ಪ್ರತಿಕೂಲ ಹವಾಮಾನಕ್ಕೆ ಒಗ್ಗಿಕೊಳ್ಳುವುದೊಂದೇ ದಾರಿ: ಹರ್ಷ ಭೋಗ್ಲೆ

ಮುಂಬಯಿ: ವಿಶ್ವಕಪ್ ಕ್ರಿಕೆಟ್ ಸಂದರ್ಭದಲ್ಲಿ ಇಂಗ್ಲೆಂಡ್‌ನ ಈಗಿನ ಪರಿಸ್ಥಿತಿ ನೋಡಿದರೆ, ಅಲ್ಲಿನ ಪ್ರತಿಕೂಲ ಹವಾಮಾನಕ್ಕೆ ಒಗ್ಗಿಕೊಳ್ಳದೆ ಬೇರೆ ದಾರಿಯಿಲ್ಲ ಎಂದು ಕ್ರಿಕೆಟ್‌ ವಿಶ್ಲೇಷಕ ಹರ್ಷ ಭೋಗ್ಲೆ ಹೇಳಿದ್ದಾರೆ.

ಒಬ್ಬ ಸಭ್ಯ ಅತಿಥಿಯಂತೆ ಆಗೊಮ್ಮೆ ಈಗೊಮ್ಮೆ ವಿಶ್ವಕಪ್‌ ಅಂಗಣಕ್ಕೆ ಮಳೆ ಭೇಟಿ ಕೊಡುತ್ತಿದ್ದು ಸಾಕಷ್ಟು ಗೊಂದಲಗಳನ್ನು ಹುಟ್ಟುಹಾಕಿದೆ. ಇದರ ನಡುವೆಯೇ ಟೀಮ್‌ ಇಂಡಿಯಾದಲ್ಲಿ 4ನೇ ಕ್ರಮಾಂಕದ ಚರ್ಚೆ ಮರುಕಳಿಸಿದೆ. ಕೆ.ಎಲ್‌.ರಾಹುಲ್‌ ಕಾಯಂ ಸ್ಥಾನಕ್ಕೆ ಮರಳಿದ್ದು ಇನಿಂಗ್ಸ್‌ ಆರಂಭಿಸಲಿದ್ದಾರೆ.

ಇತ್ತೀಚಿಗೆ ಅವರ ವೃತ್ತಿಬದುಕಿನಲ್ಲಿ ಬಿರುಗಾಳಿ ಎದ್ದಿತ್ತು. ಆದಾಗ್ಯೂ ಧೃತಿಗೆಡದೆ ಶಾಂತಚಿತ್ತರಾಗಿದ್ದ ಅವರಿಗೆ ಇದೀಗ ದಿಢೀರನೆ ಇನಿಂಗ್ಸ್‌ ಆರಂಭಿಸುವ ಅವಕಾಶ ಕೂಡಿಬಂದಿದೆ. ಇದೊಂದು ಸುದೀರ್ಘ ಟೂರ್ನಿಯಾಗುವುದರಿಂದ 15 ಆಟಗಾರರಷ್ಟೇ ಅಲ್ಲದೆ, ಮೀಸಲು ಆಟಗಾರರು ಕೂಡ ಸದಾ ಸಿದ್ಧರಿರಬೇಕಾಗುತ್ತದೆ.

ಇನ್ನು ಮೀಸಲು ದಿನದ ವಿಚಾರ. ಇದು ಹೇಳುವುದಕ್ಕೇನೋ ಸುಲಭ. ಆದರೆ, ಅನುಷ್ಠಾನ ಕಷ್ಟ. ಬಿರುಗಾಳಿ ಮಳೆ ಅಥವಾ ಬರ ಪರಿಸ್ಥಿತಿಯನ್ನು ರೈತರೂ ಸೇರಿದಂತೆ ಪ್ರತಿಯೊಬ್ಬರೂ ದ್ವೇಷಿಸುತ್ತಾರೆ. ಆದರೂ ಬೆಳೆ ಬೆಳೆಯುವುದನ್ನು ನಿಲ್ಲಿಸುವುದಿಲ್ಲ. ಹಾಗೆಯೇ ಕ್ರಿಕೆಟಿಗರೂ ಸದ್ಯದ ಪರಿಸ್ಥಿತಿಗೆ ಒಗ್ಗಿಕೊಂಡು ಮುನ್ನುಗ್ಗಬೇಕಿದೆ ಎಂದು ಭೋಗ್ಲೆ ತಿಳಿಸಿದ್ದಾರೆ.