ಅಬಕಾರಿ ದಾಳಿ: ಇಬ್ಬರು ಆರೋಪಿಗಳ ಬಂಧನ

ಯಾದಗಿರಿ : ನಗರದ ವಾಡಿ ರಸ್ತೆಯ ಅಲ್ಲಿಪುರ ಕ್ರಾಸ್‌ ಬಳಿ ಎರಡು ದ್ವಿಚಕ್ರ ವಾಹನಗಳಲ್ಲಿ ಅಕ್ರಮವಾಗಿ ಸಾಗಿಸುತ್ತಿದ್ದ 7 ಲೀಟರ್‌ ಮದ್ಯ, 30 ಲೀಟರ್‌ ಬೀಯರ್‌ ಹಾಗೂ ಬೈಕ್‌ಗಳನ್ನು ಅಬಕಾರಿ ಪೊಲೀಸರು ಸೋಮವಾರ ವಶಪಡಿಸಿಕೊಂಡು, ಇಬ್ಬರನ್ನು ಬಂಧಿಸಿದ್ದಾರೆ.

ಅಬಕಾರಿ ಇಲಾಖೆಯ ಅಧಿಕಾರಿಗಳು ಎರಡು ಪ್ರತ್ಯೇಕ ಪ್ರಕರಣ ದಾಖಲಿಸಿಕೊಂಡಿದ್ದು, ಆರೋಪಿಗಳಾದ ವೆಂಕಟೇಶ ತಂದೆ ಮರೆಪ್ಪ ಮತ್ತು ಈಶ್ವರ ತಂದೆ ಚಂದ್ರಶೇಖರ ಅವರನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಮದ್ಯ, ಬಿಯರ್‌ ಹಾಗೂ ಬೈಕ್‌ಗಳ ಮೌಲ್ಯ ರೂ.1,09,000 ಎಂದು ಅಂದಾಜಿಸಲಾಗಿದೆ. ಚುನಾವಣಾ ಮಾದರಿ ನೀತಿ ಸಂಹಿತೆ ಮಾರ್ಗಸೂಚಿ ಅನ್ವಯ ಕಲಬುರಗಿ ವಿಭಾಗದ ಅಬಕಾರಿ ಜಂಟಿ ಆಯುಕ್ತ ಎಫ್‌.ಎಚ್‌. ಚಲವಾದಿ ಅವರ ಆದೇಶದ ಮೇರೆಗೆ ಯಾದಗಿರಿಯ ಅಬಕಾರಿ ಉಪ ಆಯುಕ್ತ ಜಿ.ಪಿ.ನರೇಂದ್ರಕುಮಾರ ಅವರ ನೇತೃತ್ವದಲ್ಲಿ ದಾಳಿ ಮಾಡಲಾಗಿದೆ. ಡಿಸಿಇಐಬಿ ಸ್ಕ್ವಾಡ್‌ ಅಬಕಾರಿ ನಿರೀಕ್ಷಕ ವಿ.ಕೆ.ಗಾಣಿಗೇರ, ಶಹಾಪೂರ ಉಪ ವಿಭಾಗ ಅಬಕಾರಿ ನಿರೀಕ್ಷಕ ಎಲ್‌.ಎಸ್‌.ಸಲಗರೆ, ಯಾದಗಿರಿ ವಲಯ ಅಬಕಾರಿ ಉಪ ನಿರೀಕ್ಷಕ ಸಿದ್ರಾಮಪ್ಪ ತಾಳಿಕೋಟೆ ಹಾಗೂ ಸಿಬ್ಬಂದಿ ದಾಳಿಯಲ್ಲಿ ಪಾಲ್ಗೊಂಡಿದ್ದರು.