ಮಲ್ಲಪ್ಪ ಸಂಕೀನ್
ಯಾದಗಿರಿ: ನಗರದಲ್ಲಿ ಶೇ 50ರಷ್ಟು ಜನರಿಗೆ ಶೌಚಾಲಯ ಇಲ್ಲದಿರುವುದು ಸಮೀಕ್ಷೆಯಿಂದ ಬಯಲಿಗೆ ಬಂದಿದೆ. ಬಯಲು ಶೌಚಾಲಯ ಮುಕ್ತ ನಗರವನ್ನಾಗಿ ಮಾಡಲು ಹೊರಟಿರುವ ಯಾದಗಿರಿ ನಗರಸಭೆಗೆ ಸಾರ್ವಜನಿಕರ ನಿರಾಸಕ್ತಿ ಆರಂಭದಲ್ಲೇ ವಿಘ್ನ ಎದುರಾಗಿದೆ.
ಸ್ವಚ್ಛ ಭಾರತ ಮಿಷನ್ ಯೋಜನೆಯಡಿ ನಗರಸಭೆಯು ಪ್ರತಿಯೊಂದು ಕುಟುಂಬಕ್ಕೆ ವಯುಕ್ತಿಕ ಶೌಚಾಲಯ ನಿರ್ಮಾಣ ಮಾಡಲು ಮುಂದಾಗಿದೆ. ಇದಕ್ಕಾಗಿಯೇ ನಗರದಲ್ಲಿ ಎಷ್ಟು ಕುಟುಂಬಗಳಿವೆ ಎಂಬುದನ್ನು ಪತ್ತೆ ಮಾಡಲು ಖಾಸಗಿ ಸಂಸ್ಥೆ ಮೂಲಕ ಗಣತಿ ಕೈಗೊಳ್ಳಲಾಗಿದೆ.
ಸರ್ವೇ ಪ್ರಕಾರ ನಗರದಲ್ಲಿ 11,500 ಕುಟುಂಬಗಳಿದ್ದು, ಶೇ. 50ರಷ್ಟು ಕುಟುಂಬಗಳಿಗೆ ವಯುಕ್ತಿಕ ಶೌಚಾಲಯವಿಲ್ಲ. 2011ರ ಜನಗಣತಿ ಪ್ರಕಾರ ಯಾದಗಿರಿ ನಗರದ ಜನಸಂಖ್ಯೆ 70 ಸಾವಿರಕ್ಕೂ ಹೆಚ್ಚು . ಇದರಲ್ಲಿ ಬಹುತೇಕ ಕುಟುಂಬಗಳು ವೈಯಕ್ತಿಕ ಶೌಚಾಲಯ ಹೊಂದಿಲ್ಲ. ಈ ಆಂಶವನ್ನು ಗಂಭಿರವಾಗಿ ಪರಿಗಣಿಸಿರುವ ನಗರಸಭೆ ವೈಯಕ್ತಿಕ ಶೌಚಾಲಯ ನಿರ್ಮಾಣಕ್ಕೆ ಯೋಜನೆ ರೂಪಿಸಿದರೂ ಸಾರ್ವಜನಿಕರಿಂದ ಸಹಕಾರ ಸಿಗುತ್ತಿಲ್ಲ ಎಂಬುದು ಅಧಿಕಾರಿಗಳ ಆಳಲು.
ಶೌಚಾಲಯ ಕಟ್ಟಿಸಿಕೊಡಲು ನಗರಸಭೆ 5,500 ಅರ್ಜಿ ಆಹ್ವಾನಿಸಿತ್ತು. ಆದರೆ ಬರೀ 3,570 ಅರ್ಜಿಗಳು ಮಾತ್ರ ಸಲ್ಲಿಕೆಯಾಗಿವೆ. ಬಂದಂತಹ ಅರ್ಜಿಗಳ ಪೈಕಿ 1,697 ಅರ್ಜಿ ಪರಿಶೀಲನೆ ಮಾಡಲಾಗಿದ್ದು, ಈ ಪೈಕಿ ಒಟ್ಟು 1,206 ಶೌಚಾಲಯಗಳನ್ನು ಕಟ್ಟಲು ಅನುಮತಿ ನೀಡಲಾಗಿದೆ. ಇದರಲ್ಲಿ ಈಗಾಗಲೇ 565 ಶೌಚಾಲಯಗಳನ್ನು ಕಟ್ಟಲಾಗಿದೆ. ಉಳಿದ ಶೌಚಾಲಯಗಳ ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿವೆ.
ವೈಯುಕ್ತಿಕ ಶೌಚಾಲಯ ನಿರ್ಮಿಸಿಕೊಳ್ಳಲು ಅರ್ಜಿ ಸಲ್ಲಿಸಿದವರಿಗೆ 15 ಸಾವಿರ ರೂ. ಪ್ರೋತ್ಸಾಹ ಧನ ನೀಡಲಾಗುತ್ತದೆ. ಇಷ್ಟೊಂದು ಪ್ರಮಾಣದಲ್ಲಿ ಹಣ ನೀಡುತ್ತಿದ್ದರೂ ಸಾರ್ವಜನಿಕರು ಸಹಕಾರ ನೀಡದಿರುವುದೇಕೆ ಎಂಬ ಪ್ರಶ್ನೆ ಎದುರಾಗಿದೆ.
ವಯುಕ್ತಿಕ ಶೌಚಾಲಯದ ಮಹತ್ವ ಸಾರಲು ಸಾಕಷ್ಟು ಪ್ರಚಾರ ಮಾಡಲಾಗಿದೆ. ಅಲ್ಲಲ್ಲಿ ಜಾಗೃತಿ ಮೂಡಿಸಲಾಗಿದೆ. ಆದರೆ ನಿರೀಕ್ಷಿತ ಮಟ್ಟದಲ್ಲಿ ಸ್ಪಂದನೆ ಸಾರ್ವಜನಿಕರು ತೋರ್ಪಡಸಿದುರುವುದು ಬೇಸರದ ಸಂಗತಿ ಎಂದು ಮಾತು ಅಧಿಕಾರಿಗಳಿಂದ ಕೇಳಿಬರುತ್ತಿದೆ.
ಯಾದಗಿರಿ ನಗರದಲ್ಲಿ ಒಟ್ಟು 5,500 ಕುಟುಂಬಳಿಗೆ ವಯುಕ್ತಿಕ ಶೌಚಾಲಯವಿಲ್ಲ. ಹೀಗಾಗಿ 5,500 ಅರ್ಜಿಗಳನ್ನು ಕರೆಯಲಾಗಿತ್ತು. ಆದರೆ ಕಡಿಮೆ ಪ್ರಮಾಣದಲ್ಲಿ ಅರ್ಜಿ ಸಲ್ಲಿಸಿದ್ದಾರೆ. ಬಯಲು ಶೌಚ ಮುಕ್ತ ನಗರವನ್ನಾಗಿ ಮಾಡಲು ನಗರಸಭೆ ಪಣ ತೊಟ್ಟಿದ್ದು ಇದಕ್ಕೆ ಸಾರ್ವಜನಿಕರ ಸಹಕಾರ ತುಂಬ ಅಗತ್ಯ.
-ಸಂಗಮೇಶ್ ಉಪಾಸೆ, ಪೌರಾಯುಕ್ತ
ನಗರದಲ್ಲಿ ಒಟ್ಟು ಕುಟುಂಬ 11,500
ವಯುಕ್ತಿಕ ಶೌಚಾಲಯ ಇಲ್ಲದ ಕುಟುಂಬ 5,500
ಅರ್ಜಿ ಆಹ್ವಾನ 5,500
ಸಲ್ಲಿಸಿದವರು 3,570
ಪರಿಶೀಲನೆ 1,697
ಅನುಮತಿ 1,206
ಶೌಚಾಲಯ ನಿರ್ಮಾಣ 565