ಐಸಿಸಿ ವಿರುದ್ಧ ಸಿಡಿದೆದ್ದ ಅಭಿಮಾನಿಗಳು

ಲಂಡನ್: ಮಹೇಂದ್ರ ಸಿಂಗ್ ಧೋನಿ ಗ್ಲೌವ್ ವಿವಾದ ಸೇರಿದಂತೆ ಅನೇಕ ವಿಚಾರಗಳನ್ನು ಸೂಕ್ಷ್ಮವಾಗಿ ಪರಿಶೋಧಿಸುವ ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ, ವಿಶ್ವಕಪ್‌ನಂತಹ ಬೃಹತ್ ಟೂರ್ನಿಗಳನ್ನು ವ್ಯವಸ್ಥಿತವಾಗಿ ಆಯೋಜಿಸುವಲ್ಲಿ ವಿಫಲವಾಗಿದೆ ಎಂದು ಅಭಿಮಾನಿಗಳು ಕಿಡಿಕಾರಿದ್ದಾರೆ.

#ShameOnICC ಎಂಬ ಹ್ಯಾಶ್‌ಟ್ಯಾಗ್ ಅಡಿಯಲ್ಲಿ ಐಸಿಸಿ ವಿರುದ್ಧ ವ್ಯಾಪಕ ಟೀಕೆಗಳು ವ್ಯಕ್ತವಾಗುತ್ತಿದೆ. ಇತಿಹಾಸದಲ್ಲೇ ಇದೇ ಮೊದಲ ಬಾರಿಯೆಂಬಂತೆ ಐಸಿಸಿ ವಿಶ್ವಕಪ್‌ನಲ್ಲಿ ನಾಲ್ಕು ಪಂದ್ಯಗಳು ಮಳೆಗೆ ಕೊಚ್ಚಿ ಹೋಗಿದೆ.

ಈ ಮೂಲಕ ತಂಡಗಿಂತಲೂ ಮಿಗಿಲಾಗಿ ಮಳೆಯೇ ಗರಿಷ್ಠ ಎಂಟು ಅಂಕಗಳನ್ನು ಸಂಪಾದಿಸಿದೆ. ಪದೇ ಪದೇ ಮಳೆ ಸುರಿಯುತಿದ್ದರೂ ಮೈದಾನ ಒಣಗಿಸಲು ಬೇಕಾದಷ್ಟು ಮೂಲ ಸೌಕರ್ಯಗಳು ಇಲ್ಲದೆ ಇರುವುದು ಪಂದ್ಯಗಳು ಸಂಪೂರ್ಣವಾಗಿ ರದ್ದುಗೊಳ್ಳಲು ಕಾರಣವಾಗಿದೆ.

ಮೈದಾನವನ್ನು ಸಂಪೂರ್ಣವಾಗಿ ನೀರಿನಿಂದ ಸಂರಕ್ಷಿಸುವಲ್ಲಿ ಐಸಿಸಿ ಎಡವಿದೆ. ಪರಿಣಾಮ ಪಿಚ್ ಹೊರತುಪಡಿಸಿ ಔಟ್ ಫೀಲ್ಡ್‌ನಲ್ಲಿ ಹೊಳೆ ನಿರ್ಮಾಣವಾಗುವಂತಾಗಿದೆ. ಇದು ಮೈದಾನ ಒಣಗಿಸಲು ತುಂಬಾನೇ ವಿಳಂಬವಾಗುತ್ತಿದೆ.

ನೀರನ್ನು ತೆರವುಗೊಳಿಸಲು ಬೇಕಾದಷ್ಟು ಮೆಶಿನ್‌ಗಳು ಇಲ್ಲದೇ ಇರುವುದು ಭಾರಿ ಹಿನ್ನಡೆಗೆ ಕಾರಣವಾಗಿದೆ. ಒಟ್ಟಿನಲ್ಲಿ ಐಸಿಸಿ ಕಳಪೆ ಮಟ್ಟದ ವಿಶ್ವಕಪ್ ಆಯೋಜನೆಗೆ ಭಾರಿ ಟೀಕೆಗಳು ವ್ಯಕ್ತವಾಗಿದೆ.