ಟ್ರಂಪ್‌ಗೆ ಮತ ಹಾಕದಿದ್ದರೆ ಅಪಾಯ: ಮತದಾರರಿಗೆ ಇರಾನ್‌ನಿಂದ ಬೆದರಿಕೆಯ ಇ-ಮೇಲ್‌

ಬಾಸ್ಟನ್‌: ಅಮೆರಿಕ ಅಧ್ಯಕ್ಷೀಯ ಚುನಾವಣೆಗೆ ಎರಡು ವಾರಗಳು ಬಾಕಿಯಿರುವ ಹಿನ್ನೆಲೆಯಲ್ಲಿ ಹಲವು ರಾಜ್ಯಗಳ ಮತದಾರರಿಗೆ ಬೆದರಿಕೆ ಇ-ಮೇಲ್‌ಗಳು ಬಂದಿವೆ. ''ಹಾಲಿ ಅಧ್ಯಕ್ಷ ಹಾಗೂ ರಿಪಬ್ಲಿಕನ್‌ ಪಕ್ಷದ ಅಧ್ಯಕ್ಷೀಯ ಅಭ್ಯರ್ಥಿ ಡೊನಾಲ್ಡ್‌ ಟ್ರಂಪ್‌ ಅವರಿಗೆ ಮತ ಹಾಕದಿದ್ದರೆ ಗಂಭೀರ ಪರಿಣಾಮ ಎದುರಿಸಬೇಕಾಗಬಹುದು,'' ಎಂದು ಎಚ್ಚರಿಸಲಾಗಿದೆ. ಇರಾನ್‌ನಿಂದ ಇಂತಹ ಇ-ಮೇಲ್‌ಗಳು ರವಾನೆಯಾಗಿವೆ ಎಂಬುದನ್ನು ತನಿಖಾ ಸಂಸ್ಥೆಗಳು ಪತ್ತೆ ಮಾಡಿವೆ.

ಈ ಬಗ್ಗೆ ಎಫ್‌ಬಿಐ ಮತ್ತು ಗುಪ್ತಚರ ದಳ ತನಿಖೆ ನಡೆಸಿ ಸುದ್ದಿಗೋಷ್ಠಿ ಮಾಡಿದ್ದು, ''ಬಲಪಂಥೀಯ ವಿಚಾರಧಾರೆಯ ಇರಾನ್‌ನ ಪ್ರೌಡ್‌ ಬಾ‌ಯ್ಸ್‌ ಹೆಸರಿನ ತಂಡವೊಂದು ಈ ಬೆದರಿಕೆ ಇ-ಮೇಲ್‌ಗಳನ್ನು ಕಳುಹಿಸಿದೆ. ಫ್ಲಾರಿಡಾ, ಪೆನ್ಸಿಲ್ವೇನಿಯಾದ ಮತದಾರರಿಗೆ ಹೆಚ್ಚಾಗಿ ಬೆದರಿಕೆಗಳು ಬಂದಿವೆ. ಇವೆಲ್ಲಹತಾಶ ವಿರೋಧಿಗಳ ಕುತಂತ್ರ. ಇದಕ್ಕೆಲ್ಲಮತದಾರರು ಆತಂಕಕ್ಕೆ ಒಳಗಾಗುವುದು ಬೇಡ,'' ಎಂದಿದೆ.

ಅಮೆರಿಕಕ್ಕೆ ಯಾರಾಗ್ತಾರೆ ಹೊಸ ನಾಯಕ? ಟ್ರಂಪ್-ಬಿಡೆನ್ ರ ಬಲಾಬಲವೇನು?

ಗುಪ್ತಚರ ದಳದ ನಿರ್ದೇಶಕ ಜಾನ್‌ ರಾರ‍ಯಟ್‌ಕ್ಲಿಫ್‌ ಮತ್ತು ಎಫ್‌ಬಿಐ ನಿರ್ದೇಶಕ ಕ್ರಿಸ್‌ ವ್ರೇ ಮಾತನಾಡಿ ವಿದೇಶಗಳಿಂದ ಬರುವ ಇಂಥ ಇ-ಮೇಲ್‌ಗಳನ್ನು ನಿಯಂತ್ರಿಸಲು ಇನ್ನುಮುಂದೆ ಆರೋಪಿಗಳಿಗೆ ತಕ್ಕ ದಂಡ ವಿಧಿಸಿ ಶಿಕ್ಷೆ ನೀಡಲಾಗುವುದು ಎಂದಿದ್ದಾರೆ.

ಉನ್ನತ ಹುದ್ದೆಗಳಿಗೂ ಅಮೆರಿಕ ವೀಸಾ ನಿರ್ಬಂಧ
ವಾಷಿಂಗ್ಟನ್‌: ಅಮೆರಿಕದಲ್ಲಿಟ್ರಂಪ್‌ ಸರಕಾರ ವೀಸಾ ನೀತಿಯನ್ನು ಮತ್ತಷ್ಟು ಬಿಗಿಗೊಳಿಸಿದೆ. ಉನ್ನತ ಮಟ್ಟದ ಕೌಶಲದ ಅಗತ್ಯ ಇರುವ ಹುದ್ದೆಗಳಿಗೆ ಎಚ್‌-1ಬಿ ವೀಸಾವನ್ನು ನಿರಾಕರಿಸಲು ಮುಂದಾಗಿದೆ. ಮುಖ್ಯವಾಗಿ ತಂತ್ರಜ್ಞಾನ ಆಧಾರಿತ ಕಂಪನಿಗಳಿಗೆ ಇದರಿಂದ ಸಮಸ್ಯೆಯಾಗಬಹುದು. ಸಾವಿರಾರು ಮಂದಿ ಭಾರತೀಯರ ಮೇಲೆ ಪ್ರತಿಕೂಲ ಪ್ರಭಾವ ಬೀರಬಹುದು ಎಂದು ಅಂದಾಜಿಸಲಾಗಿದೆ.

ಅಮೆರಿಕದ ಉಪಾಧ್ಯಕ್ಷ ಅಭ್ಯರ್ಥಿ ಕಮಲಾ ಸಂಬಂಧಿ ಕ್ಷಮೆಗೆ ಅಮೆರಿಕ ಹಿಂದೂ ಸಂಘಟನೆಗಳ ಆಗ್ರಹ, ಕಾರಣವೇನು?

ಅಮೆರಿಕನ್ನರಿಗೆ ಉದ್ಯೋಗಗಳನ್ನು ಉಳಿಸಿಕೊಡುವ ನಿಟ್ಟಿನಲ್ಲಿವೀಸಾ ನೀತಿಯನ್ನು ಬಿಗಿಗೊಳಿಸಲಾಗುತ್ತಿದೆ. ಈ ಬದಲಾವಣೆಯಿಂದ ಎಚ್‌-1 ಬಿ ವೀಸಾ ಪ್ರಕ್ರಿಯೆ ಪಾರದರ್ಶಕವಾಗಿರಲಿದೆ ಎಂದು ಟ್ರಂಪ್‌ ಸರಕಾರ ತಿಳಿಸಿದೆ. 'ಎಚ್‌'ನೀತಿಯ ಬದಲಿಗೆ 'ಬಿ-1' ನೀತಿಯ ಮೂಲಕ ವಿದೇಶಿ ಉದ್ಯೋಗಿಗಳು ಅಮೆರಿಕವನ್ನು ಪ್ರವೇಶಿಸುವ, ನೀತಿ ದುರ್ಬಳಕೆಯಾಗುವ ಅವಕಾಶವನ್ನು ತಡೆಯಲಾಗುವುದು ಎಂದು ಟ್ರಂಪ್‌ ಸರಕಾರ ಪ್ರತಿಪಾದಿಸಿದೆ. ಅಧ್ಯಕ್ಷೀಯ ಚುನಾವಣೆಗೆ ಎರಡು ವಾರ ಬಾಕಿ ಇರುವಂತೆ ಈ ಘೋಷಣೆ ಹೊರಬಿದ್ದಿದೆ.

ಅಮೆರಿಕದಲ್ಲಿ ಎಚ್‌-1ಬಿ ಸ್ಪೆಶಾಲಿಟಿ ಆಕ್ಯುಪೇಶನ್ಸ್‌ ಪದ್ಧತಿಯಡಿಯಲ್ಲಿ ವಿದೇಶಿಯರು ತಾತ್ಕಾಲಿಕ ಅವಧಿಗೆ ಅಮರಿಕದಲ್ಲಿ ಸೇವೆ ಸಲ್ಲಿಸಬಹುದು. ಭಾರತೀಯ ಕಂಪನಿಗಳು ಬಿ-1 ವೀಸಾ ಅಡಿಯಲ್ಲಿಅಮೆರಿಕಕ್ಕೆ ತಾತ್ಕಾಲಿಕವಾಗಿ ತಮ್ಮ ಉದ್ಯೋಗಿಗಳನ್ನು ಕಳಿಸಿ ಗ್ರಾಹಕರಿಗೆ ಸೇವೆ ಒದಗಿಸುತ್ತಿದ್ದವು. ಟ್ರಂಪ್‌ ಸರಕಾರ ಎಚ್‌-1ಬಿ ವೀಸಾ ನಿಯಮಗಳನ್ನು ಬಿಗಿಗೊಳಿಸುವುದರಿಂದ ಅಮೆರಿಕದ ಆಸ್ಪತ್ರೆಗಳು, ವಿದೇಶಿ ಮೂಲದ ತಜ್ಞ ವೈದ್ಯರಿಗೆ ಕನಿಷ್ಠ 40 ಪರ್ಸೆಂಟ್‌ ಹೆಚ್ಚುವರಿ ವೇತನ ನೀಡಬೇಕಾಗಿದೆ. ಪ್ರತಿ ವರ್ಷ ಬಿಡುಗಡೆಯಾಗುವ 85,000 ಎಚ್‌-1ಬಿ ವೀಸಾದಲ್ಲಿ ಮೂರನೇ ಎರಡರಷ್ಟು ಭಾರತೀಯರಿಗೆ ಹೋಗುತ್ತದೆ. ಭಾರತದ ಅನೇಕ ವೈದ್ಯರು ಅಮೆರಿಕದ ವೈದ್ಯಕೀಯ ವಲಯದಲ್ಲಿದ್ದಾರೆ.