ಪ್ಯಾರಿಸ್‌ ಒಪ್ಪಂದದಿಂದ ಅಧಿಕೃತವಾಗಿ ಹೊರಬಿದ್ದ ಅಮೆರಿಕ

ವಾಷಿಂಗ್ಟನ್‌: ಜಾಗತಿಕ ತಾಪಮಾನ ಏರಿಕೆ ನಿಯಂತ್ರಣ ಸಂಬಂಧ ಭಾರತವೂ ಸೇರಿ ಜಗತ್ತಿನ 188 ದೇಶಗಳು ಸಹಿ ಹಾಕಿದ್ದ ಐತಿಹಾಸಿಕ '2015ರ ಪ್ಯಾರಿಸ್‌ ಒಪ್ಪಂದ'ದಿಂದ ಹಿಂದೆ ಸರಿಯುವುದಾಗಿ ಘೋಷಿಸಿದ್ದ ಅಮೆರಿಕ ಸೋಮವಾರ ವಿಶ್ವಸಂಸ್ಥೆಗೆ ತನ್ನ ನಿರ್ಧಾರವನ್ನು ಅಧಿಕೃತವಾಗಿ ತಿಳಿಪಡಿಸಿದೆ. ಅಮೆರಿಕದ ಈ ನಡೆಗೆ ಜಪಾನ್‌, ಇಟಲಿ ಸೇರಿ ಅನೇಕ ರಾಷ್ಟ್ರಗಳು ಬೇಸರ ವ್ಯಕ್ತಪಡಿಸಿವೆ.

ಪ್ಯಾರಿಸ್‌ ಒಪ್ಪಂದ; ಅಮೆರಿಕದ ಬೆದರಿಕೆ ಮಧ್ಯೆಯೂ ಭಾರತದ ಭರವಸೆ

ಅತಿಯಾದ ಕೈಗಾರಿಕೀಕರಣ ಹಾಗೂ ವಾಹನಗಳ ಬಳಕೆಯಿಂದ ಜಾಗತಿಕ ತಾಪಮಾನ ಏರಿಕೆಯಾಗುತ್ತಿದ್ದು, ತಾಪಮಾನವನ್ನು 2 ಡಿಗ್ರಿ ಸೆಲ್ಸಿಯೆಸ್‌ನೊಳಗೆ ನಿಯಂತ್ರಿಸುವ ಉದ್ದೇಶದೊಂದಿಗೆ 2015ರ ಡಿಸೆಂಬರ್‌ 12ರಂದು 'ಪ್ಯಾರಿಸ್‌ ಒಪ್ಪಂದ' ಜಾರಿಗೆ ಬಂದಿತ್ತು. ಪರಿಸರ ಸ್ನೇಹಿ ವಿದ್ಯುತ್‌ ಉತ್ಪಾದನೆ ಹಾಗೂ ಸೌರಶಕ್ತಿ ಮತ್ತು ಎಲೆಕ್ಟ್ರಿಕ್‌ ವಾಹನಗಳ ಉತ್ಪಾದನೆಗೆ ಹೆಚ್ಚಿನ ಆದ್ಯತೆ ನೀಡಲಾಗಿತ್ತು. ಆದರೆ ಭಾರತ ಹಾಗೂ ಚೀನಾಗೆ ಕಲ್ಲಿದ್ದಲು ಬಳಕೆ ಪ್ರಮಾಣದಲ್ಲಿ ರಿಯಾಯಿತಿಗಳನ್ನು ತೋರಲಾಗಿತ್ತು. ಈ ಒಪ್ಪಂದದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಹಾಗೂ ಅಂದಿನ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮಾ ಪ್ರಮುಖ ಪಾತ್ರವಹಿಸಿದ್ದರು.

ಪ್ಯಾರಿಸ್‌ ಒಪ್ಪಂದ ಜಾರಿಗೆ 2 ವರ್ಷಗಳ ಗಡುವು

ಪ್ರಕ್ರಿಯೆಗೆ ಒಂದು ವರ್ಷ: ಬೃಹತ್‌ ಮಾರುಕಟ್ಟೆ ಹೊಂದಿರುವ ಭಾರತ ಹಾಗೂ ಚೀನಾಗೆ ರಿಯಾಯಿತಿಗಳನ್ನು ತೋರಲಾಗಿದೆ ಎಂದು ತಕರಾರು ತೆಗೆದ ಹಾಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಒಪ್ಪಂದ ನಿಯಮಗಳ ಪಾಲನೆಯಿಂದ ಅಮೆರಿಕದ ಆರ್ಥಿಕತೆಗೆ ಹೊರೆಯಾಗಲಿದೆ ಎಂದು ಹೇಳಿ ಚುನಾವಣೆಗೂ ಮುನ್ನ ಒಪ್ಪಂದದಿಂದ ಹಿಂದೆ ಸರಿಯುವ ಭರವಸೆ ನೀಡಿದ್ದರು. 2017ರ ಜೂನ್‌ 1ರಂದು ಈ ಕುರಿತು ಘೋಷಿಸಿದ್ದರೂ ವಿಶ್ವಸಂಸ್ಥೆಗೆ ಸೋಮವಾರ ಅಧಿಕೃತವಾಗಿ ಮಾಹಿತಿ ಸಲ್ಲಿಸಿದ್ದು ಪ್ರಕ್ರಿಯೆಗಳಿಗೆ ಚಾಲನೆ ದೊರೆತಿದೆ. ಪ್ರಕ್ರಿಯೆಗಳು ಪೂರ್ಣಗೊಂಡು ಅಮೆರಿಕ 2020ರ ನವೆಂಬರ್‌ 4ಕ್ಕೆ ಅಧಿಕೃತವಾಗಿ ಒಪ್ಪಂದದಿಂದ ಹೊರಬೀಳಲಿದೆ.