ಜನಾಂಗೀಯ ಹಲ್ಲೆ: ಪ್ರಧಾನಿಗೆ ಪತ್ರ ಬರೆದ ಕಾನ್ಸಾಸ್‌ ಗವರ್ನರ್‌

ವಾಷಿಂಗ್ಟನ್‌: ಕಾನ್ಸಾಸ್‌ನಲ್ಲಿ ಭಾರತೀಯ ಟೆಕ್ಕಿ ಮೇಲೆ ನಡೆದ ಜನಾಂಗೀಯ ದಾಳಿಯ ಕುರಿತು ಖೇದ ವ್ಯಕ್ತಪಡಿಸಿ ಅಲ್ಲಿನ ಗವರ್ನರ್‌, ಪ್ರಧಾನಿ ನರೇಂದ್ರ ಮೋದಿಗೆ ಪತ್ರ ಬರೆದಿದ್ದಾರೆ.

ಕೆಲ ದಿನಗಳ ಹಿಂದೆ ಹೈದರಾಬಾದ್‌ ಮೂಲದ ಶ್ರಿನಿವಾಸ್‌ ಕುಚಿಬೋಟ್ಲಾ ಎಂಬವರ ಮೇಲೆ ಅಮೆರಿಕದ ಮಾಜಿ ಯೊಧ ಗಂಡು ಹಾರಿಸಿದ್ದ. ಇದಕ್ಕೂ ಮುನ್ನ ಆತ ಕುಚಿ ಬೋಟ್ಲಾಗೆ 'ನಿಮ್ಮ ದೇಶಕ್ಕೆ ಹಿಂತಿರುಗಿ' ಎಂದು ಬೆದರಿಸಿದ್ದ. ಈ ಘಟನೆಗೆ ವಿಶ್ವಾದ್ಯಂತ ಖಂಡನೆ ವ್ಯಕ್ತವಾಗಿತ್ತು.

ಈ ಕುರಿತು ಪ್ರಧಾನಿಗೆ ಪತ್ರ ಬರೆದಿರುವ ಕನ್ಸಾಸ್‌ ರಾಜ್ಯಪಾಲ ಸಾನ್‌ ಬ್ರೌನ್‌ಬ್ಯಾಕ್, ಈ ಘಟನೆಯಿಂದ ಬಹಳಷ್ಟು ದುಃಖವಾಗಿದ್ದು, ನಮ್ಮ ನೋವನ್ನು ಹೇಳಲು ಪದಗಳೇ ಇಲ್ಲ. ಶ್ರಿನಿವಾಸ್‌ ಅವರ ಕುಟುಂಬ ವರ್ಗಕ್ಕೂ ನಾವು ಸಂತಾಪ ಸೂಚಿಸಿದ್ದೇವೆ' ಎಂದು ಬ್ರೌನ್‌ಬ್ಯಾಕ್‌ ಹೇಳಿದ್ದು, ಅಲ್ಲದೇ ಇದೇ ವೇಳೆ ಘಟನೆಯಲ್ಲಿ ಗಾಯಗೊಂಡ ಅಲೋಕ್‌ ಮದಸನಿಗೂ ಅನುಕಂಪ ವ್ಯಕ್ತ ಪಡಿಸಿದ್ದಾರೆ.

ಕಾನ್ಸಾಸ್‌ ತೆರಳುವ ಭಾರತೀಯರಿಗೆ ಯಾವುದೇ ತೊಂದರೆ ಉಂಟಾಗದಂತೆ ಅಲ್ಲಿನ ಕಾನೂನು ಕಾಪಾಡುತ್ತದೆ ಎಂದಿರುವ ಬ್ರೌನ್‌ಬ್ಯಾಕ್‌, 'ಕಾನ್ಸಾಸ್‌ನಲ್ಲಿ ಯಾವುದೇ ಕಾರಣಕ್ಕೂ ಅಸಹಿಷ್ಣುತೆಗೆ ಜಾಗವಿಲ್ಲ. ನಾವೆಲ್ಲರೂ ಒಂದೇ ಕುಟುಂಬದವರಂತೆ ಬದುಕುತ್ತಿದ್ದು ಜನಾಂಗೀಯ ದ್ವೇಷಿಗಳಿಗೆ ಇಲ್ಲಿ ಜಾಗವಿಲ್ಲ' ಎಂದು ಪತ್ರ ಬರೆದಿದ್ದಾರೆ.