ತಂದೆ ಸಾಯಿಸಿದ ಅಮೆರಿಕನ್ನರನ್ನು ಬಿಡೋಲ್ಲ: ಒಸಾಮಾ ಮಗ

ದುಬೈ:'ತಂದೆಯನ್ನು ಕೊಂದ ಅಮೆರಿಕವನ್ನು ಸುಮ್ಮನೆ ಬಿಡೊಲ್ಲ, ಪ್ರತೀಕಾರ ತೀರಿಸಿಕೊಂಡೇ ಸಿದ್ಧ. ಅಮೆರಿಕದಲ್ಲಿ ಮಾತ್ರವಲ್ಲ, ಎಲ್ಲೆಲ್ಲಿ ಅಮೆರಿಕನ್ನರಿರುತ್ತಾರೋ ಅಲ್ಲಿಯೂ ದಾಳಿ ನಡೆಸುತ್ತೇವೆ,' ಎಂದು ಎಚ್ಚರಿಸಿರುವ ಒಸಾಮಾ ಲಾಡೆನ್ ಪುತ್ರ ಹಂಝ ಲಾಡೆನ್, ಈ ಕಾರ್ಯಕ್ಕೆ ಎಲ್ಲ ಮುಸ್ಲಿಮರೂ ಕೈ ಜೋಡಿಸಬೇಕೆಂದು ಕರೆ ನೀಡಿದ್ದಾನೆ.

ಆನ್‌ಲೈನ್‌ನಲ್ಲಿ ಪೋಸ್ಟ್‌ ಮಾಡಿದ 21 ನಿಮಿಷಗಳ ‘ವಿ ಆರ್‌ ಆಲ್‌ ಒಸಾಮಾ’ ಎಂಬ ಆಡಿಯೋ ಸಂದೇಶದಲ್ಲಿ ಹಂಝ, ಅಮೆರಿಕ ಮತ್ತು ಮಿತ್ರ ರಾಷ್ಟ್ರಗಳಿಗೆ ಎಚ್ಚರಿಸಿದ್ದಾನೆಂದು ಗುಪ್ತಚರ ಸಂಸ್ಥೆ ಸೈಟ್‌ ತಿಳಿಸಿದೆ.

‘ಪ್ಯಾಲೆಸ್ತೇನ್‌, ಅಫ್ಘಾನಿಸ್ತಾನ, ಸಿರಿಯಾ, ಇರಾಕ್‌, ಯೆಮೆನ್‌, ಸೊಮಾಲಿಯಾ ಮತ್ತು ಇತರೆ ಮುಸ್ಲಿಂ ದೇಶಗಳಲ್ಲಿ ನೀವು ಜನರ ಮೇಲೆ ಮಾಡಿದ ದಬ್ಬಾಳಿಕೆಗೆ ಪ್ರತಿಯಾಗಿ ನಿಮ್ಮನ್ನು ನಿಮ್ಮ ದೇಶದಲ್ಲಿ ಮತ್ತು ವಿದೇಶಗಳಲ್ಲಿ ಗುರಿ ಮಾಡಿ ದಾಳಿ ನಡೆಸುತ್ತೇವೆ,’ ಎಂದು ಹಂಝ ಎಚ್ಚರಿಸಿದ್ದಾನೆ.

ಒಸಾಮಾ ಹತ್ಯೆಗೆ ಸೇಡು ತೀರಿಸಿಕೊಳ್ಳುತ್ತೇನೆ ಎಂದು ಹೇಳಿದ್ದರೂ, ಇದು ಕೇವಲ ಒಸಾಮಾ ಸಾವಿಗೆ ಪ್ರತೀಕಾರವಲ್ಲ, ಇಸ್ಲಾಂ ವಿರುದ್ಧ ಆಕ್ರಮಣ ಮಾಡಿದವರ ವಿರುದ್ಧ ಸೇಡು ಎಂದು ಭಾಷಣದಲ್ಲಿ ಹೇಳಲಾಗಿದೆ.