ನವಾಜ್ ಷರೀಫ್‍ಗೆ ಕೈಕೊಟ್ಟ ಜಿನ್‌ಪಿಂಗ್!

ಬೀಜಿಂಗ್: ಕಝಕಿಸ್ತಾನ ರಾಜಧಾನಿ ಅಸ್ತಾನಾದಲ್ಲಿ ನಡೆದ ಶಾಂಘೈ ಸಹಕಾರ ಸಂಘಟನೆ (ಎಸ್‍ಸಿಒ) ಶೃಂಗಸಭೆ ಸಂದರ್ಭದಲ್ಲಿ ಒಂದು ಅನಿರೀಕ್ಷಿತ ಘಟನೆ ಸಂಭವಿಸಿದೆ. ಭಾರತ ಪ್ರಧಾನಮಂತ್ರಿ ನರೇಂದ್ರ ಮೋದಿಯೊಂದಿಗೆ ಭೇಟಿಯಾದ ಚೀನಾ ಅಧ್ಯಕ್ಷ ಕ್ಸಿ ಜಿನ್‍ಪಿಂಗ್...ತನ್ನ ಆಪ್ತಮಿತ್ರ ಪಾಕಿಸ್ತಾನ ಪ್ರಧಾನಮಂತ್ರಿ ನವಾಜ್ ಷರೀಪ್‌ಗೆ ಶಾಕ್ ಕೊಟ್ಟಿದ್ದಾರೆ.

ಈ ಶೃಂಗಸಭೆಯಲ್ಲಿ ಜಿನ್‌ಪಿಂಗ್-ಷರೀಫ್ ಭೇಟಿಯಾಗಿ, ದ್ವಿಪಕ್ಷೀಯ ಮಾತುಕತೆ ನಡೆಸುತ್ತಾರೆಂದು ಎಲ್ಲರೂ ಭಾವಿಸಿದ್ದರು. ಆದರೆ ಈ ಮುಖಂಡರಿಬ್ಬರು ಭೇಟಿಯಾಗಲೇ ಇಲ್ಲ. ಭಾರತ ಪ್ರಧಾನಿ ಮೋದಿ ಸೇರಿದಂತೆ ತಜಕಿಸ್ತಾನ್, ತುರ್ಕಮೇನಿಸ್ತಾನ್, ಸ್ಪೇನ್ ಮುಖಂಡರೊಂದಿಗೆ ವಿಶೇಷವಾಗಿ ಭೇಟಿ ಆದ ಜಿನ್‌ಪಿಂಗ್, ಪಾಕ್ ಪ್ರಧಾನಿ ಷರೀಫ್‌ರನ್ನು ಭೇಟಿಯಾಗಲು ನಿರಾಕರಿಸಿದರು.

ಭಾರತದೊಂದಿಗೆ ಗಡಿ ತಕರಾರು ಇಟ್ಟುಕೊಂಡಿರುವ ಚೀನಾ....ಪಾಕಿಸ್ತಾನಕ್ಕೆ ಹತ್ತಿರವಾಗುತ್ತಾ ಮಿತ್ರದೇಶವೆಂದು ಬಿಂಬಿಸಿಕೊಳ್ಳುತ್ತಿರುವ ಸಂಗತಿ ಗೊತ್ತಿರುವುದೇ. ಬಹಳಷ್ಟು ಸಂಗತಿಗಳಲ್ಲಿ ಪಾಕನ್ನು ಬೆನ್ನಿಗಿಟ್ಟುಕೊಂಡೇ ಸಾಗುತ್ತಿದೆ ಡ್ರಾಗನ್. ಆದರೆ ಅಂತಾರಾಷ್ಟ್ರೀಯ ವೇದಿಕೆ ಮೇಲೆ ಭಾರತದೊಂದಿಗೆ ರಾಜತಾಂತ್ರಿಕ ಚರ್ಚೆ ನಡೆಸುವ ಸಮಯದಲ್ಲಿ ಪಾಕನ್ನು ದೂರ ಇಟ್ಟಿರುವುದು ಗಮನಾರ್ಹ.

ಗಲಬೆ ಪೀಡಿತ ಬಲೂಚಿಸ್ಥಾನದಲ್ಲಿ ಇಬ್ಬರು ಚೀನಿಯರನ್ನು ಅಪಹರಣ ಮಾಡಿ ಹತ್ಯೆ ಮಾಡಲಾಗಿತ್ತು. ಈ ಘಟನೆಯನ್ನು ಚೀನಾ ತೀವ್ರವಾಗಿ ಖಂಡಿಸಿತ್ತು. ಚೀನಾ ಪೌರರ ಹತ್ಯೆಗೆ ಐಎಸ್ಐಎಸ್ ಕಾರಣ ಎಂಬ ಸುದ್ದಿಯ ಹಿನ್ನೆಲೆಯಲ್ಲಿ ಗರಂ ಆದ ಜಿನ್‌ಪಿಂಗ್, ಷರೀಫ್‌ರನ್ನು ಭೇಟಿಯಾಗದಂತೆ ದೂರ ಇಡಲು ಕಾರಣ ಎನ್ನಲಾಗಿದೆ.