ಮಾತ್ರೆ ಎಫೆಕ್ಟ್: ಭಾರತಕ್ಕೆ ಭಾರೀ ಪ್ರಮಾಣದಲ್ಲಿ ಕ್ಷಿಪಣಿ ಪೂರೈಕೆಗೆ ಟ್ರಂಪ್ ಒಪ್ಪಿಗೆ!

ವಾಷಿಂಗ್ಟನ್: ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ 'ಅಸಾಧಾರಣ ಸಮಯದಲ್ಲಿ ನೈಜ ಗೆಳೆಯರ ನಡುವೆ ಇನ್ನೂ ಹೆಚ್ಚಿನ ಸಹಕಾರದ ಅಗತ್ಯವಿರುತ್ತದೆ' ಎಂದು ಹೇಳುವ ಮೂಲಕ ಹೈಡ್ರಾಕ್ಸಿಕ್ಲೋರೋಕ್ವಿನ್ ಮಾತ್ರೆಗಳನ್ನು ಕಳುಹಿಸಿದ ಭಾರತಕ್ಕೆ ಧನ್ಯವಾದ ಅರ್ಪಿಸಿದ್ದರು.

ಅಲ್ಲದೇ ಸಂಕಷ್ಟದ ಸಮಯದಲ್ಲಿ ನಮಗೆ ನೆರವಾದ ಭಾರತದ ಸಹಾಯವನ್ನು ಅಮೆರಿಕೆ ಎಂದಿಗೂ ಮರೆಯುವುದಿಲ್ಲ ಎಂದೂ ಟ್ರಂಪ್ ಭರವಸೆ ನೀಡಿದ್ದರು. ಅದರಂತೆ ತಮ್ಮ ಮಾತಿಗೆ ತಕ್ಕಂತೆ ನಡೆದುಕೊಳ್ಳುವ ಅವಕಾಶವೊಂದನ್ನು ಟ್ರಂಪ್ ಇದೀಗ ಸದ್ಬಳಕೆ ಮಾಡಿಕೊಂಡಿದ್ದಾರೆ.

ಬಹುದಿನಗಳಿಂದ ಬಾಕಿ ಉಳಿದಿದ್ದ ಅಮೆರಿಕ-ಭಾರತ ನಡುವಿನ ಶಸ್ತ್ರಾಸ್ತ್ರ ಒಪ್ಪಂದವೊಂದಕ್ಕೆ ಹಸಿರು ನಿಶಾನೆ ತೋರಿರುವ ಟ್ರಂಪ್, ಈ ಮೂಲಕ ತಮ್ಮ ಗೆಳೆತನದ ಪ್ರದರ್ಶನಕ್ಕೆ ಮುಂದಾಗಿದ್ದಾರೆ.

ಭಾರತವನ್ನು ಎಂದಿಗೂ ಮರೆಯಲ್ಲ: ಕೊರೊನಾ ಲಸಿಕೆ ಹಂಚಿಕೆಯ ಪರೋಕ್ಷ ಸುಳಿವು ಕೊಟ್ಟ ಟ್ರಂಪ್?

ಹೌದು, ಭಾರತಕ್ಕೆ 10 AGM-84L ಹಾರ್ಪೂನ್ ಬ್ಲಾಕ್ II ಕ್ಷಿಪಣಿ ಹಾಗೂ 16 MK 54 ಟೋರ್ಪಿಡೋಗಳ ಮಾರಾಟಕ್ಕೆ ಟ್ರಂಪ್ ಸರ್ಕಾರ ಸಮ್ಮತಿ ಸೂಚಿಸಿದೆ. ಈ ಮೂಲಕ ಭಾರತ-ಅಮೆರಿಕ ನಡುವಿನ ಒಟ್ಟು 155 ಮಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ ಶಸ್ತ್ರಾಸ್ತ್ರ ಒಪ್ಪಂದ ಇದೀಗ ಜಾರಿಯಾಗಿದೆ.

ಈ ಕುರಿತು ಮಾಹಿತಿ ನೀಡಿರುವ ಅಮೆರಿಕದ ರಕ್ಷಣಾ ಭದ್ರತಾ ಸಹಕಾರ ಆಯೋಗ, ಭಾರತಕ್ಕೆ 92 ಮಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ 10 AGM-84L ಹಾರ್ಪೂನ್ ಬ್ಲಾಕ್ II ಕ್ಷಿಪಣಿ ಹಾಗೂ 63 ಮಿಲಿಯನ್ ಅಮೆರಿಕನ್ ಡಾಲರ್ ಮೌಲ್ಯದ 16 MK 54 ಟೋರ್ಪಿಡೋಗಳ ಮಾರಾಟಕ್ಕೆ ಅಮೆರಿಕ ಕಾಂಗ್ರೆಸ್ ಸಹಮತ ಸೂಚಿಸಿದೆ ಎಂದು ಸ್ಪಷ್ಟಪಡಿಸಿದೆ.

ಬೋಯಿಂಗ್ ಅಭಿವೃದ್ಧಿಪಡಿಸಿರುವ 10 AGM-84L ಹಾರ್ಪೂನ್ ಬ್ಲಾಕ್ ಕ್ಷಿಪಣಿಗಳನ್ನು ಸಮುದ್ರ ಕಾರ್ಯಾಚರಣೆಗಳ ಸಂದರ್ಭದಲ್ಲಿ ಪಿ-81 ಯುದ್ಧ ವಿಮಾನಗಳಲ್ಲಿ ಬಳಸಬಹುದಾಗಿದೆ. ಅದರಂತೆ ರೇಥಿಯಾನ್ ಅಭಿವೃದ್ಧಿಪಡಿಸಿರುವ 16 MK 54 ಟೋರ್ಪಿಡೋಗಳನ್ನು ಬಹುದೂರದ ಗುರಿಯನ್ನು ತಲುಪಲು ಯುದ್ಧ ಹಡಗಿನಲ್ಲಿ ಬಳಸಬಹುದಾಗಿದೆ.

'ಮೋದಿ ಈಸ್ ಗ್ರೇಟ್': ಮಾತ್ರೆ ಬರುತ್ತೆ ಅಂತ ಗೊತ್ತಾದ ಮೇಲೆ ಟ್ರಂಪ್ ಅವರಿಂದ ಹೊಗಳಿಕೆಯ ಮಾತು!

ಒಟ್ಟಿನಲ್ಲಿ ಕೊರೊನಾ ವೈರಸ್ ದಾಳಿಯ ನಡುವೆಯೂ ಅಮೆರಿಕ-ಭಾರತದ ನಡುವಿನ ಈ ಶಸ್ತ್ರಾಸ್ತ್ರ ಒಪ್ಪಂದ ಇಡೀ ವಿಶ್ವದ ಗಮನ ಸೆಳೆದಿದ್ದು, ಪ್ರಮುಖವಾಗಿ ಈ ಒಪ್ಪಂದದಿಂದಾಗಿ ಪಾಕಿಸ್ತಾನಕ್ಕೆ ನಡುಕ ಹುಟ್ಟಿದ್ದರೆ ಆಶ್ಚರ್ಯವಿಲ್ಲ.