ಭಾರತಕ್ಕೆ ಸಶಸ್ತ್ರ ಡ್ರೋನ್‌ ಮಾರಾಟಕ್ಕೆ ಅಮೆರಿಕ ಸಮ್ಮತಿ

ವಾಷಿಂಗ್ಟನ್‌: ಮಿಲಿಟರಿ ಕಾರ್ಯಾಚರಣೆಗಳಿಗೆ ನೆರವಾಗುವ ಸಶಸ್ತ್ರ ಡ್ರೋನ್‌ಗಳನ್ನು ಭಾರತಕ್ಕೆ ಮಾರಾಟ ಮಾಡಲು ಡೊನಾಲ್ಡ್‌ ಟ್ರಂಪ್‌ ನೇತೃತ್ವದ ಅಮೆರಿಕ ಸರಕಾರ ಶನಿವಾರ ಸಮ್ಮತಿಸಿದೆ. ಜತೆಗೆ ವಾಯು ಮತ್ತು ಭೂಮಿ ಮೇಲಿಂದಾಗುವ ಕ್ಷಿಪಣಿ ದಾಳಿಯನ್ನು ನಿರೋಧಿಸುವ ರಕ್ಷಣಾ ವ್ಯವಸ್ಥೆಗಳನ್ನು ಕೂಡ ನೀಡುವ ಪ್ರಸ್ತಾವಕ್ಕೂ ಅಂಗೀಕಾರದ ಮುದ್ರೆಯೊತ್ತಿದೆ.
ಇಂಡೋ-ಪೆಸಿಫಿಕ್‌ ಸಾಗರದಲ್ಲಿ ಚೀನಾ ಪ್ರಾಬಲ್ಯ ಕುಗ್ಗಿಸುವ ಉದ್ದೇಶದಿಂದ ಭಾರತಕ್ಕೆ ರಕ್ಷಣಾ ಸಾಧನಗಳನ್ನು ಮಾರಾಟ ಮಾಡಲು ಅಮೆರಿಕ ಈ ತಂತ್ರ ಅನುಸರಿಸಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.
2017ರ ಜೂನ್‌ನಲ್ಲಿ ಪ್ರಧಾನಿ ಮೋದಿ ಅವರೊಂದಿಗಿನ ಭೇಟಿ ವೇಳೆ ಅಮೆರಿಕ ಅಧ್ಯಕ್ಷ ಟ್ರಂಪ್‌ ರಕ್ಷಣಾ ಆವೃತ್ತಿಯ ಡ್ರೋನ್‌ಗಳನ್ನು ನಿಗಾ ಇರಿಸುವ ಬಳಕೆಗಾಗಿ ಭಾರತದ ಸೇನೆಗೆ ನೀಡಲು ಒಪ್ಪಿಗೆ ಸೂಚಿಸಿದ್ದರು. ಅಮೆರಿಕದ ಪ್ರಸ್ತಾವನೆಯನ್ನು ಒಪ್ಪಿ ಖರೀದಿಗೆ ಭಾರತ ಮುಂದಾದಲ್ಲಿ 17,300 ಕೋಟಿ ರೂ. ಮೊತ್ತದ ಮಿಲಿಟರಿ ಒಪ್ಪಂದ ಇದಾಗಲಿದೆ ಎಂದು ರಕ್ಷಣಾ ತಜ್ಞರು ಅಂದಾಜಿಸಿದ್ದಾರೆ.
ರಷ್ಯಾದಿಂದ ಎಸ್‌-400 ಟ್ರಯಂಫ್‌ ಕ್ಷಿಪಣಿ ನಿರೋಧಕ ವ್ಯವಸ್ಥೆ ಖರೀದಿಗೆ ತಡೆಯೊಡ್ಡಲು ತನ್ನ ಅತ್ಯಾಧುನಿಕ ಕ್ಷಿಪಣಿ ನಿರೋಧಕ ವ್ಯವಸ್ಥೆ 'ಥಾಡ್‌' ಮತ್ತು 'ಪ್ರ್ಯಾಟ್ರಿಯಾಟ್‌' ವ್ಯವಸ್ಥೆಗಳನ್ನು ನೀಡುವ ಪ್ರಸ್ತಾವನೆಯನ್ನು ಭಾರತದ ಮುಂದಿಟ್ಟಿರುವ ಬಗ್ಗೆ ಸದ್ಯ ಟ್ರಂಪ್‌ ಸರಕಾರ ಮೌನಕ್ಕೆ ಶರಣಾಗಿದ್ದರು, ತೆರೆಮರೆ ಕಸರತ್ತು ಮುಂದುವರಿಸಿದೆ.