ಕೊನೆಯ ಎಸೆತದ ವೇಳೆ ಸ್ಟೋಕ್ಸ್ ಮನದಲ್ಲಿ ಹೊಳೆದಿದ್ದು ಭಾರತ-ಬಾಂಗ್ಲಾ ಪಂದ್ಯ!

ಲಂಡನ್: ಐಸಿಸಿ ಏಕದಿನ ವಿಶ್ವಕಪ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ನಡೆದ ರೋಚಕ ಫೈನಲ್ ಮುಖಾಮುಖಿಯಲ್ಲಿ ಗೆಲುವು ದಾಖಲಿಸಿರುವ ಆತಿಥೇಯ ಇಂಗ್ಲೆಂಡ್ ಚೊಚ್ಚಲ ಕಿರೀಟಕ್ಕೆ ಮುತ್ತಿಕ್ಕಿದೆ.

ಕೊನೆಯ ಹಂತದಲ್ಲಿ ಅದ್ಭುತ ಹೋರಾಟ ಮೆರೆದಿರುವ ಬೆನ್ ಸ್ಟೋಕ್ಸ್ ಅರ್ಹವಾಗಿಯೇ ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನವಾಗಿದ್ದರು. 241 ರನ್ ಗುರಿ ಬೆನ್ನಟ್ಟಿದ ಇಂಗ್ಲೆಂಡ್ ಗೆಲುವಿಗೆ ಕೊನೆಯ ಓವರ್‌ನಲ್ಲಿ 15 ರನ್‌ಗಳ ಅಗತ್ಯವಿತ್ತು. ಆದರೆ ಟ್ರೆಂಟ್ ಬೌಲ್ಟ್ ದಾಳಿಯನ್ನು ಪುಡಿಗೈದ ಸ್ಟೋಕ್ಸ್ ರೋಚಕ ಟೈ ಮಾಡುವಲ್ಲಿ ಯಶಸ್ವಿಯಾಗಿದ್ದರು.

ಕೊನೆಯ ಎಸೆತದಲ್ಲಿ ಆಂಗ್ಲರ ಗೆಲುವಿಗೆ ಎರಡು ರನ್‌ಗಳ ಅಗತ್ಯವಿತ್ತು. ಈ ಸಂದರ್ಭದಲ್ಲಿ ಸ್ಟೋಕ್ಸ್ ಮನದಲ್ಲಿ ಭಾರತ ಹಾಗೂ ಬಾಂಗ್ಲಾದೇಶ ನಡುವಣ ಪಂದ್ಯ ಹಾದು ಹೋಗಿತ್ತಂತೆ!.

ಬೆಂಗಳೂರಿನಲ್ಲಿ ನಡೆದ ಟ್ವೆಂಟಿ-20 ವಿಶ್ವಕಪ್ ಕ್ವಾರ್ಟರ್ ಫೈನಲ್‌ನಲ್ಲಿ ಗೆಲುವಿನಂಚಿನಲ್ಲಿದ್ದ ಬಾಂಗ್ಲಾದೇಶ, ಹಾರ್ದಿಕ್ ಪಾಂಡ್ಯ ಅವರ ಕೊನೆಯ ಓವರ್‌ನಲ್ಲಿ ಮೂರು ವಿಕೆಟುಗಳನ್ನು ಕಳೆದುಕೊಂಡು 1 ರನ್ ಅಂತರದ ರೋಚಕ ಸೋಲಿಗೆ ಶರಣಾಗಿತ್ತು. ಕೊನೆಯ ಎಸೆತದಲ್ಲಿ ಮಹೇಂದ್ರ ಸಿಂಗ್ ಧೋನಿ ಅದ್ಭುತವಾಗಿ ರನೌಟ್ ಮಾಡಿದ್ದರು.

ಇದನ್ನೇ ಯೋಚಿಸಿರುವ ಸ್ಟೋಕ್ಸ್ ದೊಡ್ಡ ಹೊಡೆತಕ್ಕೆ ಮುಂದಾಗದೆ ಒಂದು ರನ್ ಕಸಿದುಕೊಂಡು ಪಂದ್ಯವನ್ನು ಸೂಪರ್ ಓವರ್‌ಗೆ ಕೊಂಡೊಯ್ಯುವ ಇರಾದೆಯನ್ನಿರಿಸಿದ್ದಾರಂತೆ. ಇದನ್ನು ಸ್ವತ: ಸ್ಟೋಕ್ಸ್ ಅವರೇ ಬಹಿರಂಗಪಡಿಸಿದ್ದಾರೆ. ಹೀರೊ ಆಗಲು ಪ್ರಯತ್ನಿಸದೇ ಭಾವನೆಗಳನ್ನು ತಡೆದುಕೊಂಡು ಕನಿಷ್ಠ ಒಂದು ರನ್ ಕದಿಯುವ ಗುರಿಯಿರಿಸಿದ್ದೆ ಎಂದಿದ್ದಾರೆ.

ಬಳಿಕ ಸೂಪರ್ ಓವರ್‌ನಲ್ಲೂ ಪಂದ್ಯ ಟೈ ಆದರೂ ಪಂದ್ಯದಲ್ಲಿ ಅತಿ ಹೆಚ್ಚು ಬೌಂಡರಿ ಗಳಿಕೆಯ (ಬೌಂಡರಿ ಹಾಗೂ ಸಿಕ್ಸರ್) ಆಧಾರದಲ್ಲಿ ಇಂಗ್ಲೆಂಡ್ ಚೊಚ್ಚಲ ವಿಶ್ವಕಪ್‌ ಮುಕುಟ ಧರಿಸಿತ್ತು.