ಅತಿಯಾದ ಸಾಲ ಎಂದಿಗೂ ಒಳ್ಳೆಯದಲ್ಲ: ಪ್ರಧಾನಿ ಮೋದಿ ಮಾತಿಗೆ ತಲೆದೂಗಿದ ಅಮೆರಿಕ

ವಾಷಿಂಗ್ಟನ್: ದೇಶವೊಂದು ಮಾಡುವ ಬೃಹತ್ ಸಾಲದ ವಿಚಾರದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ನಿಲುವು ಪ್ರಶಂಸನೀಯ ಎಂದು ಅಮೆರಿಕದ ರಕ್ಷಣಾ ಕಾರ್ಯದರ್ಶಿ ಜೇಮ್ಸ್ ಮ್ಯಾಟಿಸ್ ಹೇಳಿದ್ದಾರೆ.

ಇಂಟರ್‌ನ್ಯಾಶನಲ್ ಇನ್ಸ್ಟಿಟ್ಯೂಟ್ ಫಾರ್ ಸ್ಟ್ರಾಟೆಜಿಕ್ ಸ್ಟಡೀಸ್‌ 17ನೇ ಏಷ್ಯಾ ಭದ್ರತಾ ಸಭೆ ಸಂದರ್ಭದಲ್ಲಿ ಮ್ಯಾಟಿಸ್‌ ಪ್ರಧಾನಿ ಮೋದಿಯವರನ್ನು ಶನಿವಾರ ಭೇಟಿಯಾಗಿದ್ದರು.

ಸಿಂಗಾಪುರದಲ್ಲಿ ನಡೆದಿದ್ದ ಶಾಂಗ್ರಿ-ಲಾ-ಮಾತುಕತೆಯಲ್ಲಿ ಪ್ರಧಾನಿ ಮೋದಿ ದಿಕ್ಸೂಚಿ ಭಾಷಣ ಮಾಡಿದ್ದು, ಆ ಸಂದರ್ಭದಲ್ಲಿ ಬೃಹತ್ ಸಾಲವೊಂದು ಹೇಗೆ ದೇಶಕ್ಕೆ ಹೊರೆಯಾಗುತ್ತದೆ ಮತ್ತು ಸಾಲದ ಮೊತ್ತ ಹೆಚ್ಚಿದಂತೆ ಮತ್ತೊಂದು ದೇಶಕ್ಕೂ ಯಾವ ರೀತಿ ತೊಂದರೆಯಾಗುತ್ತದೆ ಎನ್ನುವುದನ್ನು ವಿವರಿಸಿದ್ದರು.

ಮೋದಿ ಭಾಷಣ ಮತ್ತು ಅವರ ಚಿಂತನೆಯನ್ನು ಮ್ಯಾಟಿಸ್ ಮೆಚ್ಚಿಕೊಂಡಿದ್ದು, ಹೇಗೆ ಆರ್ಥಿಕತೆ ಮತ್ತು ಸಾಲದ ಹೊರೆ ದೇಶವನ್ನು ಬಾಧಿಸುತ್ತದೆ ಎನ್ನುವುದನ್ನು ಮೋದಿ ತಿಳಿಸಿದ್ದಾರೆ. ಇದರಿಂದ ಒಂದು ದೇಶ ಮತ್ತೊಂದು ದೇಶಕ್ಕೆ ಸಾಲ ನೀಡುವ ಸಂದರ್ಭದಲ್ಲಿ ಯೋಚಿಸುತ್ತದೆ ಎಂದು ತಿಳಿಸಿದ್ದಾರೆ.

ಚೀನಾದ ಬೃಹತ್ ಯೋಜನೆಯಾಗಿರುವ ದಕ್ಷಿಣ ಚೀನಾದಲ್ಲಿ ಅಧಿಪತ್ಯ ಸ್ಥಾಪಿಸುವ ಯೋಜನೆ ಮತ್ತು ಒನ್‌ ಬೆಲ್ಟ್‌ ಒನ್ ರೋಡ್ ಯೋಜನೆ ಕುರಿತು ಉದಾಹರಿಸಿ, ಬೃಹತ್ ಯೋಜನೆಗೆ ಹೇಗೆ ಸಾಲ ಹೊರೆಯಾಗುತ್ತದೆ ಎಂದು ಮ್ಯಾಟಿಸ್ ತಿಳಿಸಿದ್ದಾರೆ.