ದುಷ್ಕರ್ಮಿಗಳ ಬಂಧನಕ್ಕೆ ವೀರಶೈವ ಸಮಾಜ ಒತ್ತಾಯ

ಸುರಪುರ : ಯಾದಗಿರಿ ಬಿಜೆಪಿ ಜಿಲ್ಲಾಧ್ಯಕ್ಷ ಚಂದ್ರಶೇಖರಗೌಡ ಮಾಗನೂರ ಪತ್ನಿ ಮೇಲೆ ನಡೆದಿರುವ ಹಲ್ಲೆ ಬಗ್ಗೆ ತನಿಖೆ ನಡೆಸಿ, ಆರೋಪಿಗಳನ್ನು ತಕ್ಷ ಣ ಬಂಧಿಸಬೇಕು ಎಂದು ಒತ್ತಾಯಿಸಿ ತಾಲೂಕು ವೀರಶೈವ ಸಮಾಜದ ಮುಖಂಡರು ಒತ್ತಾಯಿಸಿದರು.

ಮಾಗನೂರ ಪತ್ನಿ ಮೇಲೆ ನಡೆದ ಘಟನೆಯ ಬಗ್ಗೆ ಇದುವರೆಗೂ ತನಿಖೆಯಲ್ಲಿ ಯಾವುದೇ ಪ್ರಗತಿ ಕಂಡುಬಂದಿಲ್ಲ ಮತ್ತು ಆರೋಪಿಗಳನ್ನು ಇದುವರೆಗೂ ಬಂಧಿಸಿಲ್ಲ ಎಂದು ಆರೋಪಿಸಿದರು. ನಮ್ಮ ವೀರಶೈವ ಲಿಂಗಾಯತ ಸಮಾಜದ ಜನರ ಮೇಲೆ ಮೇಲಿಂದ ಮೇಲೆ ಅನ್ಯಾಯ, ದೌರ್ಜನ್ಯ ಮತ್ತು ಅತ್ಯಾಚಾರ ಕೃತ್ಯಗಳು ನಡೆಯುತ್ತಿವೆ ಎಂದು ಮುಖಂಡರು ದೂರಿದರು.

ಘಟನೆಗೆ ಸಂಬಂಧಿಸಿದಂತೆ ಆರೋಪಿಗಳನ್ನು ಬಂಧಿಸಿ ಸತ್ಯವನ್ನು ಹೊರತರಬೇಕು. ಇಲ್ಲವಾದಲ್ಲಿ ಶನಿವಾರ ತಾಲೂಕು ವೀರಶೈವ ಲಿಂಗಾಯತ ಸಮಿತಿಯು ಸುರಪುರ ಬಂದ್‌ಗೆ ಕರೆ ಕೊಟ್ಟು, ಉಗ್ರ ಪ್ರತಿಭಟನೆ ಕೈಗೊಂಡು ಸಾರ್ವತ್ರಿಕ ವಿಧಾನಸಭಾ ಚುನಾವಣೆ ಬಹಿಷ್ಕರಿಸಬೇಕಾಗುತ್ತದೆ ಎಂದು ಮುಖಂಡರು ಎಚ್ಚರಿಸಿದರು.

ಡಿವೈಎಸ್‌ಪಿ ಶೀಲವಂತ ಹೊಸ್ಮನಿಗೆ ಮನವಿ ಪತ್ರ ಸಲ್ಲಿಸಿದರು. ಸಿಪಿಐ ಪಂಡಿತ ಸಗರ, ಮುಖಂಡರಾದ ಬಸಲಿಂಗಪ್ಪ ಪಾಟೀಲ್‌, ಜಿ.ಎಸ್‌.ಪಾಟೀಲ್‌, ವೀರಪ್ಪ ಅವಂಟಿ, ಬಸವರಾಜ ಜಮದ್ರಖಾನಿ, ರಾಜಶೇಖರಗೌಡ ವಜ್ಜಲ್‌,ಎಚ್‌.ಸಿ.ಪಾಟೀಲ್‌, ಎಸ್‌.ಎನ್‌.ಕನಕರಡ್ಡಿ, ಬಸಣ್ಣ ಬೂದೂರು, ಆದಪ್ಪ ದೇಸಾಯಿ, ಸೂರುಗೇಶ ವಾರದ, ರಾಜಶೇಖರ ಪಾಟೀಲ್‌, ಮಲ್ಲಣ್ಣ ಮಧೋಳ, ಸಂಗಣ್ಣ ಎಕ್ಕೆಳ್ಳಿ, ಸೋಮಶೇಖರ ಶಾಬಾದಿ, ಶಾಂತರಾಜ ಬಾರಿ, ವಿರೇಶ ದೇಶಮುಖ, ಡಾ.ಬಸವರಾಜ ಪಾಟೀಲ್‌. ಮಂಜುನಾಥ ಗುಳಗಿ ಸೇರಿದಂತೆ ಇತರರರಿದ್ದರು.