ಡೆಡ್ಲಿ‌ ಕೊರೊನಾಗೆ ಯಾದಗಿರಿಯಲ್ಲಿ ಮೊದಲ ಬಲಿ; 150ರ ಗಡಿ ದಾಟಿದ ಸೋಂಕಿತರ ಸಂಖ್ಯೆ

ಯಾದಗಿರಿ: ಡೆಡ್ಲಿ ವೈರಸ್‌ ಕೊರೊನಾ ಯಾದಗಿರಿಗೂ ಸಾವಿನ ಸರಪಳಿಯನ್ನು ವಿಸ್ತರಿಸಿದ್ದು, ಜಿಲ್ಲೆಯಲ್ಲಿ ಕೋವಿಡ್‌-19ಗೆ ಮೊದಲ ಬಲಿಯಾಗಿದೆ. ಮೇ 21ರಂದು ಮೃತಪಟ್ಟ 69 ವರ್ಷದ ಮಹಿಳೆಯ ಕೊರೊನಾ ಪರೀಕ್ಷಾ ವರದಿ ಪಾಸಿಟಿವ್ ಬಂದಿದೆ. ಈ ಸಾವಿನೊಂದಿಗೆ ರಾಜ್ಯದಲ್ಲಿ ಕೊರೊನಾದಿಂದ ಸಾವನ್ನಪ್ಪಿದವರ ಸಂಖ್ಯೆ 45ಕ್ಕೆ ಏರಿಕೆಯಾಗಿದೆ.

ಮುಂಬೈನಿಂದ ಜಿಲ್ಲೆಗೆ ಮರಳುವಾಗ ಯರಗೋಳ ಚೆಕ್ ಪೋಸ್ಟ್‌ನಲ್ಲಿ ತೀವ್ರ ಹುಸಿರಾಟದ ತೊಂದರೆಯಿಂದ ಮಹಿಳೆ ಜ್ಞಾನ ತಪ್ಪಿ ಬಿದ್ದಿದ್ದಳು. ಕೋವಿಡ್‌ ಆಸ್ಪತ್ರೆಗೆ ಸಾಗಿಸುವ ಮುನ್ನವೇ ಮಹಿಳೆ ಮಾರ್ಗ ಮಧ್ಯೆ ಸಾವನ್ನಪ್ಪಿದ್ದರು. ಆ ನಂತರ ಮಹಿಳೆಯ ಸ್ಯಾಂಪಲ್‌ನ್ನು ಪರೀಕ್ಷೆಗೆ ಕಳುಹಿಸಲಾಗಿತ್ತು.

ಇಂದು ಮಹಿಳೆಯ ವರದಿ ಪಾಸಿಟಿವ್ ಬಂದಿದ್ದು, ಜಿಲ್ಲೆಯಲ್ಲಿ ಕೊರೊನಾಗೆ ಮೊದಲ ಸಾವು ಸಂಭವಿಸಿದಂತಾಗಿದೆ. ಮೃತ ಮಹಿಳೆಯನ್ನು ಯಾದಗಿರಿ ತಾಲೂಕಿನ ಅರಕೇರ (ಬಿ) ಬಳಿಯ ಬಸವನಗರ ತಾಂಡದ ಮಹಿಳೆ ಎಂದು ಗುರುತಿಸಲಾಗಿದ್ದು, ಕುಟುಂಬ ಸಮೇತ ಮುಂಬೈನಿಂದ ತಮ್ಮೂರಿಗೆ ಮಹಿಳೆ ಬರುತ್ತಿದ್ದಳು.

ಕರ್ನಾಟಕ ಕೊರೊನಾ ಟ್ರ್ಯಾಕರ್‌: 2405 ಸೋಂಕಿತರು, 45 ಸಾವು

ಇನ್ನು, ಜಿಲ್ಲೆಯಲ್ಲಿ ಕಳೆದ ಒಂದು ವಾರದಿಂದ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಲೆ ಇದ್ದು, ಕ್ಷಿಪ್ರಗತಿಯಲ್ಲಿ ಸೋಂಕಿತರ ಸಂಖ್ಯೆಯಲ್ಲಿ ಶತಕದ ಗಡಿಯನ್ನು ಜಿಲ್ಲೆ ದಾಟಿದೆ. ಇಂದು ಸಹ 16 ಹೊಸ ಪ್ರಕರಣಗಳು ಜಿಲ್ಲೆಯಿಂದ ವರದಿಯಾಗಿದ್ದು, ಇವರು ಸಹ ಮಹಾರಾಷ್ಟ್ರದಿಂದ ಬಂದವರಾಗಿದ್ದಾರೆ. ಈ ಮೂಲಕ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 156ಕ್ಕೆ ಏರಿದೆ.

ಕಲಬುರಗಿಯಲ್ಲಿ ಮುಂದುವರಿದ ಕೊರೊನಾ ಓಟ..! ಮತ್ತೆ 28 ಪಾಸಿಟಿವ್‌ ಕೇಸ್‌ ಪತ್ತೆ

ರಾಜ್ಯದಲ್ಲಿ ಇಂದು 122 ಪಾಸಿಟಿವ್‌ ಪ್ರಕರಣಗಳು ವರದಿಯಾಗಿವೆ. ಈ ಪ್ರಕರಣಗಳು ಸೇರಿ ಇದುವರೆಗೂ ಕರ್ನಾಟಕದಲ್ಲಿ 2405 ಸೋಂಕಿತರು ಪತ್ತೆಯಾಗಿದ್ದಾರೆ. ಇದರಲ್ಲಿ 45 ಜನ ಕೊರೊನಾದಿಂದ ಸಾವನ್ನಪ್ಪಿದ್ದರೆ, ಇಬ್ಬರು ಅನ್ಯ ಕಾರಣದಿಂದ ಸಾವನ್ನಪ್ಪಿದ್ದಾರೆ. ಇದುವರೆಗೂ 762 ಜನ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.

ರಾಜ್ಯದಲ್ಲಿ ಮತ್ತೆ ಕೊರೊನಾ ಸೆಂಚುರಿ, 122 ಹೊಸ ಪ್ರಕರಣ, 1 ಬಲಿ; ಕಲಬುರಗಿಯಲ್ಲಿ 28 ಪಾಸಿಟಿವ್‌!