ಭಾರತಕ್ಕೆ ಚಿಯರ್ ಹಾಡಿ ಹೃದಯ ಗೆದ್ದ 87ರ ಅಜ್ಜಿ

ಬರ್ಮಿಂಗ್‌ಹ್ಯಾಮ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾರತದ ಪಂದ್ಯವನ್ನು ವೀಕ್ಷಿಸಲು ವಿಶೇಷ ಆತಿಥಿಯೊಬ್ಬರು ಆಗಮಿಸಿದ್ದರು. ಅವರೇ 87ರ ಹರೆಯದ ಅಜ್ಜಿ ಚಾರುಲತಾ ಪಟೇಲ್.

ಈ ಇಳಿ ವಯಸ್ಸಿನಲ್ಲಿ ಕ್ರಿಕೆಟ್ ಮೇಲಿನ ಉತ್ಸಾಹ ಕಿಂಚಿತ್ತು ಕುಂದಲಿಲ್ಲ. ಅಲ್ಲದೆ ಭಾರತಕ್ಕೆ ಚಿಯರ್ ಹಾಡುವ ಮೂಲಕ ಕ್ರೀಡಾಭಿಮಾನಿಗಳ ಹೃದಯ ಗೆದ್ದಿದ್ದಾರೆ.

ಇದು ಕ್ರಿಕೆಟ್ ‌ಮೇಲಿನ ಪ್ರೀತಿಯನ್ನು ಪ್ರತಿಬಿಂಬಿಸುವಂತಿತ್ತು. ಬಳಿಕ ಪ್ರತಿಕ್ರಿಯೆ ನೀಡಿರುವ ಅಜ್ಜಿ, ಟೀಮ್ ಇಂಡಿಯಾದ ಆಟಗಾರರು ತಮಗೆ ಮಕ್ಕಳಂತೆ. ಹಾಗಾಗಿ ಅವರಿಗೆಲ್ಲ ಬೆಂಬಲ ನೀಡಲು ಇಲ್ಲಿಗೆ ಬಂದಿದ್ದೇನೆ ಎಂದಿದ್ದಾರೆ.

ಖಂಡಿತವಾಗಿಯೂ ಭಾರತ ಗೆಲ್ಲಲಿದೆ ಎಂದು ಕೈಯಲ್ಲೊಂದು ಪೀಪಿ ಊದುತ್ತಾ ನಗುಮುಖದಿಂದಲೇ ಉತ್ತರಿಸಿದರು. ಪ್ರಸ್ತುತ ಅಜ್ಜಿಯ ಕನಸು ನನಸಾಗಲಿ ಎಂದು ಭಾರತೀಯರೆಲ್ಲರು ಹಾರೈಸಿದ್ದಾರೆ.

ನಡೆದಾಡಲು ಸಾಧ್ಯವಾಗದೆ ವೀಲ್ ಚೇರ್‌ನಲ್ಲಿ ಬಂದು ಭಾರತಕ್ಕೆ ಬೆಂಬಲ ನೀಡಿರುವುದು ನಿಜಕ್ಕೂ ಅಚ್ಚರಿಯೆನಿಸಿದೆ. ಪ್ರಸ್ತುತ ವೀಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಹರಡುತ್ತಿದೆ. ಅಲ್ಲದೆ ಅಜ್ಜಿಗೆ ಎಲ್ಲರೂ ಹ್ಯಾಟ್ಸಫ್ ಹೇಳುತ್ತಿದ್ದಾರೆ.