಲಿದೆ ಎಂದು ಸಮೀಕ್ಷೆಯ ವರದಿ ತಿಳಿಸಿದೆ.

ಇನ್ನುಈ ಮೂರು ರಾಜ್ಯಗಳಲ್ಲಿ ಡೊನಾಲ್ಡ್‌ ಟ್ರಂಪ್‌ ಅಧ್ಯಕ್ಷರಾಗಿ ಕೈಗೊಂಡಿರುವ ಕೆಲಸಗಳ ಬಗ್ಗೆ ಅಸಮಾಧಾನವಿದೆಯಂತೆ. ಅಲ್ಲದೇ ಸಮೀಕ್ಷೆಯಲ್ಲಿ ಟ್ರಂಪ್‌ ಕೊರೊನಾ ನಿಯಂತ್ರಣಕ್ಕೆ ಕೈಗೊಂಡ ಕಾರ್ಯಗಳ ಬಗ್ಗೆಯೂ ಅಸಮಾಧಾನ ಹೊಂದಿದ್ದಾರೆ ಎನ್ನಲಾಗಿದೆ.

ಭೂಮಿಗೆ ಅತ್ಯಂತ ಸಮೀಪದಿಂದ ಹಾದು ಹೋಗಲಿದೆ ಶಾಲಾ ಬಸ್ ಗಾತ್ರದ 2020 SW ಕ್ಷುದ್ರಗ್ರಹ!

ಹೀಗಾಗಿ ಕೊರೊನಾ ನಿಯಂತ್ರಿಸಲು ಹಾಗೂ ಮುಂದೆ ಅಮೆರಿಕದ ಚುಕ್ಕಾಣಿ ಹಿಡಿಯಲು ಬಿಡೆನ್‌ ಸರಿಯಾದ ಆಯ್ಕೆ ಎನ್ನುವುದು ಮತದಾರರ ಅಭಿಪ್ರಾಯವಾಗಿದೆ ಎಂದು ವರದಿ ತಿಳಿಸಿದೆ. ಓಹಿಯೋ ಹೊರತುಪಡಿಸಿ ನೆವಾಡಾ ಹಾಗೂ ಪೆನ್ಸಿಲ್ವೇನಿಯಾದಲ್ಲಿ ಶೇ.50ರಷ್ಟು ಮಂದಿ ಬಿಡೆನ್‌ ಬೆಂಬಲಿಸುತ್ತಿದ್ದಾರೆ.

ಇನ್ನು ಬಿಡೆನ್‌ಗೆ ಮಹಿಳೆಯರು, ಬಿಳಿ ವರ್ಣೀಯರು ಅಲ್ಲದವರು, 35 ವರ್ಷದೊಳಗಿನ ಮತದಾರರು ಮತ್ತು 65 ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನವರು ಬೆಂಬಲ ಸೂಚಿಸಿರುವುದು ಸಮೀಕ್ಷೆಯಲ್ಲಿ ತಿಳಿದುಬಂದಿದೆ. ಇನ್ನು ಕೊರೊನಾ ವೈರಸ್‌ ನಿರ್ವಹಣೆ ವಿಷಯಕ್ಕೆ ಬಂದರೆ, ಹೆಚ್ಚಿನ ಹಿರಿಯರು ಟ್ರಂಪ್‌ಗಿಂತ ಉತ್ತಮವಾದ ಕೆಲಸವನ್ನು ಬಿಡೆನ್‌ ಮಾಡುತ್ತಾರೆ ಎಂದು ನಂಬಿರುವುದು ಸಮೀಕ್ಷೆ ಹೇಳುತ್ತಿದೆ.