ವಾಷಿಂಗ್ಟನ್‌: ಕಿಡ್ನಿ ಸಮಸ್ಯೆಯಿಂದ ಬಳಲುತ್ತಿರುವ ರೋಗಿಗಳಿಗೆ ಇಲ್ಲೊಂದು ಶುಭಸುದ್ದಿ.
ದಿನಗಟ್ಟಲೆ ಆಸ್ಪತ್ರೆಯಲ್ಲಿ ಡಯಾಲಿಸಿಸ್‌ ಮಾಡಿಸಿಕೊಳ್ಳುವುದು, ಡಯಾಲಿಸಿಸ್‌ಗಾಗಿ ವಾರದಲ್ಲಿ ಮೂರು ಬಾರಿ ಆಸ್ಪತ್ರೆಗೆ ಅಲೆಯುವುದು ಇತ್ಯಾದಿ ಕಷ್ಟಗಳು ಸದ್ಯದಲ್ಲೇ ತಪ್ಪಲಿವೆ.
ಅಮೆರಿಕದ ಡಾ. ವಿಕ್ಟರ್‌ ಗುರಾ ನೇತೃತ್ವದ ಸಂಶೋಧಕರು ದೇಹದ ಹೊರಭಾಗದಲ್ಲಿ ಧರಿಸಬಹುದಾದ ಕೃತಕ ಕಿಡ್ನಿ ಅಭಿವೃದ್ಧಿಪಡಿಸಿದ್ದಾರೆ. ಇದರ ನೆರವಿನಿಂದ ಕಿಡ್ನಿ ವೈಫಲ್ಯದಿಂದ ಬಳಲುತ್ತಿರುವ ರೋಗಿಗಳು ಆಸ್ಪತ್ರೆಗೆ ಭೇಟಿ ನೀಡದೇ, ನಡೆದಾಡುತ್ತ ಅಥವಾ ತಮ್ಮ ಕೆಲಸಗಳಲ್ಲಿ ಮಗ್ನವಾಗಿದ್ದುಕೊಂಡೇ ಡಯಾಲಿಸಿಸ್‌ಗೆ ಒಳಗಾಗಬಹುದು. ಅಲ್ಲದೆ, ಈಗಿನ ಸಾಂಪ್ರದಾಯಿಕ ಡಯಾಲಿಸಿಸ್‌ ಯಂತ್ರಕ್ಕಿಂತ ವೇಗವಾಗಿ ಇದು ರಕ್ತವನ್ನು ಶುದ್ಧಗೊಳಿಸುತ್ತದೆ.
ಇದು ಹೇಗೆ ಭಿನ್ನ:
ಕಿಡ್ನಿ ವೈಫಲ್ಯದಿಂದ ಬಳಲುತ್ತಿರುವ ರೋಗಿಗಳು ಸಾಮಾನ್ಯವಾಗಿ ವಾರದಲ್ಲಿ ಮೂರು ಬಾರಿ ಡಯಾಲಿಸಿಸ್‌ಗೆ ಒಳಗಾಗಬೇಕಾಗುತ್ತದೆ. ಅಲ್ಲದೆ, ಆಸ್ಪತ್ರೆಯಲ್ಲಿ ಬೃಹತ್‌ ಡಯಾಲಿಸಿಸ್‌ ಯಂತ್ರದ ಬದಿಯಲ್ಲೇ ಮಲಗಿರಬೇಕು. ಇದೆಲ್ಲ ತಲೆನೋವು ಈ ಕೃತಕ ಕಿಡ್ನಿಯಿಂದ ತಪ್ಪಲಿದೆ.
ಸಾಮರ್ಥ್ಯ ಸಾಬೀತು:
ಅಮೆರಿಕದ ಯೂನಿವರ್ಸಿಟಿ ಆಫ್‌ ವಾಷಿಂಗ್ಟನ್‌ ಮೆಡಿಕಲ್‌ ಸೆಂಟರ್‌ನಲ್ಲಿ 7 ರೋಗಿಗಳ ಮೇಲೆ ಈ ಪ್ರಯೋಗ ಕೈಗೊಂಡಿದ್ದು, ಧರಿಸಬಹುದಾದ ಕೃತಕ ಕಿಡ್ನಿ ಡಿವೈಸ್‌ನಿಂದ, ಸಾಂಪ್ರದಾಯಿಕ ಡಯಾಲಿಸಿಸ್‌ ಚಿಕಿತ್ಸೆಗಿಂತ ಹೆಚ್ಚು ಪರಿಣಾಮಕಾರಿ ಎಂಬುದು ಸಾಬೀತಾಗಿದೆ. ಎಲ್ಲ 7 ರೋಗಿಗಳನ್ನು 24 ತಾಸೂ ಚಿಕಿತ್ಸೆಗೆ ಒಳಪಡಿಸಿ, ಕೃತಕ ಕಿಡ್ನಿ ಡಿವೈಸ್‌ ಸಾಮರ್ಥ್ಯವನ್ನು ಒರೆಗೆ ಹಚ್ಚಲಾಗಿದೆ.