Ind vs Aus: ಒಳ ಉಡುಪಿನಲ್ಲಿ ನ್ಯಾಪ್ಕಿನ್ ಹಾಕಿಕೊಂಡು ಬ್ಯಾಟಿಂಗ್ ಮಾಡಿದ್ದರಂತೆ ಸಚಿನ್!

ಹೊಸದಿಲ್ಲಿ: ಭಾರತೀಯ ಕ್ರಿಕೆಟ್ ದಂತಕಥೆ, ಕೋಟ್ಯಂತರ ಅಭಿಮಾನಿಗಳ ಪಾಲಿಗೆ ದೇವರಾಗಿರುವ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಈ ಸಮಯ ಇಂಗ್ಲೆಂಡ್‌ನಲ್ಲಿದ್ದು, 2019ರ ವಿಶ್ವಕಪ್‌ನಲ್ಲಿ ಹೊಸ ಇನ್ಸಿಂಗ್‌ನ್ನು ಆರಂಭಿಸಿದ್ದಾರೆ. ಅವರು ಮತ್ತೆ ಮೈದಾನಕ್ಕಿಳಿದಿಲ್ಲ, ಬದಲಾಗಿ ವಿಶ್ವಕಪ್‌ ಪಂದ್ಯಾವಳಿಯಲ್ಲಿ ಸಚಿನ್ ವೀಕ್ಷಕ ವಿವರಣೆಗಾರರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ನಿನ್ನೆ ನಡೆದ ಭಾರತ- ಆಸಿಸ್ ಪಂದ್ಯದಲ್ಲಿ ಎಂದೂ ಮರೆಯಲಾಗದ ನೆನಪೊಂದನ್ನು ಬಿಚ್ಚಿಟ್ಟರು.

2003ರ ವಿಶ್ವಕಪ್‌ನ ಪಂದ್ಯವೊಂದರ ಸಂದರ್ಭದಲ್ಲಿ ಹೊಟ್ಟೆ ಕೆಟ್ಟಿತ್ತು. ಹೀಗಾಗಿ ಒಳ ಉಡುಪಿನಲ್ಲಿ ನ್ಯಾಪ್ಕಿನ್ ಹಾಕಿಕೊಂಡು ಬ್ಯಾಟಿಂಗ್ ಮಾಡಲಿಳಿದಿದ್ದೆ ಎಂದವರು ತಮಾಷೆಯ ಪ್ರಸಂಗವೊಂದನ್ನು ನೆನಪಿಸಿಕೊಂಡಿದ್ದಾರೆ.

ನಾವು ಸೂಪರ್ 6 ಹಂತದಲ್ಲಿ ಶ್ರೀಲಂಕಾವನ್ನು ಎದುರಿಸಬೇಕಿತ್ತು. ಪಂದ್ಯ ಆರಂಭವಾಗುವ ಕೆಲ ಗಂಟೆಗಳ ಮುನ್ನ ನನ್ನ ಹೊಟ್ಟೆ ಕೆಟ್ಟಿತು. ನನ್ನ ಆಟದ ಮೇಲೂ ಇದು ಪರಿಣಾಮ ಬೀರಿತು. ನನ್ನ ಸ್ಥಿತಿ ಎಷ್ಟು ಕೆಟ್ಟಿತ್ತೆಂದರೆ, ಅಂಡರ್‌ವೇರ್‌ನಲ್ಲಿ ನ್ಯಾಪ್ಕಿನ್ ಹಾಕಿಕೊಂಡು ಬ್ಯಾಟಿಂಗ್‌ಗೆ ಇಳಿಯಬೇಕಾಯಿತು. ಪಾನೀಯ ವಿರಾಮದ ಸಂದರ್ಭದಲ್ಲಿ ನಾನು ಡ್ರೆಸ್ಸಿಂಗ್ ರೂಮ್‌ಗೆ ಹೋಗಬೇಕಾಯಿತೆಂದರೆ ನನ್ನ ಅವಸ್ಥೆ ಏನಾಗಿರಬಹುದೆಂದು ನೀವು ಅಂದಾಜಿಸಬಹುದು. ಪರಿಸ್ಥಿತಿ ಸುಧಾರಿಸಬಹುದೆಂದು ಎನರ್ಜಿ ಡ್ರಿಂಕ್ಸ್‌ನಲ್ಲಿ ನಾನು ಒಂದು ಚಮಚ ಉಪ್ಪನ್ನು ಬೆರೆಸಿ ಬಿಟ್ಟೆ. ಇದರಿಂದ ಸಮಸ್ಯೆ ಸರಿ ಹೋಗುವ ಬದಲು ಮತ್ತಷ್ಟು ಬಿಗಡಾಯಿಸಿತು, ಎಂದು ನಗುತ್ತ, ಎಲ್ಲರನ್ನು ನಗಿಸಿದ್ದಾರೆ ಸಚಿನ್.

ವಿಶೇಷವೆಂದರೆ ಇಂತಹ ಸ್ಥಿತಿಯಲ್ಲೂ ಜೋಹಾನ್ಸ್‌ಬರ್ಗ್‌ನಲ್ಲಿ ನಡೆದ ಅಂದಿನ ಪಂದ್ಯದಲ್ಲಿ ಸಚಿನ್ ಭರ್ಜರಿಯಾಗಿ ಬ್ಯಾಟ್ ಬೀಸಿ 97 ರನ್ ಗಳಿಸಿದ್ದರು.

ಅದಕ್ಕೆ ಅವರನ್ನು ಕ್ರಿಕೆಟ್ ದೇವರೆನ್ನುವುದು!