ಭೀಮೆಯಲ್ಲಿ ದಸರಾ ಸ್ನಾನ

ಯಾದಗಿರಿ: ಆಯುಧ ಪೂಜೆ ಮತ್ತು ವಿಜಯ ದಶಮಿ ದಿನ ಭೀಮಾ ಪುಷ್ಕರದಲ್ಲಿ ಸಹಸ್ರಾರು ಭಕ್ತರು ಸ್ನಾನ ಮಾಡಿದರು. ಶಹಾಪುರ ತಾಲೂಕಿನ ವಡಗೇರಾ ಗ್ರಾಮದಲ್ಲಿ ಭೀಮಾ ಪಷ್ಕರ ಮಹೋತ್ಸವ ನಡೆಯುತ್ತಿದೆ. ಈ ಎರಡು ದಿನ ಜನರ ಅಪಾರ ಸಂಖ್ಯೆಯಲ್ಲಿ ನೆರೆದಿದ್ದರು.

ರಜಾ ದಿನ ಹಿನ್ನೆಲೆಯಲ್ಲಿ ಎಲ್ಲರೂ ಹಬ್ಬಕ್ಕಾಗಿ ಊರಿಗೆ ಆಗಮಿಸಿದ್ದರು. ಆದರೆ, ಈ ಭೀಮಾ ಪುಷ್ಕರ ಮಹೋತ್ಸವ 12ವರ್ಷಕ್ಕೊಮ್ಮೆ ನಡೆಯುತ್ತಿರುವ ಪರಿಣಾಮ ಕುಟುಂಬ ಸಮೇತರಾಗಿ ಆಗಮಿಸುವ ಮೂಲಕ ಪುಷ್ಕರ ಮಹೋತ್ಸವದಲ್ಲಿ ಸ್ನಾನ ಮಾಡಿದರು.

ಭೀಮಾ ಪುಷ್ಕರ ಮಹೋತ್ಸವ ಸಂದರ್ಭದಲ್ಲಿ ಸ್ನಾನ ಮಾಡಿದರೇ ಪುಣ್ಯ ಪ್ರಾಪ್ತಿ ಆಗಿ ಜೀವನದಲ್ಲಿ ಬದಲಾವಣೆ ಕಾಣಬಹುದು ಎಂಬ ಪ್ರತೀತಿ ಇದೆ. ಹೀಗಾಗಿಯೇ ಜನರು ಅಪಾರ ಪ್ರಮಾಣದಲ್ಲಿ ಆಗಮಿಸುವ ಮೂಲಕ ಭೀಮಾ ನದಿಯಲ್ಲಿ ಮಿಂದೇಳುತ್ತಿರುವುದು ಎಲ್ಲೆಡೆ ಕಂಡು ಬಂದಿತು.

ಶಾಸಕ ಮತ್ತು ಮಾಜಿ ಸಚಿವ ನರಸಿಂಹನಾಯಕ ಮತ್ತು ಮಾಜಿ ಶಾಸಕ ಡಾ.ವೀರಬಸವಂತರೆಡ್ಡಿ ಮುದ್ನಾಳ ಅವರು ಸಹ ಪುಷ್ಕರ ಮಹೋತ್ಸವಕ್ಕೆ ಆಗಮಿಸಿ ವಿಶೇಷ ಪೂಜೆ ಸಲ್ಲಿಸಿದರು.