ಬ್ರಿಟನ್‌ನ ಸುಲಭ ವೀಸಾ ಪಟ್ಟಿಯಿಂದ ಭಾರತೀಯ ವಿದ್ಯಾರ್ಥಿಗಳು ಹೊರಕ್ಕೆ

ಲಂಡನ್‌: ಅಕ್ರಮ ವಲಸಿಗರ ವಾಪಸಾತಿಯ ಕುರಿತ ತಿಳುವಳಿಕೆ ಒಪ್ಪಂದಕ್ಕೆ ಸಹಿ ಹಾಕಲು ನಿರಾಕರಿಸಿದ ಭಾರತದ ವಿರುದ್ಧ ಬ್ರಿಟನ್‌ ಮುಯ್ಯಿ ತೀರಿಸಿಕೊಂಡಿದೆ. ಸುಲಭವಾಗಿ ವೀಸಾ ನೀಡುವ ದೇಶಗಳ ಪಟ್ಟಿಯಿಂದ ಭಾರತೀಯ ವಿದ್ಯಾರ್ಥಿಗಳನ್ನು ಬ್ರಿಟನ್‌ ಸರಕಾರ ಹೊರಗಿಟ್ಟಿದೆ.

ಭಾರತೀಯ ಅಕ್ರಮ ವಲಸಿಗರ ಸಮಸ್ಯೆಯು ಬಗೆಹರಿಯದೆ ಉಳಿದಿದೆ. ಹೀಗಾಗಿಯೇ ವಿದೇಶಿ ವಿದ್ಯಾರ್ಥಿಗಳಿಗೆ ಸುಲಭವಾಗಿ ವೀಸಾ ನೀಡುವ ದೇಶಗಳ ಪಟ್ಟಿಯಿಂದ ಭಾರತವನ್ನು ಹೊರಕ್ಕೆ ಇಡಲಾಗಿದೆ ಎಂದು ಬ್ರಿಟನ್‌ನ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ಕಾರ್ಯದರ್ಶಿ ಲಿಯಾಮ್‌ ಫಾಕ್ಸ್‌ ತಿಳಿಸಿದ್ದಾರೆ. ''ಸುಲಭವಾದ ಮಾನದಂಡಗಳಿಗೆ ಯಾವಾಗಲೂ ಬೇಡಿಕೆಯಿದೆ. ಆದರೆ ಅಕ್ರಮ ವಲಸಿಗರ ಸಮಸ್ಯೆಯನ್ನು ಪರಿಹರಿಸದೇ ನಾವು ಆ ನಿಟ್ಟಿನಲ್ಲಿ ಕಾರ್ಯನಿರ್ವಹಿಸಲು ಸಾಧ್ಯವಿಲ್ಲ,'' ಎಂದೂ ಅವರು ಹೇಳಿದ್ದಾರೆ.

ದಾಖಲೆಗಳಿಲ್ಲದ ವಲಸೆಗಾರರ ಹಿನ್ನೆಲೆಯನ್ನು ಪರಿಶೀಲಿಸಲು ಭಾರತೀಯ ಸಂಸ್ಥೆಗಳಿಗೆ ಕೇವಲ 15 ದಿನಗಳ ಕಾಲಾವಕಾಶವನ್ನು ಬ್ರಿಟನ್‌ ನೀಡಿತ್ತು. ಹೀಗಾಗಿ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ ಸಲ್ಲಿಸಿದ್ದ ವರದಿಗೆ ಸಹಿ ಹಾಕಲು ಭಾರತ ನಿರಾಕರಿಸಿದೆ.