ಭುವಿ ಗಾಯಾಳು; ಅಫ್ಘಾನ್ ವಿರುದ್ಧ ಶಮಿ ಆಡುವ ಸಾಧ್ಯತೆ!

ಲಂಡನ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಟೀಮ್ ಇಂಡಿಯಾ ಮಗದೊಂದು ಗಾಯದ ಸಮಸ್ಯೆಗೊಳಗಾಗಿದೆ.

ಎಡಗೈ ಆರಂಭಿಕ ಶಿಖರ್ ಧವನ್ ಬೆನ್ನಲ್ಲೇ ಬಲಗೈ ವೇಗದ ಬೌಲರ್ ಭುವನೇಶ್ವರ್ ಕುಮಾರ್ ಸ್ನಾಯು ಸೆಳೆತಕ್ಕೊಳಗಾಗಿದ್ದಾರೆ.

ಪಾಕಿಸ್ತಾನ ವಿರುದ್ಧದ ಹೈ ವೋಲ್ಟೇಜ್ ಪಂದ್ಯದ ನಡುವೆಯೇ ಭುವಿ ಅಂಗಣ ತೊರೆದಿದ್ದರು. ತದಾ ಬಳಿಕ ಭುವಿ ಇಂಜುರಿ ಬಗ್ಗೆ ಮಾಹಿತಿ ನೀಡಿರುವ ನಾಯಕ ವಿರಾಟ್ ಕೊಹ್ಲಿ, ಎರಡರಿಂದ ಮೂರು ವಾರಗಳಿಗೆ ಅಲಭ್ಯವಾಗಲಿದ್ದಾರೆ ಎಂದು ಹೇಳಿದ್ದರು.

ಧವನ್‌ರಂತೆ ಭುವಿ ಅಲಭ್ಯತೆಯು ಭಾರತಕ್ಕೆ ಹೆಚ್ಚು ಕಾಡುತ್ತಿಲ್ಲ. ಯಾಕೆಂದರೆ ಭಾರತ ಬಲಿಷ್ಠ ಬೆಂಚ್ ಸ್ಟ್ರೆಂಗ್ ಪಡೆದಿದೆ. ಹೇಗೆ ಧವನ್ ಸ್ಥಾನವನ್ನು ರಾಹುಲ್ ತುಂಬಿಕೊಂಡಿದ್ದಾರೆಯೋ ಅದೇ ರೀತಿ ಭುವಿ ಸ್ಥಾನಕ್ಕೆ ಮೊಹಮ್ಮದ್ ಶಮಿ ಆಯ್ಕೆಯಾಗುವುದು ನಿಚ್ಚಳವೆನಿಸಿದೆ.

ಇತ್ತೀಚೆಗಿನ ಕೆಲವು ಸಮಯಗಳಿಂದ ಅಮೋಘ ಲಯ ಕಾಪಾಡಿಕೊಂಡಿರುವ ಶಮಿ, ತಮ್ಮ ವೈವಿಧ್ಯಮಯ ಬೌಲಿಂಗ್ ದಾಳಿಯಿಂದಲೇ ಎದುರಾಳಿಗಳಿಗೆ ಮಾರಕವಾಗಿ ಕಾಡುತ್ತಿದ್ದಾರೆ.

ಏಕದಿನ ವಿಶ್ವಕಪ್‌ನಲ್ಲಿ ಭಾರತ ತನ್ನ ಮುಂದಿನ ಪಂದ್ಯದಲ್ಲಿ ಶನಿವಾರದಂದು ಅಫಘಾನಿಸ್ತಾನ ಸವಾಲನ್ನು ಎದುರಿಸಲಿದೆ. ಇದರಂತೆ ಶಮಿ ಆಡುವ ಬಳಗದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅತ್ತ ಗಾಯದ ಸಮಸ್ಯೆಗೊಳಗಾಗಿರುವ ಭುವಿ ಹಾಗೂ ಶಿಖರ್ ವಿಶ್ರಾಂತಿ ಪಡೆಯಲಿದ್ದು, ನಾಕೌಟ್ ಹಂತದ ವೇಳೆ ತಂಡವನ್ನು ಸೇರಿಕೊಳ್ಳುವ ಸಾಧ್ಯತೆಯಿದೆ.