ಭಾರತದ ಜತೆಗಿನ ಸಂಬಂಧ ಬಲವರ್ಧನೆಗೆ ಲಂಡನ್‌ ಆತುರ

ಲಂಡನ್‌: ಭಾರತದ ಜತೆ ಉತ್ತಮ ಸಂಬಂಧ ಹೊಂದಿದ್ದರೂ ಜಾಗತಿಕ ಮಟ್ಟದಲ್ಲಿ ಆ ರಾಷ್ಟ್ರದ ಪ್ರಭಾವ ಹಾಗೂ ಶಕ್ತಿಯ ಜತೆ ಹೊಂದಾಣಿಕೆಯಾಗುವ ಕಾರ್ಯತಂತ್ರಗಳನ್ನು ರೂಪಿಸಿ ಅನುಷ್ಠಾನಗೊಳಿಸುವಲ್ಲಿ ತಾನು ವಿಫಲಗೊಂಡಿರುವುದಾಗಿ ಇಂಗ್ಲೆಂಡ್‌ ಹಳಹಳಿಸಿದೆ.
ಇಂಗ್ಲೆಂಡ್‌ ಸಂಸತ್ತಿನಲ್ಲಿ ಇದೇ ಮೊದಲ ಬಾರಿ ನಡೆದ 'ಭಾರತದ ದಿನ' ಕಾರ್ಯಕ್ರಮದ ವೇಳೆ ಬಿಡುಗಡೆಯಾದ 'ಬಿಲ್ಡಿಂಗ್‌ ಬ್ರಿಡ್ಜೆಸ್‌: ಅವೇಕನಿಂಗ್‌ ಯುಕೆ-ಇಂಡಿಯಾ ಟೈಸ್‌' ಎನ್ನುವ ವರದಿಯಲ್ಲಿ ಈ ಕುರಿತು ವಿವರಿಸಲಾಗಿದೆ.
''ಜಾಗತಿಕ ಮಟ್ಟದಲ್ಲಿ ಭಾರತ ಪ್ರಭಾವಶಾಲಿ ರಾಷ್ಟ್ರವಾಗಿ ಬೆಳೆಯುತ್ತಿದೆ. ಆ ದೇಶದೊಂದಿಗೆ ಸಂಬಂಧ ಬಲಪಡಿಸುವುದರಿಂದ ಇಂಗ್ಲೆಂಡಿಗೆ ಅನೇಕ ರೀತಿಯ ಅನುಕೂಲಗಳಿವೆ. ಭಾರತೀಯ ಪ್ರವಾಸಿರು, ವಿದ್ಯಾರ್ಥಿಗಳಿಗೆ ನೀಡುವ ವೀಸಾ ನಿಯಮವನ್ನು ಸರಳಗೊಳಿಸಿ ಸಂಬಂಧ ಬಲವರ್ಧನೆಗೆ ಪ್ರಯತ್ನಿಸಬೇಕು. ವಲಸೆ ನೀತಿಯಲ್ಲಿಯೂ ಸುಧಾರಣೆ ತರಬೇಕಿದೆ. ಈ ದಿಸೆಯಲ್ಲಿ ಇದುವರೆಗಿನ ಸರಕಾರ ಗಂಭೀರ ಪ್ರಯತ್ನ ಮಾಡೇ ಇಲ್ಲ,'' ಎಂದು ವರದಿಯಲ್ಲಿ ವಿವರಿಸಲಾಗಿದೆ.
ಬೇರೆ ದೇಶಗಳು ಭಾರತದ ಜತೆ ಸಂಬಂಧ ಬಲಪಡಿಸಲು ಪೈಪೋಟಿ ನಡೆಸಿರುವಾಗ ಇಂಗ್ಲೆಂಡ್‌ ಹಿಂದೆ ಉಳಿದಿರುವುದು ಸರಿಯಲ್ಲ ಎಂದು ವರದಿ ಆಕ್ಷೇಪಿಸಿದೆ.