ಮಲೇರಿಯಾ ರೋಗ ತಡೆಗಟ್ಟುವ ಲಸಿಕೆ ಅಭಿವೃದ್ಧಿ

ಲಿಲೊಂಗ್ವೆ: ವಿಶ್ವ ಮಲೇರಿಯಾ ದಿನವಾದ ಮಂಗಳವಾರದಂದು ಆಫ್ರಿಕಾ ಖಂಡದ ಮಲಾವಿ ದೇಶದ ರಾಜಧಾನಿ ಲಿಲೊಂಗ್ವೆಯಲ್ಲಿ ಮೊಟ್ಟ ಮೊದಲ ಬಾರಿಗೆ ಮಲೇರಿಯಾ ರೋಗ ಗುಣಪಡಿಸುವ ಲಸಿಕೆಯನ್ನು ಮಕ್ಕಳಿಗೆ ಹಾಕಲಾಯಿತು.

ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯೂಎಚ್‌ಒ)ಯ ಪ್ರಕಾರ, ಪ್ರತಿ ವರ್ಷ ಸರಾಸರಿ 4,35,000 ಜನರು ಮಲೇರಿಯಾ ರೋಗಕ್ಕೆ ತುತ್ತಾಗಿ ಮೃತಪಡುತ್ತಿದ್ದಾರೆ. ಈ ಪೈಕಿ ಐದು ವರ್ಷದೊಳಗಿನ ಮಕ್ಕಳೇ ಅಧಿಕ.

ಮೂವತ್ತು ವರ್ಷಗಳ ಶ್ರಮದ ನಂತರ ಮಲೇರಿಯಾ ಗುಣಪಡಿಸುವ ಆರ್‌ಟಿಎಸ್‌,ಎಸ್‌ ಲಸಿಕೆಯನ್ನು ಅಭಿವೃದ್ಧಿಪಡಿಸಲಾಗಿದೆ. ಇದು ಮಕ್ಕಳಲ್ಲಿ ಮಲೇರಿಯಾ ರೋಗವನ್ನು ಗಣನೀಯವಾಗಿ ತಗ್ಗಿಸಲಿದೆ ಎಂಬುದು ಪ್ರಯೋಗಗಳಿಂದ ಸಾಬೀತಾಗಿದೆ. ಹತ್ತು ಮಲೇರಿಯಾ ಪ್ರಕರಣಗಳ ಪೈಕಿ ನಾಲ್ಕರಲ್ಲಿ ರೋಗ ತಡೆಗಟ್ಟಲು ಲಸಿಕೆ ಯಶಸ್ವಿಯಾಗಿರುವುದು ಪ್ರಾಯೋಗಿಕ ಪರೀಕ್ಷೆಗಳಿಂದ ರುಜುವಾತಾಗಿದೆ ಎಂದು ಡಬ್ಲ್ಯೂಎಚ್‌ಒ ತಿಳಿಸಿದೆ.

ಮೊದಲ ಬಾರಿಗೆ ಮಲಾವಿ ದೇಶದಲ್ಲಿ ಎರಡು ವರ್ಷದೊಳಗಿನ ಮಕ್ಕಳಿಗೆ ಆರ್‌ಟಿಎಸ್‌,ಎಸ್‌ ಲಸಿಕೆ ಲಭ್ಯವಿದ್ದು, ಮುಂದಿನ ವಾರಗಳಲ್ಲಿ ಘಾನಾ ಮತ್ತು ಕೀನ್ಯಾ ದೇಶಗಳಲ್ಲಿ ಲಸಿಕೆ ಪರಿಚಯಿಸಲಾಗುವುದು ಎಂದು ಡಬ್ಲ್ಯೂಎಚ್‌ಒ ತಿಳಿಸಿದೆ.

ಪ್ರತಿ ಎರಡು ನಿಮಿಷಕ್ಕೆ ಒಂದು ಮಗು ಮಲೇರಿಯಾ ರೋಗದಿಂದ ಅಸುನೀಗುತ್ತಿದೆ. ಆಫ್ರಿಕಾ ಖಂಡದಲ್ಲಿ ಮಲೇರಿಯಾ ರೋಗದಿಂದ ಮೃತಪಡುವ ಮಕ್ಕಳ ಸಂಖ್ಯೆ ಅಧಿಕವಿದ್ದು, ಇಲ್ಲಿ ಪ್ರತಿ ವರ್ಷ 2,50,000ಕ್ಕೂ ಹೆಚ್ಚು ಮಕ್ಕಳು ರೋಗದಿಂದ ನಿಧನರಾಗುತ್ತಾರೆ.