ಟ್ರಂಪ್‌ ವಿರುದ್ಧ ಸೆಣಸಲು ಸಿದ್ಧವೆಂದ ಭಾರತೀಯ ಮೂಲದ ತುಳಸಿ

ವಾಷಿಂಗ್ಟನ್‌: 2020ರ ಅಮೆರಿಕ ಅಧ್ಯಕ್ಷೀಯ ಚುನಾವಣೆಯಲ್ಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವಿರುದ್ಧ ಡೆಮಾಕ್ರಟಿಕ್‌ ಪಕ್ಷದ ಅಭ್ಯರ್ಥಿಯಾಗಿ ತಾವು ಸ್ಪರ್ಧಿಸುವುದಾಗಿ ಭಾರತೀಯ ಮೂಲದ ಸಂಸದೆ ತುಳಸಿ ಗಬ್ಬಾರ್ಡ್‌ ತಿಳಿಸಿದ್ದಾರೆ.

ಅಮೆರಿಕ ಕಾಂಗ್ರೆಸ್‌(ಕೆಳಮನೆ)ಗೆ ಆಯ್ಕೆಯಾದ ಪ್ರಥಮ ಹಿಂದೂ ಮಹಿಳೆ ಎಂಬ ಹಿರಿಮೆ ಹೊಂದಿರುವ ಗಬ್ಬಾರ್ಡ್‌ ನಾಲ್ಕನೇ ಬಾರಿ ಸಂಸದೆಯಾಗಿರುವ ತುಳಸಿ ಅವರು, ಈ ಸಂಬಂಧ ಇನ್ನೊಂದು ವಾರದೊಳಗೆ ಅಧಿಕೃತ ಘೋಷಣೆ ಮಾಡುವುದಾಗಿ ತಿಳಿಸಿದ್ದಾರೆ. ಡೆಮಾಕ್ರಟಿಕ್‌ ಪಕ್ಷದಿಂದ ಭಾರತೀಯ ಮೂಲದ ಕಮಲಾ ಹ್ಯಾರಿಸ್‌ ಸೇರಿದಂತೆ ಟ್ರಂಪ್‌ ವಿರುದ್ಧ ಅಖಾಡಕ್ಕೆ ಇಳಿಯಲು 12ಕ್ಕೂ ಹೆಚ್ಚು ನಾಯಕರು ಉತ್ಸಾಹ ತೋರಿಸಿದ್ದಾರೆ.

ಅಮೆರಿಕದ ಸಮಾವೊದಲ್ಲಿ 1981ರ ಏಪ್ರಿಲ್‌ 12ರಂದು ಜನಿಸಿದ ತುಳಸಿ ಅವರು, ರಾಜಕಾರಣ ಪ್ರವೇಶಿಸುವ ಮೊದಲು ಅಮೆರಿಕ ಸೇನೆಯಲ್ಲಿ ಕರ್ತವ್ಯ ನಿರ್ವಹಿಸಿದ್ದರು. ಇರಾಕ್‌ ಯುದ್ಧದಲ್ಲಿ ಪಾಲ್ಗೊಂಡಿದ್ದರು. ಡೆಮಾಕ್ರಟಿಕ್‌ ಪಕ್ಷ ದ ರಾಷ್ಟ್ರೀಯ ಸಮಿತಿಯ ಮಾಜಿ ಉಪಾಧ್ಯಕ್ಷೆಯಾಗಿರುವ ಇವರು, ಪ್ರಸ್ತುತ ಅಮೆರಿಕ ಸಶಸ್ತ್ರ ಸೇವಾ ಸಮಿತಿ ಮತ್ತು ವಿದೇಶಾಂಗ ವ್ಯವಹಾರ ಸಮಿತಿಗಳ ಸದಸ್ಯರು. ಹವಾಯಿ ಕ್ಷೇತ್ರದಿಂದ ಸತತವಾಗಿ ನಾಲ್ಕು ಬಾರಿ ಅಮೆರಿಕ ಸಂಸತ್‌ಗೆ ಆಯ್ಕೆಯಾಗಿದ್ದಾರೆ. ಇವರ ತಂದೆ ಮೈಕ್‌ ಗಬ್ಬಾರ್ಡ್‌ ಅವರು ಹವಾಯಿಯ ಸ್ಟೇಟ್‌ ಸೆನೆಟರ್‌ ಆಗಿದ್ದಾರೆ.

ನಾನು ಅಧ್ಯಕ್ಷೀಯ ಚುನಾವಣೆಯಲ್ಲಿ ಸ್ಪರ್ಧಿಸುವ ನಿರ್ಧಾರ ಕೈಗೊಂಡಿರುವ ಹಿಂದೆ ಅನೇಕ ಕಾರಣಗಳಿವೆ. ಅಮೆರಿಕದ ನಾಗರಿಕರು ಆರೋಗ್ಯ ಸಮಸ್ಯೆ, ಹವಾಮಾನ ಬದಲಾವಣೆ ಸೇರಿದಂತೆ ಅನೇಕ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ನ್ಯಾಯಾಂಗ ಕ್ಷೇತ್ರದಲ್ಲಿ ಸುಧಾರಣೆ ಆಗಬೇಕಿದೆ. ಈ ಎಲ್ಲಾ ಸಮಸ್ಯೆಗಳನ್ನು ಶೀಘ್ರವಾಗಿ ಬಗೆಹರಿಸಬೇಕಾಗಿದೆ ಎಂದು ತುಳಸಿ ಸುದ್ದಿವಾಹಿನಿಯೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.

ಅಮೆರಿಕ-ಭಾರತ ಬಾಂಧವ್ಯ ವೃದ್ಧಿಗೆ ಸದಾ ಬೆಂಬಲವಾಗಿರುವ ತುಳಸಿ ಅವರು, ಭಾರತೀಯ-ಅಮೆರಿಕನ್‌ ಸಮುದಾಯದಲ್ಲಿ ಖ್ಯಾತರಾಗಿದ್ದಾರೆ. ಒಂದು ವೇಳೆ ಅವರು ಚುನಾವಣೆಯಲ್ಲಿ ಸ್ಪರ್ಧಿಸಿ ಅಮೆರಿಕ ಅಧ್ಯಕ್ಷೆಯಾದರೆ, ಅತ್ಯಂತ ಕಿರಿಯ ವಯಸ್ಸಿನ ಹಾಗೂ ಮೊದಲ ಮಹಿಳಾ ಅಧ್ಯಕ್ಷರಾಗಲಿದ್ದಾರೆ. ಅಲ್ಲದೇ ಉನ್ನತ ಹುದ್ದೆ ಆಲಂಕರಿಸಿದ ಮೊದಲ ಕ್ರಿಶ್ಚಿಯನ್‌ಯೇತರ ಹಾಗೂ ಮೊದಲ ಹಿಂದೂ ಮಹಿಳೆಯೂ ಆಗಲಿದ್ದಾರೆ.