ಅಧಿಕಾರ ಹಸ್ತಾಂತರ ಪ್ರಕ್ರಿಯೆಗೆ ಟ್ರಂಪ್‌ ಆಪ್ತರ ಅಸಹಕಾರ

ವಾಷಿಂಗ್ಟನ್‌: ಅಧಿಕಾರ ತ್ಯಜಿಸಲು ನಿರಾಕರಿಸಿ ಹಠ ಸಾಧಿಸುತ್ತಿರುವ ಡೊನಾಲ್ಡ್‌ ಟ್ರಂಪ್‌ ಅವರ ಮನ ಒಲಿಸುವ ಹೊಣೆಗಾರಿಕೆಯು ಅಮೆರಿಕದ ಸರಕಾರಿ ಆಡಳಿತ ಸೇವೆಗಳ ಇಲಾಖೆಯ ಹೆಗಲೇರಿದೆ. ಜೋ ಬಿಡೆನ್‌ ವಿಜೇತ ಅಭ್ಯರ್ಥಿ ಎಂದು ಗುರುತಿಸಲಾಗಿದ್ದು, ಅಧಿಕಾರ ಹಸ್ತಾಂತರ ಪ್ರಕ್ರಿಯೆ ಸೋಮವಾರದಿಂದ ಶುರುವಾಗಿದೆ.

ಅಧಿಕಾರ ಹಸ್ತಾಂತರ ಪ್ರಕ್ರಿಯೆ ಅಧಿಕೃತವಾಗಿ ಟ್ರಂಪ್‌ ಕಚೇರಿಯಿಂದಲೇ ಶುರುವಾಗಬೇಕು.ಈಗ ಆಡಳಿತ ಸೇವೆಗಳ ಇಲಾಖೆ ಇದರ ಹೊಣೆ ವಹಿಸಿಕೊಂಡಿದ್ದರೂ ಟ್ರಂಪ್‌ ನಿಯೋಜಿತ ಅಧಿಕಾರಿಗಳ ತಂಡ ಅದಕ್ಕೆ ಸಹಕರಿಸದಿದ್ದರೆ ಪರಿಸ್ಥಿತಿ ಕ್ಲಿಷ್ಟಗೊಳ್ಳುತ್ತದೆ. ಈಗ ಆಗಿರುವುದೂ ಅದೇ. ಹಾಲಿ ಆಡಳಿತಾಧಿಕಾರಿ ಎಮಿಲಿ ಮರ್ಫಿ ಯಾವುದೇ ಕ್ರಮ ಕೈಗೊಳ್ಳದೇ ಕೈಕಟ್ಟಿ ಕುಳಿತಿದ್ದಾರೆ. ಇದಕ್ಕೆ ಕಾರಣ ಟ್ರಂಪ್‌ ಬಹಿರಂಗವಾಗಿ ತಮ್ಮ ಸೋಲು ಒಪ್ಪಿಕೊಳ್ಳದಿರುವುದು. ಮತ ಎಣಿಕೆಯಲ್ಲಿ ನಡೆದಿದೆ ಎನ್ನಲಾದ ಅಕ್ರಮಗಳ ಕುರಿತು ಮಾಡಿರುವ ಆರೋಪಗಳನ್ನು ಟ್ರಂಪ್‌ ಹಿಂದಕ್ಕೆ ಪಡೆದಿಲ್ಲ. ಹಲವು ರಾಜ್ಯಗಳ ಹೈಕೋರ್ಟ್‌ಗಳಲ್ಲಿಯೂ ತಕರಾರು ಅರ್ಜಿಗಳ ವಿಚಾರಣೆ ಬಾಕಿ ಇದೆ.

ಜ.20 ರಂದು ಅಧಿಕೃತವಾಗಿ ಹೊಸ ಅಧ್ಯಕ್ಷರು ಪ್ರಮಾಣ ವಚನ ಸ್ವೀಕರಿಸುತ್ತಾರಾದರೂ, ಫಲಿತಾಂಶ ಪ್ರಕಟವಾದ ತಕ್ಷಣ ಅಧಿಕಾರ ಹಸ್ತಾಂತರದ ಪ್ರಕ್ರಿಯೆ ಆರಂಭವಾಗುತ್ತದೆ. ಕೊರೊನಾ ಸೋಂಕು ನಿಯಂತ್ರಣ ಬೈಡೆನ್‌ ಅವರ ಆದ್ಯತೆಯ ವಿಷಯವಾಗಿದೆ. ಕೋವಿಡ್‌ ಸಲಹಾ ಸಮಿತಿ ರಚನೆಯೊಂದಿಗೇ ಬಿಡೆನ್‌ ತಂಡ ಕಾರ್ಯ ಆರಂಭಿಸಿದೆ.