ಯಾದಗಿರಿಯಲ್ಲಿ ಮತ್ತೆ 60 ಕೊರೊನಾ ಕೇಸ್‌..! ಜಿಲ್ಲೆಯಲ್ಲಿ ವೇಗದ ದ್ವಿಶತಕ ಬಾರಿಸಿದ ವೈರಸ್‌

ಯಾದಗಿರಿ: ಜಿಲ್ಲೆಯಲ್ಲಿ ಕೊರೊನಾ ವೈರಸ್ ಮತ್ತೊಮ್ಮೆ ಅಬ್ಬರಿಸಿದ್ದು, ಗಿರಿನಾಡಿನ ಜನತೆಯಲ್ಲಿ ಆತಂಕ ಮನೆ ಮಾಡಿದೆ. ಕಳೆದ ಶನಿವಾರವಷ್ಟೇ 72 ಪಾಸಿಟಿವ್‌ ಪ್ರಕರಣಗಳು ವರದಿಯಾಗಿದ್ದ ಜಿಲ್ಲೆಯಲ್ಲಿ, ಶುಕ್ರವಾರ ಮತ್ತೆ 60 ಪ್ರಕರಣಗಳು ವರದಿಯಾಗಿವೆ. ಈ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 223ಕ್ಕೆ ಏರಿಕೆಯಾಗಿದೆ.

ರಾಜ್ಯ ಆರೋಗ್ಯ ಇಲಾಖೆ ಬಿಡುಗಡೆ ಮಾಡಿದ ಮಧ್ಯಾಹ್ನದ ವರದಿಯಲ್ಲಿ 60 ಹೊಸ ಪಾಸಿಟಿವ್‌ ಕೇಸ್‌ಗಳು ಜಿಲ್ಲೆಯಲ್ಲಿ ಪತ್ತೆಯಾಗಿವೆ. ದಿನದಿಂದ ದಿನಕ್ಕೆ ಕೊರೊನಾ ವೈರಸ್‌ ಪ್ರಕರಣಗಳ ಸಂಖ್ಯೆ ಭಾರಿ ಪ್ರಮಾಣದಲ್ಲಿ ಏರುತ್ತಿರುವುದು ಜಿಲ್ಲಾಡಳಿತದ ನಿದ್ದೆಗೆಡಿಸಿದೆ. ಇಂದು ಪತ್ತೆಯಾದ ಎಲ್ಲ ಹೊಸ ಸೋಂಕಿತರು ನೆರೆಯ ಮಹಾರಾಷ್ಟ್ರದಿಂದ ಬಂದಿರುವ ಕಾರ್ಮಿಕರು ಆಗಿದ್ದಾರೆ.

ಮಹಾರಾಷ್ಟ್ರದಿಂದ ಕೆಲವರು ಸಾರ್ವಜನಿಕ ಸಾರಿಗೆ ಮೂಲಕ, ಕೆಲವರು ಖಾಸಗಿ ವಾಹನಗಳ ಮೂಲಕ ಜಿಲ್ಲೆಗೆ ಬಂದಿದ್ದಾರೆ. ಆದ್ದರಿಂದ, ಮುನ್ನೆಚ್ಚರಿಕಾ ಕ್ರಮವಾಗಿ ಎಲ್ಲರನ್ನೂ ಕ್ವಾರಂಟೈನ್‌ ಮಾಡಲಾಗಿತ್ತು. ಆದರೆ, ಸೋಂಕಿತರ ಟ್ರಾವೆಲ್ ಹಿಸ್ಟರಿ ಪತ್ತೆ ಮಾಡುವುದೇ ಅಧಿಕಾರಿಗಳಿಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.

ಕರ್ನಾಟಕ ಕೊರೊನಾ ಟ್ರ್ಯಾಕರ್‌: 2711 ಸೋಂಕಿತರು, 47 ಸಾವು

ಇನ್ನು, ಕ್ವಾರಂಟೈನ್‌ ಕೇಂದ್ರಗಳೇ ಕೊರೊನಾ ಸೋಂಕು ಹಬ್ಬುವ ಹಾಟ್ ಸ್ಪಾಟ್ ಕೇಂದ್ರಗಳಾಗಿವೆ.‌ ಇದು ಕೂಡ ಜಿಲ್ಲಾಡಳಿತಕ್ಕೆ ತಲೆ ನೋವಾಗಿ ಪರಿಣಮಿಸಿದೆ.
ಮಕ್ಕಳು, ವಯೋವೃದ್ದರು ಮತ್ತು ಗರ್ಭಿಣಿಯರು ಕ್ವಾರಂಟೈನ್‌ನಲ್ಲಿ ಇರುವುದರಿಂದ ಅವರಿಗೂ ಸಹ ಈ ಸೋಂಕು ತಗುಲುವ ಸಾಧ್ಯತೆ ಹೆಚ್ಚಿದೆ. ಇನ್ನು, ನೆರೆ ಜಿಲ್ಲೆ ರಾಯಚೂರಿನಲ್ಲೂ ಇಂದು 62 ಪಾಸಿಟಿವ್‌ ಪ್ರಕರಣಗಳು ಪತ್ತೆಯಾಗಿವೆ.

ರಾಯಚೂರಿನಲ್ಲಿ ಕೊರೊನಾ 'ಮಹಾ' ಸ್ಫೋಟ..! ಒಂದೇ ದಿನ 62 ಪಾಸಿಟಿವ್‌ ಕೇಸ್‌ ಪತ್ತೆ

ಇಂದು ಪತ್ತೆಯಾದ 60 ಹೊಸ ಸೋಂಕಿತರ ಪೈಕಿ 23 ಜನ ಮಹಿಳೆಯರು, 7 ಜನ ಮಕ್ಕಳು ಸೇರಿದ್ದಾರೆ. ಇದುವರೆಗೂ ಜಿಲ್ಲೆಯಲ್ಲಿ 223 ಸೋಂಕಿತರು ಪತ್ತೆಯಾಗಿದ್ದು, 9 ಜನಗುಣಮುಖರಾಗಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದರೆ, ಒಬ್ಬರು ಕೊರೊನಾದಿಂದ ಮೃತಪಟ್ಟಿದ್ದಾರೆ. ಇನ್ನು, ರಾಜ್ಯದಲ್ಲಿ ಕೊರೊನಾ ತನ್ನ ಆರ್ಭಟ ಮುಂದುವರೆಸಿದ್ದು, ಶುಕ್ರವಾರ ಬರೋಬ್ಬರಿ 178 ಕೊರೊನಾ ವೈರಸ್‌ ಪ್ರಕರಣಗಳು ಕಂಡುಬಂದಿದ್ದು, ಸೋಂಕಿತರ ಸಂಖ್ಯೆ 2711ಕ್ಕೆ ಏರಿಕೆಯಾಗಿದೆ.

ಯಾದಗಿರಿಯಲ್ಲಿ ಕೊರೊನಾ ತೀವ್ರತೆ; ಇನ್ನಿಲ್ಲದೆ ಕಾಡುತ್ತಿದೆ ವೈದ್ಯರ ಕೊರತೆ