87ರ ಹರೆಯದ ಸೂಪರ್ ಫ್ಯಾನ್‌ಗೆ ವಿರಾಟ್ ಸಂದೇಶ

ಲೀಡ್ಸ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಶ್ರೀಲಂಕಾ ವಿರುದ್ಧದ ಪಂದ್ಯದಲ್ಲೂ ಭಾರತಕ್ಕೆ ಚಿಯರ್ ಹಾಡಲು 87ರ ಹರೆಯದ ಸೂಪರ್ ಫ್ಯಾನ್ ಚಾರುಲತಾ ಪಟೇಲ್ ಆಗಮಿಸುವ ಮೂಲಕ ಗಮನ ಸೆಳೆದಿದ್ದಾರೆ.

ಬಾಂಗ್ಲಾದೇಶ ವಿರುದ್ಧ ನಡೆದ ಪಂದ್ಯದಲ್ಲಿ ಭಾರತ ತಂಡವನ್ನು ಬೆಂಬಲಿಸಿದ 87ರ ಅಜ್ಜಿಯ ಕ್ರಿಕೆಟ್ ಅಭಿಮಾನಿಕ್ಕೆ ಕ್ರೀಡಾಭಿಮಾನಿಗಳು ಮನ ಸೋತಿದ್ದರು. ಬಳಿಕ ಅಜ್ಜಿಯನ್ನು ಭೇಟಿ ಮಾಡಿದ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ವಿಶ್ವಕಪ್‌ನ ಉಳಿದಿರುವ ಟಿಕೆಟ್‌ಗಳನ್ನು ಕೊಡಿಸುವುದಾಗಿ ಭರವಸೆ ನೀಡಿದ್ದರು.

ಶ್ರೀಲಂಕಾ ವಿರುದ್ಧದ ಕೊನೆಯ ಲೀಗ್ ಪಂದ್ಯ, ಎರಡು ಸೆಮಿಫೈನಲ್ ಹಾಗೂ ಫೈನಲ್ ಪಂದ್ಯದ ಟಿಕೆಟ್‌ಗಳನ್ನು ಅಜ್ಜಿಗೆ ಕೊಡಿಸಲಾಗಿದೆ.

ಪೀಪಿ ಊದುವ ಜತೆಗೆ ತ್ರಿವರ್ಣ ಧ್ವಜ ಹಿಡಿದು ಅತ್ಯಂತ ಉತ್ಸಾಹದಿಂದ ಭಾರತ ತಂಡವನ್ನು ಬೆಂಬಲಿಸಿದ್ದ ಅಜ್ಜಿ ಈ ಬಾರಿ ನೀಲಿ ಜೆರ್ಸಿಯಲ್ಲಿ ಕಾಣಿಸುವ ಮೂಲಕ ತಮ್ಮ ದೇಶ ಪ್ರೇಮವನ್ನು ಮೆರೆದಿದ್ದಾರೆ.

ಅಜ್ಜಿಗೆ ವಿಶೇಷ ಸಂದೇಶ ರವಾನಿಸಿರುವ ಕಪ್ತಾನ ಕೊಹ್ಲಿ, ಭಾರತ ತಂಡಕ್ಕಾಗಿ ನಿಮ್ಮ ಪ್ರೀತಿ ಹಾಗೂ ಉತ್ಸಾಹವು ನಮಗೆ ಸ್ಫೂರ್ತಿಯಾಗಿದೆ. ನಿಮ್ಮ ಕುಟುಂಬದ ಜತೆಗೆ ಪಂದ್ಯ ಆನಂದಿಸುವ ನಂಬಿಕೆ ನನಗಿದೆ. ತುಂಬಾನೇ ಪ್ರೀತಿಯೊಂದಿಗೆ ವಿರಾಟ್ ಎಂದು ಹೇಳಿದ್ದಾರೆ.