ಹೈಡ್ರಾಕ್ಸಿಕ್ಲೋರೊಕ್ವಿನ್‌ ಬಳಕೆಗೆ ನಿಷೇಧ ಹೇರಿದ ಬ್ರಿಟನ್‌ ಸರಕಾರ!

ಮಲೇರಿಯಾ ನಿಯಂತ್ರಣಕ್ಕೆ ಬಳಸುವ ಹೈಡ್ರಾಕ್ಸಿಕ್ಲೋರೊಕ್ವಿನ್‌ (ಎಚ್‌ಸಿಕ್ಯೂ) ಬಳಕೆ ನಿಲ್ಲಿಸುವಂತೆ ಬ್ರಿಟನ್‌ ಸರಕಾರ ಆಸ್ಪತ್ರೆಗಳಿಗೆ ಸೂಚನೆ ನೀಡಿದೆ. ''ಕೊರೊನಾ ಸೋಂಕನ್ನು ಆರಂಭಿಕ ಹಂತದಲ್ಲಿಯೇ ನಿಯಂತ್ರಿಸುವಲ್ಲಿಎಚ್‌ಸಿಕ್ಯೂ ಸಹಕಾರಿ. ಆದರೆ ಆಸ್ಪತ್ರೆಯಲ್ಲಿ ದಾಖಲಾಗಿರುವ ರೋಗಿಗಳಲ್ಲಿಇದರ ಬಳಕೆಯಿಂದ ಉಪಯೋಗಕ್ಕಿಂತ ಅನಾಹುತವಾಗುವ ಸಾಧ್ಯತೆಯೇ ಹೆಚ್ಚು.

ಹೃದಯದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿ ಸಾವು ಸಹ ಸಂಭವಿಸುವ ಸಾಧ್ಯತೆ ಇರುತ್ತದೆ. ಹೀಗಾಗಿ ಆಸ್ಪತ್ರೆಗಳಲ್ಲಿಎಚ್‌ಸಿಕ್ಯೂ ಬಳಕೆ ನಿಲ್ಲಿಸುವಂತೆ ಔಷಧಗಳು ಮತ್ತು ಆರೋಗ್ಯ ಸೇವೆ ಉತ್ಪನ್ನಗಳ ನಿಯಂತ್ರಣ ಪ್ರಾಧಿಕಾರ ಸೂಚನೆ ನೀಡಿದೆ,'' ಎಂದು ಬ್ರಿಟನ್‌ ತುರ್ತು ವೈದ್ಯಕೀಯ ಸೇವೆಗಳ ಸಲಹೆಗಾರ ಡಾ.ನೀರಜ್‌ ಪಟೇಲ್‌ ತಿಳಿಸಿದ್ದಾರೆ.

ಕರ್ನಾಟಕದವರಾಗಿರುವ ಡಾ.ನೀರಜ್‌ ಅವರು ಸದ್ಯ ಕೊರೊನಾ ರೋಗಿಗಳ ಚಿಕಿತ್ಸೆಯಲ್ಲಿ ತೊಡಗಿಕೊಂಡಿದ್ದಾರೆ. ವಿಶ್ವ ಆರೋಗ್ಯ ಸಂಸ್ಥೆಯೂ ಎಚ್‌ಸಿಕ್ಯೂ ಬಳಕೆಗೆ ತಾತ್ಕಾಲಿಕ ತಡೆ ನೀಡಿದೆ.

ಭಾರತದಲ್ಲಿ ಬಳಕೆ!
ಹೈಡ್ರಾಕ್ಷಿಕ್ಲೊರಿಕ್ವಿನ್ ಮಾತ್ರೆಯ ಬಳಕೆಯಿಂದ ಯಾವುದೇ ಅಡ್ಡ ಪರಿಣಾಮಗಳಿಲ್ಲ. ಭಾರತದಲ್ಲಿ ಕೊರೊನಾ ನಿಯಂತ್ರಣಕ್ಕಾಗಿ ಹೈಡ್ರಾಕ್ಷಿಕ್ಲೊರೋಕ್ವಿನ್‌ ಬಳಕೆಯನ್ನು ಮುಂದುವರೆಸುತ್ತೇವೆ ಎಂದು ಭಾರತೀಯ ವೈದ್ಯಕೀಯ ಸಂಶೋಧನಾ ಸಂಸ್ಥೆ ತಿಳಿಸಿದೆ.

ಆರೋಗ್ಯದ ಸುರಕ್ಷತಾ ದೃಷ್ಟಿಯಿಂದ ಜಾಗತಿಕ ವರದಿಯನ್ನಾಧರಿಸಿ ವಿಶ್ವ ಆರೋಗ್ಯ ಸಂಸ್ಥೆ ಹೈಡ್ರಾಕ್ಷಿಕ್ಲೊರೋಕ್ವಿನ್‌ ಮಾತ್ರೆಯನ್ನು ಕೊರೊನಾ ರೋಗಿಗಳಿಗೆ ಬಳಸುವುದನ್ನು ತಾತ್ಕಾಲಿಕವಾಗಿ ನಿಷೇಧಿಸಿದ ಬೆನ್ನಲ್ಲಿಯೇ ಐಸಿಎಂಆರ್‌ನಿಂದ ಈ ಹೇಳಿಕೆ ಹೊರಬಿದ್ದಿದೆ.