ಹೌದಿ ಮೋದಿ ಬುನಾದಿ ಮೇಲೆ ವ್ಯಾಪಾರ ಒಪ್ಪಂದಕ್ಕೆ ನರೇಂದ್ರ ಮೋದಿ-ಡೊನಾಲ್ಡ್ ಟ್ರಂಪ್ ಸಹಿ?

ವಾಷಿಂಗ್ಟನ್‌: ಅಮೆರಿಕ ಉತ್ಪಾದಿಸುವ ಕೆಲವು ಸರಕುಗಳಿಗೆ ಆಮದು ಸುಂಕ ಕಡಿತ, ಪ್ರತಿಯಾಗಿ ಭಾರತದಿಂದ ರಫ್ತಾಗುವ ವಸ್ತುಗಳಿಗೆ ಅಮೆರಿಕದಲ್ಲಿ ಸುಂಕ ಕಡಿತ ಸೇರಿದಂತೆ ಮಹತ್ವದ ಒಪ್ಪಂದಗಳಿಗೆ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಭಾನುವಾರ ಸಹಿ ಹಾಕುವ ಸಾಧ್ಯತೆ ಇದೆ.

ಚೀನಾ ಜತೆಗೆ ದೀರ್ಘಕಾಲದಿಂದ ವಾಣಿಜ್ಯ ಸಮರದಲ್ಲಿನಿರತವಾಗಿರುವ ಅಮೆರಿಕಕ್ಕೆ ಭಾರತದೊಂದಿಗಿನ ಈ ಒಪ್ಪಂದದಿಂದಾಗಿ ಕೊಂಚ ನಿರಾಳತೆ ಲಭಿಸಲಿದೆ. ಹ್ಯೂಸ್ಟನ್‌ನಲ್ಲಿಭಾನುವಾರ ನಡೆಯಲಿರುವ ಬಹುನಿರೀಕ್ಷಿತ 'ಹೌದಿ ಮೋದಿ' ಕಾರ್ಯಕ್ರಮದ ನಂತರ ಮೋದಿ-ಟ್ರಂಪ್‌ ಸುಂಕ ಕಡಿತ ಒಪ್ಪಂದಗಳಿಗೆ ಸಹಿ ಹಾಕಲಿದ್ದಾರೆ. ವಿಶ್ವಸಂಸ್ಥೆ ಮಹಾಧಿವೇಶನದ ನೇಪಥ್ಯದಲ್ಲಿನಡೆಯಲಿರುವ ಭಾರತ-ಅಮೆರಿಕ ದ್ವಿಪಕ್ಷೀಯ ಸಭೆಯಲ್ಲಿಯೂ ಮಹತ್ವದ ಒಪ್ಪಂದಗಳಿಗೆ ಸಹಿ ಬೀಳಲಿದೆ ಎಂದು ಅಧಿಕೃತ ಮೂಲಗಳು ತಿಳಿಸಿವೆ.

ಅಮೆರಿಕ ಹಾಗೂ ಚೀನಾ ನಡುವಿನ ವಾರ್ಷಿಕ ವ್ಯಾಪಾರ ಮೊತ್ತ 52.47 ಲಕ್ಷ ಕೋಟಿ ರೂ. ಇದೆ. ಅಮೆರಿಕ-ಭಾರತ ನಡುವಿನ ವ್ಯಾಪಾರ ಮೊತ್ತ ಸುಮಾರು 10 ಲಕ್ಷ ಕೋಟಿ ರೂ. ಇದೆ.

ಟ್ರಂಪ್‌ ಆಗ್ರಹ ಏನಿತ್ತು?

- ಅಮೆರಿಕ ನಿರ್ಮಿತ ಹಾರ್ಲೆ ಡೇವಿಡ್‌ಸನ್‌ ಮೋಟಾರ್‌ಸೈಕಲ್‌ಗಳ ಮೇಲಿನ ಸುಂಕ ಇಳಿಕೆ

- ಅಮೆಜಾನ್‌, ವಾಲ್‌ಮಾರ್ಟ್‌ನಂಥ ಇ-ಕಾಮರ್ಸ್‌ ವಲಯದ ಕಂಪನಿಗಳಿಗೆ ಉದ್ಯಮಸ್ನೇಹಿ ನೂತನ ನೀತಿಗಳ ಜಾರಿ

- ಉಭಯ ದೇಶಗಳ ವ್ಯಾಪಾರ ಒಪ್ಪಂದಗಳಲ್ಲಿತಿದ್ದುಪಡಿ. ಈ ಹಿಂದಿನ ಒಪ್ಪಂದಗಳಿಂದ ಅಮೆರಿಕನ್ನರಿಗೆ ಭಾರಿ ಪ್ರಮಾಣದಲ್ಲಿಉದ್ಯೋಗ ನಷ್ಟ.

ಸುಂಕ ಕಡಿತಗೊಳ್ಳಬಹುದಾದ ವಲಯಗಳು

- ಅಮೆರಿಕದ ಸೇಬು, ಬಾದಾಮಿ, ಡೈರಿ ಉತ್ಪನ್ನಗಳು, ಹಂದಿ ಮಾಂಸ, ಚೆರ್ರಿ ಹಣ್ಣುಗಳು, ಹೃದಯಕ್ಕೆ ಅಳವಡಿಸಲಾಗುವ ಸ್ಟೆಂಟ್‌ ಸೇರಿದಂತೆ ಕೆಲವು ವೈದ್ಯಕೀಯ ಸಾಧನಗಳು, ಕೃಷಿ ಬಳಕೆ ಸಾಧನಗಳು, ಎಲೆಕ್ಟ್ರಾನಿಕ್‌ ಉತ್ಪನ್ನಗಳು