ಬ್ರಾತ್‌ವೇಟ್ ಬ್ರೇವ್ ಆಟಕ್ಕೆ ಕ್ರೀಡಾಭಿಮಾನಿಗಳ ಹೃದಯ ಛಿದ್ರ!

ಮ್ಯಾಂಚೆಸ್ಟರ್: ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಶನಿವಾರ ನಡೆದ ದ್ವಿತೀಯ ಪಂದ್ಯದಲ್ಲಿ ನ್ಯೂಜಿಲೆಂಡ್ ವಿರುದ್ಧ ವೆಸ್ಟ್‌ಇಂಡೀಸ್ 5 ರನ್ ಅಂತರದ ವಿರೋಚಿತ ಸೋಲನ್ನು ಅನುಭವಿಸಿತ್ತು.

ಮೊದಲು ಬ್ಯಾಟಿಂಗ್ ನಡೆಸಿದ ನ್ಯೂಜಿಲೆಂಡ್ ನಾಯಕ ಕೇನ್ ವಿಲಿಯಮ್ಸನ್ ಅಮೋಘ ಶತಕ (148) ಹಾಗೂ ಅನುಭವಿ ರಾಸ್ ಟೇಲರ್ (69) ಸಮಯೋಚಿತ ಅರ್ಧಶತಕದ ನೆರವಿನಿಂದ 291 ರನ್‌ಗಳ ಸವಾಲಿನ ಮೊತ್ತ ಪೇರಿಸಿತ್ತು.

ಬಳಿಕ ಗುರಿ ಬೆನ್ನಟ್ಟಿದ ವಿಂಡೀಸ್ ಒಂದು ಹಂತದಲ್ಲಿ ಕ್ರಿಸ್ ಗೇಲ್ (87) ಹಾಗೂ ಶಿಮ್ರಾನ್ ಹೆಟ್ಮಾಯೆರ್ (54) ಬಿರುಸಿನ ಅರ್ಧಶತಕಗಳೊಂದಿಗೆ 22 ಓವರ್‌ಗಳಲ್ಲಿ ಎರಡು ವಿಕೆಟ್ ನಷ್ಟಕ್ಕೆ 142 ರನ್ ಗಳಿಸಿ ಸುಸ್ಥಿತಿಯಲ್ಲಿದ್ದರೂ ಬಳಿಕ ಕೆಟ್ಟ ಆಟದಿಂದಾಗಿ ಹಿನ್ನಡೆಯನ್ನು ಅನುಭವಿಸಿತು. ಆದರೆ ಅಂತಿಮ ಹಂತದಲ್ಲ ಏಕಾಂಕಿ ಹೋರಾಟ ನೀಡಿದ ಕಾರ್ಲಸ್ ಬ್ರಾತ್‌ವೇಟ್ ಶತಕ ಸಾಧನೆ ಮಾಡಿದರೂ ಕೊನೆಯವರಾಗಿ ವಿಕೆಟ್ ಒಪ್ಪಿಸುವುದರೊಂದಿಗೆ 286 ರನ್‌ಗಳಿಗೆ ಸರ್ವಪತನವನ್ನು ಕಂಡಿತು. ಈ ಮೂಲಕ ರೋಚಕ ಸೋಲಿಗೆ ಶರಣಾಯಿತು.

ಜೇಮ್ಸ್ ನೀಶಮ್ ಎಸೆದ ಇನ್ನಿಂಗ್ಸ್‌ನ 49ನೇ ಓವರ್‌ನ ಕೊನೆಯ ಎಸೆತದಲ್ಲಿ ಕಾರ್ಲಸ್ ಬ್ರಾತ್‌ವೇಟ್ ಹೊಡೆದ ಚೆಂಡು ಇನ್ನೇನು ಸಿಕ್ಸರ್‌ ಗಡಿ ದಾಟಿತು ಎನ್ನುವಷ್ಟರಲ್ಲಿ ಬೌಂಡರಿ ಗೆರೆ ಬಳಿ ಟ್ರೆಂಟ್ ಬೌಲ್ಟ್ ಅಧ್ಭುತ ಕ್ಯಾಚ್ ಹಿಡಿಯುವ ಮೂಲಕ ಕಿವೀಸ್‌ಗೆ ರೋಚಕ ಗೆಲುವು ಒಲಿದು ಬಂತು.

ನಂಬಲಾಗದ ಈ ಕ್ಷಣದಲ್ಲಿ ಕಾರ್ಲಸ್ ಅಲ್ಲೇ ಮಂಡಿಯೂರಿ ಕುಳಿತುಕೊಂಡು ಬಿಟ್ಟರು. ಅಲ್ಲದೆ ಕಾರ್ಲಸ್ ದೃಶ್ಯಗಳು ಎಂತವರನ್ನು ಮನ ಕಲಕುವಂತಿತ್ತು. ತಕ್ಷಣ ಸಂಭ್ರಮಾಚರಣೆಯನ್ನು ಬಿಟ್ಟು ಕಾರ್ಲಸ್ ಬಳಿ ಬಂದ ಕಿವೀಸ್ ನಾಯಕ ಕೇನ್ ವಿಲಿಯಮ್ಸನ್ ಹಾಗೂ ಹಿರಿಯ ಆಟಗಾರ ರೋಸ್ ಟೇಲರ್ ಸಾಂತ್ವನವನ್ನು ಹೇಳಿದರು. ಇವರನ್ನು ಸಹ ಆಟಗಾರರು ಬೆಂಬಲಿಸಿದರು.

ಹಿಂದೊಮ್ಮೆ ಇಂಗ್ಲೆಂಡ್ ವಿರುದ್ಧ ಟ್ವೆಂಟಿ-20 ವಿಶ್ವಕಪ್ ಫೈನಲ್‌ನಲ್ಲಿ ಕಟ್ಟ ಕಡೆಯ ಓವರ್‌ನಲ್ಲಿ ಸತತ ನಾಲ್ಕು ಸಿಕ್ಸರ್‌ಗಳನ್ನು ಸಿಡಿಸಿರುವ ಕಾರ್ಲಸ್ ಬ್ರಾತ್‌ವೇಟ್, ವಿಂಡೀಸ್‌ಗೆ ಚೊಚ್ಚಲ ವಿಶ್ವಕಪ್ ಗೆಲ್ಲಿಸಿಕೊಟ್ಟಿದ್ದರು ಎಂಬುದನ್ನು ನೀವಿಲ್ಲಿ ನೆನಪಿಸಿಕೊಳ್ಳಬಹುದಾಗಿದೆ.