ಇಂಗ್ಲೆಂಡ್‌ನಲ್ಲಿ ಕೊರೊನಾ 'ಔಟ್ ಆಫ್ ಕಂಟ್ರೋಲ್': ಹಲವು ರಾಷ್ಟ್ರಗಳಿಂದ ಟ್ರಾವೆಲ್ ಬ್ಯಾನ್!

ಲಂಡನ್: ಇನ್ನೇನು ಪೈಜರ್ ಲಸಿಕೆ ಸಾರ್ವತ್ರಿಕ ಬಳಕೆಯಿಂದ ಮಾರಕ ಕೊರೊನಾ ವೈರಸ್ ಹಾವಳಿ ನಿರ್ನಾಮವಾಗಲಿದೆ ಎಂದು ನಿಟ್ಟುಸಿರು ಬಿಟ್ಟಿದ್ದ ಇಂಗ್ಲೆಂಡ್ ಜನತೆ ಇದೀಗ ಅತ್ಯಂತ ಕಠಿಣ ಲಾಕ್‌ಡೌನ್‌ನ್ನು ಎದುರಿಸಬೇಕಾದ ಅನಿವಾರ್ಯ ಪರಿಸ್ಥಿತಿ ಎದುರಾಗಿದೆ.

ಹೌದು ಇಂಗ್ಲೆಂಡ್‌ನಲ್ಲಿ ಮತ್ತೆ ಕೊರೊನಾ ವೈರಸ್ ಹಾವಳಿ ಹೆಚ್ಚಾಗಿದ್ದು, ಈ ಬಾರಿ ಹಿಂದಿಗಿಂತಲೂ ಅಧಿಕ ವೇಗವಾಗಿ ಕೊರೊನಾ ಸೋಂಕು ಪ್ರಕರಣಗಳು ಪತ್ತೆಯಾಗುತ್ತಿವೆ. ರಾಷ್ಟ್ರದಲ್ಲಿ ಕೊರೊನಾ ವೈರಸ್‌ನ ಹೊಸ ರೂಪಾಂತರ ಭಾರೀ ಅವಾಂತರ ಸೃಷ್ಟಿಸುವ ಲಕ್ಷಣಗಳು ಗೋಚರವಾಗುತ್ತಿವೆ.

ಹೆಚ್ಚುತ್ತಿರುವ ಕೊರೊನಾ ವೈರಸ್ ಪ್ರಕರಣಗಳ ಹಿನ್ನೆಲೆಯಲ್ಲಿ ಬ್ರಿಟನ್ ಸರ್ಕಾರ ಮತ್ತೆ ಕಠಿಣ ಲಾಕ್‌ಡೌನ್ ಘೋಷಣೆ ಮಾಡಿದ್ದು, ಈ ಬಾರಿ ಅತ್ಯಂತ ಕಟ್ಟುನಿಟ್ಟಿನ ಲಾಕ್‌ಡೌನ್ ಇರಲಿದೆ ಎಂದು ಘೋಷಿಸಿದೆ.

ಇಂಗ್ಲೆಂಡ್‌ನಲ್ಲಿ ಕೊರೊನಾ ಹೊಸ ರೂಪಾಂತರ ಪತ್ತೆ: ವೇಗವಾಗಿ ಹರಡುತ್ತಿರುವ ಆತಂಕ!

ಇದೇ ವೇಳೆ ಇಂಗ್ಲೆಂಡ್‌ನಲ್ಲಿ ಕೊರೊನಾ ವೈರಸ್‌ನ ಹೊಸ ರೂಪಾಂತರ ಕಂಡುಬಂದ ಹಿನ್ನೆಲೆಯಲ್ಲಿ ಹಲವು ರಾಷ್ಟ್ರಗಳು ಇಂಗ್ಲೆಂಡ್‌ಗೆ 'ಟ್ರಾವೆಲ್ ಬ್ಯಾನ್' ಘೋಷಣೆ ಮಾಡಿವೆ.

ಆಸ್ಟ್ರೀಯಾ, ಬೆಲ್ಜಿಯಂ, ಇಟಲಿ, ಐರ್ಲ್ಯಾಂಡ್ ಜರ್ಮನಿ, ಫ್ರಾನ್ಸ್ ಹಾಗೂ ನೆದರ್‌ಲ್ಯಾಂಡ್ ರಾಷ್ಟ್ರಗಳು, ಇಂಗ್ಲೆಂಡ್‌ಗೆ ತಮ್ಮ ಅಂತಾರಾಷ್ಟ್ರೀಯ ವಿಮಾನ ಸೇವೆಯನ್ನು ರದ್ದುಗೊಳಿಸಿವೆ. ಡಿ.31ರವರೆಗೆ ಇಂಗ್ಲೆಂಡ್‌ಗೆ ವಿಮಾನ ಸೇವೆ ಇರುವುದಿಲ್ಲ ಎಂದು ಈ ರಾಷ್ಟ್ರಗಳು ಸ್ಪಷ್ಟಪಡಿಸಿವೆ.

ಇನ್ನು ಇಸ್ರೇಲ್, ಸೌದಿ ಅರೇಬಿಯಾ ಹಾಗೂ ಟರ್ಕಿ ಕೂಡ ಇಂಗ್ಲೆಂಡ್‌ಗೆ ತಾತ್ಕಾಲಿಕವಾಗಿ ತಮ್ಮ ಅಂತಾರಾಷ್ಟ್ರೀಯ ವಿಮಾನ ಸೇವೆಯನ್ನು ರದ್ದುಗೊಳಿಸಿವೆ.

ಮುಂದಿನ ವಾರದಿಂದಲೇ ಬ್ರಿಟನ್‌ನ ಎಲ್ಲಾ ನಾಗರಿಕರಿಗೆ ಕೊರೊನಾ ಲಸಿಕೆ: ಫೈಜರ್‌ಗೆ ಜೈ ಎಂದ ಮೊದಲ ರಾಷ್ಟ್ರ!

ಇಂಗ್ಲೆಂಡ್‌ನಲ್ಲಿ ಅತ್ಯಂತ ವೇಗವಾಗಿ ಹರಡುತ್ತಿರುವ ಕೊರೊನಾ ವೈರಸ್‌ನ ಹೊಸ ರೂಪಾಂತರ ಬಗ್ಗೆ ಮಾತನಾಡಿರುವ ಆರೋಗ್ಯ ಕಾರ್ಯದರ್ಶಿ ಮ್ಯಾಟ್ ಹ್ಯಾನ್‌ಕಾಕ್, ಹೊಸ ರೂಪಾಂತರ ಸಂಪೂರ್ಣವಾಗಿ ನಿಯಂತ್ರಣ ತಪ್ಪಿದೆ ಎಂದು ಹೇಳಿದ್ದಾರೆ. ಮ್ಯಾಟ್ ಹ್ಯಾನ್‌ಕಾಕ್ ಅವರ ಔಟ್ ಆಫ್ ಕಂಟ್ರೋಲ್ ಹೇಳಿಕೆ ಇಂಗ್ಲೆಂಡ್ ಜನತೆಯಲ್ಲಿ ಆತಂಕ ಸೃಷ್ಟಿಸಿದೆ.

ಮಾರಕ ಕೊರೊನಾ ವೈರಸ್‌ನ ಹೊಸ ರೂಪಾಂತರದೊಂದಿಗೆ ನಾವು ಇದೀಗ ಹೋರಾಡಬೇಕಿದ್ದು, ಕಠಿಣ ಲಾಕ್‌ಡೌನ್ ಒಂದೇ ಇದಕ್ಕೆ ದಾರಿ ಎಂದು ಮ್ಯಾಟ್ ಹ್ಯಾನ್‌ಕಾಕ್ ಅಭಿಪ್ರಾಯಪಟ್ಟಿದ್ದಾರೆ.

ಕೇವಲ ಇಂಗ್ಲೆಂಡ್ ಮಾತ್ರವಲ್ಲದೇ ಆಸ್ಟ್ರೀಯಾ, ಡೆನ್ಮಾರ್ಕ್ ಹಾಗೂ ನೆದರ್‌ಲ್ಯಾಂಡ್‌ಗಳಲ್ಲೂ ಕೊರೊನಾ ವೈರಸ್‌ನ ಹೊಸ ರೂಪಾಂತರ ಕಂಡುಬಂದಿದ್ದು, ಯೂರೋಪ್ ಇದೀಗ ಮತ್ತೊಮ್ಮೆ ಮಾರಕ ವೈರಾಣುವಿನ ಸುಳಿಯಲ್ಲಿ ಸಿಲುಕುವ ಆತಂಕ ಎದುರಾಗಿದೆ.