ಮದ್ಯ ದೊರೆ ವಿಜಯ್ ಮಲ್ಯ ಲಂಡನ್‌ನಲ್ಲಿ ಬಂಧನ, ಜಾಮೀನು ಮಂಜೂರು

ಲಂಡನ್‌: ಸಾವಿರಾರು ಕೋಟಿ ರೂಪಾಯಿ ಸಾಲ ಮಾಡಿ ಸುಸ್ತಿದಾರನಾಗಿದ್ ಉದ್ಯಮಿ, ಮದ್ಯದೊರೆ ವಿಜಯ್‌ ಮಲ್ಯ ಅವರನ್ನು ಲಂಡನ್‌ ಪೊಲೀಸರು ಬಂಧಿಸಿದ್ದಾರೆ.

ಅಕ್ರಮ ಹಣ ವರ್ಗಾವಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ವಿಜಯ್‌ ಮಲ್ಯ ಅವರನ್ನು ಬಂಧಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ಬಂಧನದ ಕೆಲವೇ ಗಂಟೆಗಳಲ್ಲಿ ವಿಜಯ್‌ ಮಲ್ಯಗೆ ಜಾಮೀಜು ಮಂಜೂರಾಗಿದೆ. ಕಳೆದ ಆರು ತಿಂಗಳಿನಲ್ಲಿ ಮಲ್ಯ ಬಂಧನವಾಗುತ್ತಿರುವುದು ಇದು ಎರಡನೇ ಬಾರಿ. ಈ ಹಿಂದೆಯೂ ವಿಜಯ್‌ ಮಲ್ಯ ಬಂಧನವಾದ ಕೂಡಲೇ ಜಾಮೀನು ಮಂಜೂರಾಗಿತ್ತು.

2005 ಮತ್ತು 2010ರ ನಡುವೆ ಮಲ್ಯ ನೇತೃತ್ವದ ಕಿಂಗ್‌ ಫಿಶರ್‌ ಏರ್‌ಲೈನ್ಸ್‌ ಭಾರಿ ಮೊತ್ತದ ಸಾಲವನ್ನು ತೆಗೆದುಕೊಂಡಿತ್ತು.

ಸಾಲ ತೀರಿಸಲಾಗದೇ ಮಲ್ಯ 2016ರ ಮಾರ್ಚ್‌ನಲ್ಲಿ ಬ್ರಿಟನ್‌ಗೆ ಪರಾರಿಯಾಗಿದ್ದಾರೆ. ಸುಮಾರು ಅರ್ಧ ಡಜನಿನಷ್ಟು ನಕಲಿ ಕಂಪನಿಗಳಲ್ಲಿ ಮಲ್ಯ ಸಾಲದ ಹಣವನ್ನು ಹೂಡಿದ್ದಾರೆ. ಈ ಕಂಪನಿಗಳು 7 ವಿದೇಶಗಳಲ್ಲಿವೆ. ಈ ವರ್ಷಾರಂಭದಲ್ಲಿ ಸಿಬಿಐ ಮತ್ತು ಜಾರಿ ನಿರ್ದೇಶನಾಲಯ ಮೊದಲ ಆರೋಪಪಟ್ಟಿಯನ್ನು ದಾಖಲಿಸಿತ್ತು. ಐಡಿಬಿಐ ಬ್ಯಾಂಕ್‌ನಿಂದ ಪಡೆದ 900 ಕೋಟಿ ರೂ. ಸಾಲದ ಬಾಕಿಗೆ ಸಂಬಂಧಿಸಿ ಆರೋಪ ಪಟ್ಟಿ ಸಲ್ಲಿಸಲಾಗಿತ್ತು.

ಲಂಡನ್‌ನ ಕೋರ್ಟ್‌ನಲ್ಲಿ ಮಲ್ಯ ಗಡೀಪಾರು ಕುರಿತ ವಿಚಾರಣೆ ನಡೆಯುತ್ತಿದೆ. ಇದೀಗ ಸಿಬಿಐ ಮತ್ತು ಜಾರಿ ನಿರ್ದೇಶನಾಲಯವು ಅರ್ಜಿ ಸಲ್ಲಿಸಿವೆ. ಕಿಂಗ್‌ಫಿಶರ್‌ ಏರ್‌ಲೈನ್ಸ್‌ಗೆ ನೀಡಿರುವ ಸಾಲದ ಹಣವನ್ನು ನಕಲಿ ಕಂಪನಿಗಳ ಮೇಲೆ ಹೂಡಿರುವ ದೂರನ್ನು ಈ ಸಲ ದಾಖಲಿಸಿಕೊಳ್ಳಲಾಗುತ್ತಿದೆ.

Vijay Mallya arrested in London