ಬಿಡೆನ್ ತಪ್ಪು ಮಾಡುವುದನ್ನೇ ಕಾಯುತ್ತಿದ್ದಾರೆ!
ಈ ನಡುವೆ ಟ್ರಂಪ್ಗೆ ಬಹುಮುಖ್ಯವಾಗಿ ಬೇಕಿರುವುದು ಬಿಡೆನ್ ಅವರಿಂದ ನಡೆಯಬಹುದಾದ ಒಂದು ಸಣ್ಣ ತಪ್ಪು. ಇದು ಅವರ ವಿಜಯದ ಅಂತರವನ್ನು ಗಣನೀಯವಾಗಿ ಹೆಚ್ಚಿಸಬಹುದು ಕೂಡ ಎಂದು ಅಂತಾರಾಷ್ಟ್ರೀಯ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ. ಇದರೊಂದಿಗೆ 2016ರಲ್ಲಿ ತಾವು ಅತಿಹೆಚ್ಚು ಮತಗಳಿಕೆಗೆ ನೆರವಾದ ರಾಜ್ಯಗಳ ಪೈಕಿ ತಾವು ಕಡಿದ ಡೆಮಾಕ್ರಟಿಕ್ ಭದ್ರಕೋಟೆಗಳಾದ ಮಿಚಿಗನ್, ಪೆನ್ಸಿಲ್ವೇನಿಯಾ ಉಳಿಸಿಕೊಳ್ಳುವುದು ಟ್ರಂಪ್ಗೆ ಪ್ರಮುಖವಾಗಿದೆ. ಮುಖ್ಯವಾಗಿ ಬಿಡೆನ್ ಅವರಿಂದ ತೀವ್ರ ಮಟ್ಟದ ಸ್ಪರ್ಧೆ ಎದುರಾಗುತ್ತಿರುವ ಅರಿಜೊನಾ ಮತ್ತು ಫ್ಲಾರಿಡಾ ರಾಜ್ಯಗಳತ್ತ ಟ್ರಂಪ್ ಅವರು ಹೆಚ್ಚು ಗಮನಹರಿಸಬೇಕಿದೆ ಎನ್ನುವುದು ತಜ್ಞರ ಅಭಿಮತ.
ಎಫ್ಎಟಿಎಫ್ ಬೂದುಪಟ್ಟಿಯಲ್ಲೇ ಮುಂದುವರಿದ ಪಾಕಿಸ್ತಾನ..! ಕೂದಲೆಳೆ ಅಂತರದಿಂದ ಕಪ್ಪುಪಟ್ಟಿಯಿಂದ ಪಾರು
ಹೊಸ ಮತದಾರರು, ಕಾರ್ಮಿಕರೇ ನಿರ್ಣಾಯಕ!
ರಿಪಬ್ಲಿಕನ್ ಪಕ್ಷವು ಫ್ಲೋರಿಡಾ ಮತ್ತು ಪೆನ್ಸಿಲ್ವೇನಿಯಾದಲ್ಲಿ ತಮ್ಮ ರಣತಂತ್ರದ ಭಾಗವಾಗಿ ಈಗಾಗಲೇ ಅರ್ಹರಾದ ಹೆಚ್ಚೆಚ್ಚು ಮತದಾರರನ್ನು ಪಟ್ಟಿಗೆ ಸೇರ್ಪಡೆ ಮಾಡಿದೆ. ಇದರೊಂದಿಗೆ ಶ್ವೇತವರ್ಣೀಯ ಸಮುದಾಯದಲ್ಲಿನ ಕಾರ್ಮಿಕರನ್ನು ತನ್ನತ್ತ ಸೆಳೆಯುವಲ್ಲಿ ಹರ ಸಾಹಸಪಡುತ್ತಿದೆ. ಈ ಮುಂಚೆ ಮತದಾನದಿಂದ ದೂರ ಉಳಿದವರನ್ನು ಈ ಒಂದು ಬಾರಿಯಾದರೂ ಮತಗಟ್ಟೆಗೆ ಸೆಳೆಯಲು ರಿಪಬ್ಲಿಕನ್ ಬೆಂಬಲಿಗರು ಯಾವುದೇ ಕಸರತ್ತು ಕೂಡ ಬಾಕಿ ಉಳಿಸಿಲ್ಲ. ಇದು ಯಶಸ್ವಿಯಾದಲ್ಲಿ ಟ್ರಂಪ್ ಅವರಿಗೆ ಹೆಚ್ಚಿನ ಅಂತರದಲ್ಲಿ ಜಯ ಕಟ್ಟಿಟ್ಟಬುತ್ತಿ ಎಂದು ಅಮೆರಿಕದ ಮಾಜಿ ಅಧ್ಯಕ್ಷ ಜಾರ್ಜ್ ಬುಷ್ ಅವರಿಗೆ ಶ್ವೇತಭವನದಲ್ಲಿ ರಾಜಕೀಯ ನಿರ್ದೇಶಕರಾಗಿದ್ದ ಸಾರಾ ಫ್ಯಾಗೆನ್ ಅಭಿಪ್ರಾಯಪಟ್ಟಿದ್ದಾರೆ. ಕಾಲೇಜು ಶಿಕ್ಷಣ ಮತ್ತು ಉನ್ನತ ಮಟ್ಟದ ಶಿಕ್ಷಣ ಪಡೆಯದ ಶಿಕ್ಷಿತರ ಯುವ ಸಮುದಾಯವೇ ಟ್ರಂಪ್ಗೆ ವಿಜಯದ ಮಾರ್ಗ ತೋರಿಸಬಲ್ಲದು ಎನ್ನುವುದು ಅವರ ಮಾತಾಗಿದೆ.
ಚೀನಾ, ಭಾರತದ ಗಾಳಿ ಕಲುಷಿತವಾಗಿದೆ: ಬಿಡೆನ್ ಜೊತೆಗಿನ ಮುಖಾಮುಖಿ ಚರ್ಚೆಯಲ್ಲಿ ಟ್ರಂಪ್ ಹೇಳಿಕೆ
ಕೊರೊನಾ ಬಗ್ಗೆ ಗಾಂಭೀರ್ಯತೆ ಬೇಕು!
ತಮ್ಮ ಆಡಳಿತ ವೈಫಲ್ಯಕ್ಕೆ ಪ್ರತಿಪಕ್ಷಗಳ ಪಾಲಿನ ಬ್ರಹ್ಮಾಸ್ತ್ರ ಆಗಲಿದೆ ಎಂದು ಅರಿತಿರುವ ಟ್ರಂಪ್ ಕಳೆದ ಏಳು ತಿಂಗಳಿಂದಲೂ ಕೊರೊನಾ ಸಾಂಕ್ರಾಮಿಕ ನಿರ್ವಹಣೆಯನ್ನು ಹಗುರವಾಗಿ ಪರಿಗಣಿಸಿ, ಚೀನಾ ಮೇಲೆ ಗೂಬೆ ಕೂರಿಸುವುದರಲ್ಲಿಯೇ ಹೆಚ್ಚು ಸಮಯ ಕಳೆದಿದ್ದಾರೆ. ಆದರೆ ಇದು ಅಮೆರಿಕದಲ್ಲಿ ಲಕ್ಷಗಟ್ಟಲೆ ಸೋಂಕಿತರು ಬಲಿಯಾಗಲು ಕಾರಣವಾಗಿದೆ ಎನ್ನುವುದು ಜನಸಾಮಾನ್ಯನ ಮನಸ್ಸಲ್ಲಿ ಬೇರೂರುತ್ತಿದೆ. ಇದನ್ನು ಹೋಗಲಾಡಿಸಲು ಈಗಲಾದರೂ ಒಂದು ವಾರದ ಮಟ್ಟಿಗೆ ಟ್ರಂಪ್ ಕೊರೊನಾ ನಿರ್ವಹಣೆಯಲ್ಲಿ ಗಾಂಭೀರ್ಯತೆ ಪಾಲಿಸಿ ಸಾಂಕ್ರಾಮಿಕ ಪ್ರಸರಣ ಗತಿಯನ್ನು ತಗ್ಗಿಸಲು ಯಶಸ್ವಿಯಾದರೆ ಇನ್ನೊಂದು ಅವಧಿಗೆ ಅಧ್ಯಕ್ಷೀಯ ಚುಕ್ಕಾಣಿ ಒಲಿಯುವುದು ದೂರವಿಲ್ಲ ಎನ್ನುತ್ತಾರೆ ಡೆಮಾಕ್ರಟಿನ್ ಪಕ್ಷದ ಚುನಾವಣಾ ತಂತ್ರಗಾರಿಕೆ ಸಲಹೆಗಾರ್ತಿ ಸ್ಟಿಫನಿ ಕಟ್ಟರ್.