ಆ ವಿವಾದಿತ ಬೌಂಡರಿಯನ್ನು ಸ್ಟೋಕ್ಸ್ ಬಯಸಿರಲಿಲ್ಲವಂತೆ!

ಲಂಡನ್: ಲಾರ್ಡ್ಸ್ ಮೈದಾನದಲ್ಲಿ ಭಾನುವಾರ ನಡೆದ ವಿಶ್ವಕಪ್‌ ಫೈನಲ್‌ ಚರ್ಚೆಯ ಕೇಂದ್ರಬಿಂದುವಾಗಿ ಪರಿವರ್ತನೆಗೊಂಡಿದೆ. ಇಂಗ್ಲೆಂಡ್‌ ತಂಡದ ಗೆಲುವಿಗೆ ಕೊನೆಯ 3 ಎಸೆತಗಳಲ್ಲಿ 9 ರನ್‌ ಬೇಕಿದ್ದವು. ಅದರರ್ಥ ಗೆಲುವಿನ ತಕ್ಕಡಿ ನ್ಯೂಜಿಲೆಂಡ್‌ನತ್ತ ವಾಲಿತ್ತು. ಆದರೆ, ಮುಂದಿನ ಎಸೆತದಲ್ಲಿ ಚಿತ್ರಣ ಸಂಪೂರ್ಣ ಬದಲಾಯಿತು. ಗೆಲುವಿನ ತಕ್ಕಡಿ ಆತಿಥೇಯರತ್ತ ವಾಲಿತ್ತು. ಅದಕ್ಕೆ ಕಾರಣವಾಗಿದ್ದು ಆ ಆರು ರನ್‌ಗಳು. ಅದರ ಬೆನ್ನಿಗೇ 'ಅಂಪೈರ್‌ ತೀರ್ಪು ನ್ಯೂಜಿಲೆಂಡ್‌ಗೆ ಮುಳುವಾಯಿತೇ' ಎಂಬ ಚರ್ಚೆಯೂ ಭುಗಿಲೆದ್ದಿತು.

ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ 2ನೇ ರನ್‌ ಗಳಿಸುವ ಹಾದಿಯಲ್ಲಿ ಕ್ರೀಸಿಗೆ ಡೈವ್‌ ಹೊಡೆಯುವಾಗ ಅವರನ್ನು ರನೌಟ್‌ ಮಾಡಲು ಮಾರ್ಟಿನ್‌ ಗಪ್ಟಿಲ್‌ ಸ್ಟಂಪ್‌ಗೆ ಗುರಿಯಿಟ್ಟ ಚೆಂಡು ಅಕಸ್ಮಾತ್‌ ಸ್ಟೋಕ್ಸ್‌ ಬ್ಯಾಟಿಗೆ ತಗುಲಿ ಬೌಂಡರಿ ಗೆರೆ ತಲುಪಿತ್ತು. ತಕ್ಷಣವೇ ಅಂಪೈರ್‌ ಕುಮಾರ್‌ ಧರ್ಮಸೇನಾ ಇನ್ನೊಬ್ಬ ಅಂಪೈರ್‌ ಎರಾಸ್ಮಸ್‌ ಜತೆ ಸಮಾಲೋಚಿಸಿ ಇಂಗ್ಲೆಂಡ್‌ ತಂಡಕ್ಕೆ 6 ರನ್‌ ನೀಡಿದರು.

ಆದರೆ ಆ ವಿವಾದಿತ ಬೌಂಡರಿಯನ್ನು ಸೋಕ್ಸ್ ಬಯಸಿರಲಿಲ್ಲ ಎಂಬುದು ತಡವಾಗಿ ಬೆಳಕಿಗೆ ಬಂದಿದೆ. ಅಂಪೈರ್ ಬಳಿ ತೆರಳಿದ್ದ ಸ್ಟೋಕ್ಸ್, ನಮಗೆ ಆ ನಾಲ್ಕು ರನ್‌ಗಳು ಬೇಡ. ಅದನ್ನು ತೆಗೆದು ಹಾಕಬಹುದೇ ಎಂದು ವಿನಂತಿಸಿದ್ದರು. ಆದರೆ ಇದು ಐಸಿಸಿ ನಿಯಮವಾಗಿತ್ತು ಎಂದು ಸ್ಟೋಕ್ಸ್ ಸಹ ಆಟಗಾರನಾಗಿರುವ ಜೇಮ್ಸ್ ಆಂಡ್ರೆಸನ್ ವಿವರಿಸಿದ್ದಾರೆ.

ಬಳಿಕ ಉದ್ದೇಶಪೂರ್ವಕವಾಗಿ ಮಾಡದಿರುವ ತಪ್ಪಿಗಾಗಿ ತಮ್ಮ ಜೀವಮಾನದುದ್ಧಕ್ಕೂ ನ್ಯೂಜಿಲೆಂಡ್ ಬಳಿ ಕ್ಷಮೆಯಾಚಿಸುವುದಾಗಿ ತಿಳಿಸಿದ್ದರು.

ಏತನ್ಮಧ್ಯೆ ಅಂಪೈರ್‌ ತೀರ್ಮಾನವನ್ನು ಹಲವರು ಪ್ರಶ್ನೆ ಮಾಡಿದ್ದಾರೆ. ಯಾಕೆಂದರೆ ಆರು ರನ್ ಬದಲು ಇಂಗ್ಲೆಂಡ್‌ ತಂಡಕ್ಕೆ 5 ರನ್‌ ನೀಡಬೇಕಿತ್ತು. ಐಸಿಸಿ ನಿಯಮ 19.8ರ ಪ್ರಕಾರ, ಓವರ್‌ ಥ್ರೋ ಸಂದರ್ಭದಲ್ಲಿ ಬ್ಯಾಟ್ಸ್‌ಮನ್‌ಗಳು ಒಂದು ರನ್‌ ಪೂರ್ಣಗೊಳಿಸಿ 2ನೇ ರನ್‌ ಗಳಿಸುವ ಪ್ರಕ್ರಿಯೆಯಲ್ಲಿದ್ದರೆ ಓವರ್‌ ಥ್ರೋ (ಫೋರ್‌) ರನ್‌ಗಳಿಗೆ ಆ ರನ್‌ ಕೂಡ ಸೇರ್ಪಡೆಯಾಗುತ್ತದೆ. ಇಲ್ಲಿ ಬೆನ್‌ ಸ್ಟೋಕ್ಸ್‌ 2ನೇ ರನ್‌ ಪೂರ್ತಿಗೊಳಿಸುವುದಕ್ಕಾಗಿ ಡೈವ್‌ ಹೊಡೆದಿದ್ದಾಗ ಚೆಂಡು ಅವರ ಬ್ಯಾಟಿಗೆ ಬಡಿದಿತ್ತು. ಹೀಗಾಗಿ ಅಂಪೈರ್‌ಗಳ ಪ್ರಕಾರ ಬ್ಯಾಟ್ಸ್‌ಮನ್‌ 2ನೇ ರನ್‌ ಕೂಡ ಪೂರ್ಣಗೊಳಿಸಿದ್ದಾರೆ.

ಆದರೆ, ಮಾಜಿ ಅಂಪೈರ್‌ ಸೈಮನ್‌ ಟೌಫೆಲ್‌ ಪ್ರಕಾರ, ಬೆನ್‌ ಸ್ಟೋಕ್ಸ್‌ ಪೂರ್ಣಗೊಳಿಸಿರುವುದು ಕೇವಲ 1 ರನ್‌. ಜತೆಗೆ ಓವರ್‌ ಥ್ರೋನಲ್ಲಿ ದೊರೆತ 4 ರನ್‌ ಸೇರಿ 5 ರನ್‌ ನೀಡಬೇಕಿತ್ತು. ಅಲ್ಲದೆ, ಮುಂದಿನ ಎಸೆತ(49ನೇ ಓವರ್‌ನ 4ನೇ ಎಸೆತ)ವನ್ನು ಸ್ಟೋಕ್ಸ್‌ ಬದಲು ಆದಿಲ್‌ ರಶೀದ್‌ ಆಡಬೇಕಿತ್ತು.

2004-2008ರ ತನಕ 5 ಬಾರಿ ಐಸಿಸಿ ವರ್ಷದ ಅಂಪೈರ್‌ ಪ್ರಶಸ್ತಿಗೆ ಭಾಜನವಾಗಿದ್ದ ಟೌಫೆಲ್‌ ಪ್ರಸ್ತುತ ಎಂಸಿಸಿ ನಿಯಮಗಳ ಉಪಸಮಿತಿಯ ಸದಸ್ಯರಾಗಿದ್ದಾರೆ.