ವಿಜಯ್‌ ಮಲ್ಯ ಅವರ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳಲು ಯುಕೆ ಹೈಕೋರ್ಟ್‌ ಅನುಮತಿ

ಲಂಡನ್‌ : ವಿವಿಧ ಬ್ಯಾಂಕ್‌ಗಳಲ್ಲಿ ಸಾಲ ಮಾಡಿ ವಿದೇಶದಲ್ಲಿ ತಲೆ ಮರೆಸಿಕೊಂಡಿರುವ ವಿಜಯ್‌ ಮಲ್ಯಗೆ ಲಂಡನ್ ನ ಹೈಕೋರ್ಟ್‌ ಶಾಕ್‌ ಕೊಟ್ಟಿದೆ. ಲಂಡನ್‌ನಲ್ಲಿರುವ ವಿಜಯ್‌ ಮಲ್ಯ ಅವರ ಆಸ್ತಿಯನ್ನು ಮುಟ್ಟುಗೋಲು ಹಾಕಲು ಅನುಮತಿ ನೀಡಿದೆ.

ಲಂಡನ್‌ನ ಹರ್ಟ್ಫೋಡ್‌ ಶೈರ್‌ ನಲ್ಲಿನ ವಿಜಯ್‌ ಮಲ್ಯ ಆಸ್ತಿಗಳು, ತೆವಿನ್‌ನಲ್ಲಿನ ಬ್ರಾಂಬಲ್‌ ಹಾಗೂ ಲೇಡೀವಾಕ್‌ ಲಾಡ್ಜ್‌, ಪ್ರಸ್ತುತ ಮಲ್ಯ ನೆಲೆಸಿರುವ ವೆಲ್ವಿನ್‌ನ್ನು ವಶಪಡಿಸಿಕೊಳ್ಳಲು ಅನುಮತಿ ನೀಡಿದೆ. ಹಾಗೆಂದು ಕೋರ್ಟ್‌ ಬ್ಯಾಂಕ್‌ಗಳಿಗೆ ಈಗಲೇ ಆಸ್ತಿಗಳನ್ನು ವಶಪಡಿಸಿಕೊಳ್ಳುವಂತೆ ಆದೇಶ ನೀಡಿಲ್ಲ. ಬದಲಾಗಿ ಮಲ್ಯ ಅವರು ಸಾಲ ಮರುಪಾವತಿ ಮಾಡದೇ ಹೋದಲ್ಲಿ ಈ ಆಸ್ತಿಗಳನ್ನು ಬ್ಯಾಂಕ್‌ಗಳು ಬಳಸಿಕೊಳ್ಳಬಹುದು ಎಂದಿದೆ.

ಲೇಡಿವಾಕ್‌, ಕ್ವೀನ್‌ ಹೂ ಲೇನ್‌, ತೆವಿನ್‌, ವೆಲ್ವಿನ್‌ ಹಾಗೂ ಬ್ರಾಂಬಲ್‌ ಲಾಡ್ಜ್‌, ಕ್ವೀನ್‌ ಹೂ ಲೇನ್‌ ಸೇರಿದಂತೆ ಇವುಗಳ ಹೊರವಲಯದಲ್ಲಿರುವ ಕಟ್ಟಡಗಳನ್ನೂ ವಶಪಡಿಸಿಕೊಳ್ಳಲು ಹೈಕೋರ್ಟ್‌ ಎನ್‌ಫೋರ್ಸ್‌ಮೆಂಟ್‌ ಅಧಿಕಾರಿಗಳಿಗೆ ಅನುಮತಿ ಇದೆ ಎಂದು ನ್ಯಾಯಮೂರ್ತಿ ಬ್ಯಾರನ್‌ ಹೇಳಿದ್ದಾರೆ.

ಲಂಡನ್‌ ಹೈಕೋರ್ಟ್‌ನ ಈ ಆದೇಶದಿಂದ ಭಾರತದ 13 ಬ್ಯಾಂಕ್‌ಗಳಿಗೆ ಮೇಲುಗೈ ಸಾಧಿಸಿದಂತಾಗಿದೆ. ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಬ್ಯಾಂಕ್‌ ಆಫ್‌ ಬರೋಡ, ಕಾರ್ಪೋರೇಷನ್‌ ಬ್ಯಾಂಕ್‌, ಫೆಡರಲ್‌ ಬ್ಯಾಂಲಕ್‌, ಇಂಡಿಯನ್‌ ಓವರ್‌ಸೀಸ್‌ ಬ್ಯಾಂಕ್‌, ಜಮ್ಮು ಮತ್ತು ಕಾಶ್ಮೀರ್‌ ಬ್ಯಾಂಕ್‌, ಪಂಜಾಬ್‌ ಮತ್ತಯ ಸಿಂದ್‌ ಬ್ಯಾಂಕ್‌, ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌, ಯುನೈಟೆಡ್‌ ಬ್ಯಾಂಕ್‌ ಆಫ್‌ ಇಂಡಿಯಾ, ಜೆಎಂ ಫೈನಾಶ್ಶಿಯಲ್‌ ಅಸಿಸ್ಟ್‌ ರಿ ಕನ್‌ಸ್ಟ್ರಕ್ಷನ್‌ ಕಂ.ಪ್ರೈ.ಲಿ.ಗಳು ಇಂಗ್ಲೆಂಡ್‌ನಲ್ಲಿರುವ ಮಲ್ಯ ಆಸ್ತಿಯನ್ನು ಮುಟ್ಟುಗೋಲು ಹಾಕಲು ಅವಕಾಶ ಸಿಗಲಿದೆ.

ಏತನ್ಮಧ್ಯೆ ಲಂಡನ್‌ ಹೈಕೋರ್ಟ್‌ ಆದೇಶವನ್ನು ಮರುಪರಿಶೀಲಿಸುವಂತೆ ವಿಜಯ್‌ ಮಲ್ಯ ಅರ್ಜಿ ಸಲ್ಲಿಸಿದ್ದು, ವಿಚಾರಣೆ ಬಾಕಿ ಇದೆ.