ಫೇಸ್‌ಬುಕ್‌ ಇಲ್ಲದೆ ಚಡಪಡಿಸಿದ ನೆಟ್ಟಿಗರು!

ಸ್ಯಾನ್‌ಫ್ರಾನ್ಸಿಸ್ಕೊ: ವಿಶ್ವಾದ್ಯಂತ ಸಾಮಾಜಿಕ ಜಾಲತಾಣ ದಿಗ್ಗಜ ಫೇಸ್‌ಬುಕ್‌ ಮತ್ತು ವಾಟ್ಸ್‌ಆ್ಯಪ್‌ನಲ್ಲಿ ಗುರುವಾರ ತಾಂತ್ರಿಕ ಅಡಚಣೆ ಕಾಣಿಸಿಕೊಂಡಿದ್ದು, ಕೋಟ್ಯಂತರ ಮಂದಿ ಬಳಕೆದಾರರು ಚಡಪಡಿಸುವಂತಾಯಿತು.

ಆದರೆ ಇದು ಸೈಬರ್‌ ದಾಳಿ ಅಲ್ಲ ಎಂದು ಫೇಸ್‌ಬುಕ್‌ ಬಳಕೆದಾರರಿಗೆ ತಿಳಿಸಿದ್ದು, ಶೀಘ್ರದಲ್ಲಿಯೇ ಸಮಸ್ಯೆ ಇತ್ಯರ್ಥವಾಗಲಿದೆ ಎಂದು ಭರವಸೆ ನೀಡಿದೆ.

ಭಾರತದಲ್ಲೂ ನೆಟ್ಟಿಗರು ಗುರುವಾರ ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ಗಳನ್ನು ಹಾಕಲು ಸಾಧ್ಯವಾಗದೆ ಅಸಹನೆ ವ್ಯಕ್ತಪಡಿಸಿದರು. ಹಲವರಿಗೆ ಫೇಸ್‌ಬುಕ್‌ ಆ್ಯಪ್‌ ಡೌನ್‌ಲೋಡ್‌ ಆಗಲಿಲ್ಲ. ಆಸ್ಪ್ರೇಲಿಯಾ, ಏಷ್ಯಾ, ಯುರೋಪ್‌, ದಕ್ಷಿಣ ಅಮೆರಿಕ ಮತ್ತು ಉತ್ತರ ಅಮೆರಿಕದಲ್ಲಿ ತಾಂತ್ರಿಕ ಅಡಚಣೆ ಎದುರಾಯಿತು.ಇನ್‌ಸ್ಟಾಗ್ರಾಮ್‌ನಲ್ಲಿ ಸಮಸ್ಯೆ ಕಾಣಿಸಿದರೂ, ನಂತರ ಬಗೆಹರಿಯಿತು.

ಏಷ್ಯಾ ಮತ್ತು ಯುರೋಪ್‌ನ ಕೆಲ ಭಾಗಗಳಲ್ಲಿ ಸಮಸ್ಯೆ ಮುಂದುವರಿದಿದೆ. '' ಫೇಸ್‌ಬುಕ್‌, ವಾಟ್ಸ್‌ಆ್ಯಪ್‌, ಇನ್‌ಸ್ಟಾಗ್ರಾಮ್‌ನಲ್ಲಿ ಗ್ರಾಹಕರಿಗೆ ತೊಂದರೆಯಾಗಿರುವುದು ನಮ್ಮ ಗಮನಕ್ಕೆ ಬಂದಿದೆ. ಆದರೆ ಇದು ಯಾವುದೇ ಸೈಬರ್‌ ದಾಳಿಯ ಪ್ರಕರಣವಲ್ಲ. ಸಮಸ್ಯೆಯನ್ನು ಶೀಘ್ರ ಬಗೆಹರಿಸಲಾಗುವುದು'' ಎಂದು ಫೇಸ್‌ಬುಕ್‌, ಟ್ವಿಟರ್‌ನಲ್ಲಿ ತಿಳಿಸಿದೆ.

ಕಳೆದ ವರ್ಷ ನವೆಂಬರ್‌ನಲ್ಲಿದ ಫೇಸ್‌ಬುಕ್‌ ಸರ್ವರ್‌ ಸಮಸ್ಯೆಯಿಂದ ಇಂಥ ಸನ್ನಿವೇಶ ಎದುರಿಸಿತ್ತು. ಸೆಪ್ಟೆಂಬರ್‌ನಲ್ಲಿ ನೆಟ್‌ವರ್ಕ್‌ ಸಮಸ್ಯೆ ಉಂಟಾಗಿತ್ತು. ಕಳೆದ ವರ್ಷ ಬಳಕೆದಾರರ ಖಾಸಗಿ ದತ್ತಾಂಶಗಳ ಸೋರಿಕೆಗೆ ಸಂಬಂಧಿಸಿ ವಿವಾದಕ್ಕೀಡಾಗಿದ್ದ ಫೇಸ್‌ಬುಕ್‌ ಈಗ ಮತ್ತೆ ನಕಾರಾತ್ಮಕ ಸುದ್ದಿಯಲ್ಲಿದೆ.

ಈ ನಡುವೆ ಫೇಸ್‌ಬುಕ್‌ ಮುಂತಾದ ಜಾಲತಾಣಗಳ ವ್ಯಸನದಿಂದ ಬಿಡುಗಡೆ ಹೊಂದಲು ಇದು ಸಕಾಲ ಎಂದು ನೆಟ್ಟಿಗರು ಭಾವಿಸುತ್ತಿದ್ದಾರೆ. ಅನೇಕ ಮಂದಿ ಇವುಗಳಿಂದ ಸಮಯ ವ್ಯರ್ಥವಾಗುತ್ತಿರುವುದರ ಬಗ್ಗೆ ಮನವರಿಕೆಯಾಗುತ್ತಿದೆ ಎಂದು ಹೇಳಿಕೊಂಡಿದ್ದಾರೆ. ಡಿಜಿಟಲ್‌ ಜಗತ್ತು ಬಿಟ್ಟು ಹೊರ ಜಗತ್ತಿನ ಸಂವಹನ ಹೆಚ್ಚಿಸಿಕೊಳ್ಳಲು ಇದು ಸುಸಂದರ್ಭ ಎಂದು ಬಣ್ಣಿಸಿದ್ದಾರೆ.