22 ರಂದು ಟ್ರಂಪ್‌ - ಮೂನ್‌ ಭೇಟಿ

ವಾಷಿಂಗ್ಟನ್‌ : ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್‌ ಜಾಂಗ್‌ ಉನ್‌ ಅವರ ಅಮೆರಿಕ ಭೇಟಿಗೂ ಮೊದಲು ಮೇ 22ರಂದು ಶ್ವೇತಭವನದಲ್ಲಿ ದಕ್ಷಿಣ ಕೊರಿಯಾ ಅಧ್ಯಕ್ಷ ಮೂನ್‌ ಜೇ-ಇನ್‌ ಅವರನ್ನು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಭೇಟಿ ಮಾಡಿ, ಮಾತುಕತೆ ನಡೆಸಲಿದ್ದಾರೆ.

ಈ ವೇಳೆ ಇತ್ತೀಚಿನ ಭೇಟಿ ಸಮಯದಲ್ಲಿ ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್‌ ಜತೆ ನಡೆದ ಮಾತುಕತೆಯ ಕುರಿತು ಅಮೆರಿಕ ಅಧ್ಯಕ್ಷ ರಿಗೆ ಮೂನ್‌ ಮಾಹಿತಿ ನೀಡಲಿದ್ದಾರೆ.

''ಮೇ 22ರ ಅಮೆರಿಕ ಮತ್ತು ದಕ್ಷಿಣ ಕೊರಿಯಾ ಅಧ್ಯಕ್ಷರ ನಡುವಿನ ಭೇಟಿ ಉದ್ದೇಶ ಎರಡು ರಾಷ್ಟ್ರಗಳ ಸ್ನೇಹವನ್ನು ಮತ್ತಷ್ಟು ಬಲಪಡಿಸುವುದು. ಈ ಸಮಯದಲ್ಲಿ ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್‌ ಜಾಂಗ್‌ ಉನ್‌ ಅವರೊಂದಿಗೆ ನಡೆಯುವ ಮುಂದಿನ ಸಭೆ ಕುರಿತೂ ಪ್ರಸ್ತಾಪವಾಗಲಿದೆ,'' ಎಂದು ಶ್ವೇತಭವನ ಮಾಧ್ಯಮ ಕಾರ್ಯದರ್ಶಿ ಸಾರಾ ಸ್ಯಾಂಡರ್ಸ್‌ ತಿಳಿಸಿದ್ದಾರೆ.

ಕಳೆದ ವಾರ ಉತ್ತರ ಕೊರಿಯಾ ಅಧ್ಯಕ್ಷ ಕಿಮ್‌ ಜಾಂಗ್‌ ಉನ್‌ ಅವರು ಮೊದಲ ಬಾರಿಗೆ ತಮ್ಮ ದೇಶದ ಗಡಿ ದಾಟಿ ದಕ್ಷಿಣ ಕೊರಿಯಾಗೆ ಐತಿಹಾಸಿಕ ಭೇಟಿ ನೀಡಿ, ಮೂನ್‌ ಜೇ-ಇನ್‌ ಅವರೊಂದಿಗೆ ಮಾತುಕತೆ ನಡೆಸಿದ್ದರು.

ಭೇಟಿ ಸಮಯದಲ್ಲಿ ಕೊರಿಯಾ ದೇಶಗಳನ್ನು ಅಣ್ವಸ್ತ್ರ ಮುಕ್ತವಾಗಿಸುವ ಭರವಸೆ ನೀಡಿದ್ದರು. ಜತೆಗೆ ತನ್ನಲ್ಲಿರುವ ಅಣ್ವಸ್ತ್ರ ಘಟಕವನ್ನು ಮೇ ಅಂತ್ಯದೊಳಗೆ ನಾಶಪಡಿಸುವುದಾಗಿಯೂ ಘೋಷಿಸಿದ್ದರು.